بالتىق تەڭىزىنەن 19-عاسىردا باتىپ كەتكەن شامپان تيەلگەن كەمە تابىلدى
استانا. KAZINFORM- پولياك سۇڭگۋىرلەرىنىڭ بىرەگەي ولجاسى - بورتىندا شامپان كوللەكسياسى تيەلگەن ⅩⅨعاسىردا سۋعا باتقان كەمە. باعالى بوتەلكەلەر ەش بۇلىنبەگەن، دەپ جازادى Еuronews.
جاقىندا ءبىر توپ پولياك ماماندارى بالتىق تەڭىزىنە ەكسپەديتسيا كەزىندە ەسكى بالىق اۋلاۋشى قايىعىنا ۇقساس باتىپ كەتكەن كەمەگە تاپ بولدى. باستاپقىدا ەشقانداي ەرەكشەلىك بايقالماعانىمەن، سۇڭگۋىر مارەك كاكاي مەن پاۆەل ترۋشينسكي كەمەنى تەرەڭ زەرتتەۋگە بەل بايلادى.
ولاردىڭ قىزىعۋشىلىعى بەكەر بولمادى: بالتىق تەڭىزىنىڭ 190 فۋت تەرەڭدىگىندە تاماشا ساقتالعان ⅩⅨعاسىردا باتىپ كەتكەن جەلكەندى كەمەنىڭ ىشىنەن شامپان كوللەكسياسى تابىلدى.
سۇڭگۋىرلەر توبىنىڭ جەتەكشىسى توماش ستاچۋرا سۋعا باتقان كەمەدەن تابىلعان زاتتار - مينەرالدى سۋ بوتەلكەلەرى، فارفور، شامپان - ستوكگولمدەگى كورول داستارحانىنا نەمەسە سانكت- پەتەربۋرگتەگى ورىس پاتشاسىنىڭ رەزيدەنسياسىنا قاراي بارا جاتقان بولۋى مۇمكىن دەپ بولجايدى. الايدا كەمە اپاتقا ۇشىراعان.
- مەنىڭ دايۆينگپەن اينالىسقانىما 40 جىلدان استى جانە مەنىڭ تاجىريبەمدە اپاتقا ۇشىراعان كەمەلەردەن ءبىر-ەكى بوتەلكە تابىلاتىن، ءبىراق ءدال مۇنداي ۇلكەن بوتەلكە قورىن ءبىرىنشى رەت كورۋىم، - دەدى ستاچۋرا Associated Press اگەنتتىگىنە.
كەمە بورتىنان الكوگولدەن باسقا، Selters جاپسىرمالارى بار كەراميكالىق بوتەلكەلەر دە تابىلدى، بۇل مينەرالدى سۋلاردىڭ ەمدىك قاسيەتى بار دەپ ەسەپتەلدى. شامپان ماركاسى ءالى انىقتالعان جوق، ءبىراق ستاچۋرانىڭ ايتۋىنشا، شامپان تىعىنان «R» ءارپىن انىق بايقاۋعا بولادى.
سەلتەرس- ان- دەر- لان كومپانياسىنىڭ شامپان ساراپشىلارى مەن مينەرالدى سۋ جەتكىزۋشىلەرى بوتەلكەلەرگە زەرتحانالىق زەرتتەۋ جۇرگىزۋگە قىزىعۋشىلىق تانىتتى. ستاچۋرا سۋعا باتقان كەمەنى زەرتتەۋ بويىنشا ءارى قارايعى شەشىمدى شۆەتسيا بيلىگى قابىلدايتىنىن اتاپ ءوتتى.
اۆتور
ەركەجان سماعۇلوۆا
