بالقاش كولىنە اپاراتىن جولدىڭ قۇرىلىسى بيىل اياقتالادى

تالدىقورعان. KAZINFORM - جەتىسۋ وبلىسىندا «الماتى- وسكەمەن - لەپسى - اقتوعاي» جولىنىڭ قۇرىلىسى اياقتالۋعا جاقىن. بۇل جول ءوڭىردى بالقاش كولىمەن بايلانىستىرادى. قازىر اۋقىمدى جوبانىڭ قاي كەزەڭدە ەكەنىن Kazinform اگەنتتىگىنىڭ ءتىلشىسى انىقتاپ كوردى.

«الماتى - وسكەمەن - لەپسى - اقتوعاي» باعىتى

ۇزىندىعى 105 شاقىرىم جولدىڭ قۇرىلىسى 2018 -جىلى باستالدى. ول ەكى كەزەڭ بويىنشا جۇزەگە اسىرىلىپ جاتىر. العاشقى بولىگى - 0-دەن 35 شاقىرىمعا دەيىنگى ارالىق 2021 -جىلى پايدالانۋعا بەرىلدى. الايدا قالعان بولىكتەرى قارجىلاندىرۋدىڭ جەتىسپەۋشىلىگىنە بايلانىستى كەشەۋىلدەپ كەلدى. بەس جىلدا جوبا بىرنەشە رەت وزگەرتىلىپ، ونىڭ جالپى قۇنى ايتارلىقتاي ءوستى.

قازىر 35-105 شاقىرىم ارالىعىنا العاشقى اسفالت قاباتى تولىق توسەلدى. ونىڭ 90 شاقىرىمىنا ەكىنشى قاباتى سالىندى. قالعان 40 شاقىرىمعا سوڭعى، جوعارعى قاباتتى توسەۋ قالدى. بۇل جۇمىستاردى وسى جىلدىڭ تامىز ايىنىڭ سوڭىنا دەيىن اياقتاۋ جوسپاردا. وسىدان كەيىن جول بويىن اباتتاندىرۋ، جول تاڭبالارىن سالۋ جانە جول جيەگىن نىعايتۋ جۇمىستارى باستالادى.

- بىلتىر ءبىز جولدىڭ وسى بولىگىن 15- ماۋسىمعا دەيىن اشۋعا ۋادە بەرگەن ەدىك، قازىر قوزعالىس ءۇشىن جول اشىق. جوعارعى قاباتتى توسەۋ جۇمىستارى كولىك قوزعالىسىنا كەدەرگى كەلتىرمەيدى، - دەدى جەتىسۋ وبلىسى جولاۋشىلار كولىگى جانە اۆتوموبيل جولدارى باسقارماسىنىڭ باسشىسى عالىمجان دارىبايەۆ.

جوبانىڭ قۇنى - 30 ميلليارد تەڭگە

جوبا مەردىگەرى - «جول» ج ش س، ول جولدى قايتا جاڭعىرتۋ جۇمىستارىن 2018 -جىلى باستاعان. الايدا رەسپۋبليكالىق بيۋدجەتتىڭ شەكتەۋلى قارجىلاندىرۋىنا بايلانىستى (جىلىنا 2- 3 ميلليارد تەڭگە كولەمىندە)، قۇرىلىس باياۋ ءجۇردى. سوڭعى ەكى جىلدا وبلىستىق بيۋدجەتتەن قوسىمشا قارجى ءبولىنىپ، جوبا قارقىندى ىسكە اسا باستادى. جالپى 30,4 ميلليارد تەڭگە بولاتىن جوبانىڭ جارتىسىن ءوڭىر ءوزى قارجىلاندىردى.

- سوڭعى ەكى جىل ىشىندە ءبىز وبلىستىق بيۋدجەتتەن 11 ميلليارد تەڭگە يگەردىك، - دەپ اتاپ ءوتتى سپيكەر.

تۋريزم مەن حالىق ءۇشىن ماڭىزدى جول

اتالعان جول اسىرەسە جاز مەزگىلىندە سۇرانىسقا يە - كۇنىنە بۇل باعىتپەن 6 مىڭعا دەيىن كولىك جۇرەدى. ولاردىڭ باسىم بولىگى بالقاش كولىنە باراتىن دەمالۋشىلار. بۇعان دەيىن جۇرگىزۋشىلەر اينالما جولمەن ءجۇردى، بۇل ءبىرقاتار قولايسىزدىق تۋدىرعان.

- ادامدار كوپ قيىندىققا تاپ بولاتىن: شۇرىق-تەسىك جول، دوڭگەلەكتىڭ تەسىلۋ جاعدايلارى. قازىر تالدىقورعاننان بالقاشقا ەكى ساعاتتا جەتۋگە بولادى، - دەدى باسقارما باسشىسى.

جول ەكىنشى سانات بويىنشا سالىنعان: ەنى 4,5 مەتر بولاتىن ەكى جولاق بار.

سپيكەردىڭ سوزىنشە، بۇل جەتكىلىكتى، سەبەبى بۇل - وبلىستىق ماڭىزى بار جول جانە مۇندا كولىك قوزعالىسىنىڭ جوعارى تىعىزدىعى بايقالمايدى.

- جوبا جول اكتيۆتەرى ۇلتتىق ساپا ورتالىعىنىڭ ساراپتاۋىنان وتكەن. قازىر جۇمىستاردىڭ ساپاسىنا قاتىستى ماسەلە جوق. مەردىگەر كومپانيا جول ساپاسىنا بەس جىلدىق كەپىلدىك بەرەدى، ال جولدىڭ ارالىق جوندەۋ مەرزىمى - ون جىل، - دەيدى ول .

جوبا اياسىندا ماتاي مەن لەپسى ۋچاسكەلەرىندە (60 - 104 ك م) ەكى كوپىر سالىندى. جول بويىندا ءتورت دەمالىس ايماعى پايدا بولادى. وندا شاتىرلار، دارەتحانا، تۇراق جانە قوقىس جاشىكتەرى قاراستىرلىعان. بارلىعى 14 زاماناۋي دارەتحانا ورناتىلادى، ولاردى كۇتىپ ۇستاۋمەن مەردىگەر كومپانيا اينالىسادى. قۇرىلىس جۇمىستارى تاۋلىك بويى جۇرگىزىلىپ جاتىر. 100-دەن استام مامان مەن 65 ارنايى تەحنيكا جۇمىلدىرىلدى.

ايتا كەتەيىك، بىلتىر «لەپسى - بالقاش كولى» ارالىعىنداعى (0- 27 ك م) جول تولىق جوندەلىپ، پايدالانۋعا بەرىلدى. بۇل جوبانى باسقا وتاندىق كومپانيا - «قازسترويتسەنتر» ج ش س جۇزەگە اسىردى.

اۆتور

الما مۇقانوۆا