باليدە قاماۋعا الىنعان قازاقستاندىقتار تۋرالى تىڭ دەرەك شىقتى

استانا. KAZINFORM – باليدىڭ ەسىرتكىگە قارسى كۇرەس جونىندەگى ۇلتتىق اگەنتتىگى ەسىرتكى تاراتتى دەگەن كۇدىكپەن ۇستالعان ەكى قازاقستاندىققا قاتىستى تەرگەۋدىڭ ەگجەي-تەگجەيىن مالىمدەدى.

بۇل تۋرالى Тhe Вali Мedia جازدى.

ب ا ق مالىمەتىنشە، الدىمەن جەرگىلىكتى تۇرعىندار كۇدىكتى شەتەلدىكتەر تۋرالى پوليتسياعا حابارلاعان، كەيىن قۇقىق قورعاۋ ورگاندارى ولاردى قاداعالاي باستاعان. ءبىر كۇنى پوليتسەيلەر شەتەلدىكتەر جول جيەگىنە توقتاعانىن بايقاپتى. ولاردىڭ ءبىرى جولدان بىردەڭە ىزدەگەن، ال ەكىنشىسى ونى موتوتسيكلدە كۇتىپ تۇرعان.

وسىلايشا پوليتسەيلەر قازاقستاندىقتاردى ۇستاعان. ءتىنتۋ كەزىندە ولاردان ەسىرتكى، ياعني مەتامفەتاميننىڭ 30 قاپتاماسى تابىلعان.

الدىن الا مالىمەتتەر بويىنشا تەرگەۋ بارىسىندا قازاقستاندىقتار رەسەيدە ورنالاسقان ءىرى حالىقارالىق ەسىرتكى جەلىسىنە كىرەتىنى انىقتالعان.

سونداي-اق، ەسىرتكى جەلىسىن EVIL (زۇلىمدىق) بۇركەنشىك اتىمەن بەلگىلى ءبىر ادام باسقاراتىنى ايتىلادى. وعان ىزدەۋ جاريالانعان، ءبىراق قۇقىق قورعاۋ ورگاندارىنىڭ پىكىرىنشە، ول بۇل ءىستى يندونەزيادان تىس جەردە باسقارىپ وتىر.

قازىر كۇدىكتى قازاقستاندىقتاردىڭ ەكەۋى دە قاماۋدا وتىر. ولارعا ەسىرتكىنىڭ زاڭسىز اينالىمى تۋرالى باپ بويىنشا ايىپ تاعىلدى، بۇل باپ بويىنشا 20 جىلعا باس بوستاندىعىنان ايىرۋ جازاسى كوزدەلەدى.

ەسكە سالايىق، قازاقستاندىقتار بيىل ساۋىردە ۇستالعان، ولاردان شامامەن 49 گرام كريستال مەتامفەتامين تابىلعان.

جۋىردا سىرتقى ىستەر ءمينيسترىنىڭ ورىنباسارى الىبەك باقايەۆ يندونەزيادا قازاقستان ازاماتتارىنىڭ ۇستالۋىنا قاتىستى پىكىر ءبىلدىردى.