بانكتەر ب ج ز ق قارجىسىن تۇتىنۋشىلىق كرەديتكە جۇمساپ قويماي ما - ۇ ب جاۋابى

استانا. KAZINFORM - بۇگىندە ءبىرىڭعاي جيناقتاۋشى زەينەتاقى قورىنىڭ 226 ميلليارد تەڭگەسى بانكتەردىڭ ۇزاقمەرزىمدى وبليگاتسيالارىنا ينۆەستيسيالانعان. Kazinform اگەنتتىگى ۇلتتىق بانكتەن بۇل قارجىنىڭ تۇتىنۋشىلىق كرەديتكە باعىتتالماي، ەكونوميكانىڭ ناقتى سەكتورىن نەسيەلەۋگە جۇمسالۋى قالاي باقىلاناتىنىن سۇراپ ءبىلدى.

- بانكتەر تارتقان قاراجاتتى ماقساتتى پايدالانۋ قازاقستان قور بيرجاسىنىڭ سايتىندا ورنالاستىرىلاتىن وبليگاتسيا شىعارۋ پروسپەكتىسىمەن بەكىتىلگەن. قازاقستان رەسپۋبليكاسىنىڭ قارجى نارىعىن رەتتەۋ جانە دامىتۋ اگەنتتىگى ۇلتتىق بانكپەن بىرلەسىپ تارتىلعان قاراجاتتى بانكتەردىڭ قالاي يگەرىپ جاتقانىنا مونيتورينگ جۇرگىزەدى، - دەلىنگەن رەسمي جاۋاپتا.

بانكتەرگە تالاپتار ساقتالماعان جاعدايدا جۇكتەلەتىن جاۋاپكەرشىلىك تە ايقىندالعان.

- ماسەلەن، وبليگاتسيالار پروسپەكتىسىندە بەلگىلەنگەن كوۆەنانتتار بۇزىلعان، ونىڭ ىشىندە ولار تارتىلعان قاراجات ۋاقتىلى يگەرىلمەگەن جاعدايدا، بانك يگەرىلمەگەن نەمەسە ماقساتسىز پايدالانىلعان قاراجاتقا ب ج ز ق الدىنداعى وبليگاتسيالاردى مەرزىمىنەن بۇرىن وتەۋگە مىندەتتى، - دەيدى ۇلتتىق بانكتەن.

بۇعان دەيىن 2025-2026 -جىلدارى ب ج ز ق-نىڭ 1,5 تريلليون تەڭگەسىن نارىق شارتتارىمەن كۆازيمەملەكەتتىك سەكتوردىڭ قۇندى قاعازدارىنا باعىتتاۋ تۋرالى باعدارلاما قابىلدانعان بولاتىن.

ۇلتتىق بانكتىڭ ناقتىلاۋىنشا، اتالعان باعدارلاما اياسىندا 146 ميلليارد تەڭگەگە «قازاقستان حالىق بانكى» ا ق- نىڭ جانە 80 ميلليارد تەڭگەگە «بانك «Bank RBK» ا ق-نىڭ وبليگاتسيالارى ساتىپ الىنعان، ياعني اتالعان بانكتەرگە وسىنشا قارجى اۋدارىلعان.

اۆتور

ەربول جانات