باناننىڭ كوپشىلىك بىلمەيتىن زيانى انىقتالدى
استانا. KAZINFORM - قابىعىن ارشىپ جەيتىن جەمىستەردىڭ ءوزىن جۋماستان تۇتىنۋعا بولمايدى. بۇل ەرەجەنى ەلەمەۋ ءتۇرلى جۇقپالى اۋرۋلار تاراپ، پەستيتسيدتەردەن ۋلانۋعا الىپ كەلۋى مۇمكىن.
بۇل جونىندە تاعام تەحنولوگى تاميكا سيمس Mirror باسىلىمىنا بەرگەن سۇحباتىندا مالىمدەدى، دەپ حابارلايدى El.kz ينتەرنەت پورتالى.
ماماننىڭ ايتۋىنشا، بانان سەكىلدى قابىعى جەلىنبەيتىن جەمىستەر اعىندى سۋمەن جۋىلۋى كەرەك. بۇل ولاردىڭ بەتىندە جينالعان شاڭ، باكتەريالار مەن پەستيتسيد قالدىقتارىن كەتىرۋگە كومەكتەسەدى. اتالعان زياندى زاتتار جەمىستى تازارتۋ نەمەسە تۋراۋ كەزىندە قول ارقىلى اۋىزعا ءتۇسۋى مۇمكىن.
بۇل، ءبىر قاراعاندا قيسىنسىز كورىنسە دە، الدىمەن باناندى جۋعان ءجون، - دەپ اتاپ ءوتتى سيمس.
ول بۇل ەرەجەنى ساقتاماۋ سالمونەللا، ىشەك تاياقشاسى جانە ليستەريا سياقتى قاۋىپتى ميكرواعزالار تۋدىراتىن تاعامنان ۋلانۋعا سەبەپ بولۋى مۇمكىن ەكەنىن ايتادى. سالمونەللەز كەزىندە دەنە قىزۋى كوتەرىلەدى، ءىش اۋىرادى، ديارەيا مەن قۇسۋ بايقالادى. بۇل جاعداي بالالارعا، قارتتارعا جانە يممۋنيتەتى ءالسىز جاندارعا اسا قاۋىپتى - قاتتى سۋسىزدانۋ كەزىندە اۋرۋحاناعا جاتقىزۋ قاجەت بولۋى مۇمكىن.
ىشەك تاياقشاسىنىڭ كەيبىر شتامدارى ءىش اۋرۋى مەن ديارەيا سەكىلدى اۋىر بەلگىلەرگە سەبەپ بولۋى مۇمكىن. كەيدە بۇل باكتەريا بۇيرەككە اسەر ەتىپ، ومىرگە قاۋىپ توندىرەتىن گەموليتيكو-ۋرەميالىق سيندرومعا اپارادى. ال ليستەرياعا جۇكتى ايەلدەر اسا سەزىمتال: بۇل ينفەكتسيا وزدىگىنەن تۇسىككە، مەزگىلىنەن بۇرىن بوسانۋعا نەمەسە ءولى بالانىڭ دۇنيەگە كەلۋىنە سەبەپ بولۋى مۇمكىن.
سيمس سونىمەن قاتار جەمىستەردىڭ بەتىندە باكتەريادان بولەك، كىر، قوقىس جانە جاندىكتەردىڭ قالدىقتارى دا قالۋى مۇمكىن ەكەنىن ەسكەرتتى. ال پەستيتسيدتەردىڭ دەنساۋلىققا زيانى كوپ: ولاردىڭ سالدارىنان اۋتيزم، قاتەرلى ىسىك، گيپەرتونيا، قانت ديابەتى جانە دەمەنتسيا سياقتى اۋرۋلار دامۋى مۇمكىن.
