بالكوننان سەكىرەيىن دەپ تۇرعان قاريانى پوليتسەيلەر قۇتقارىپ الدى

қария
Фото: Видеодан кадр/Павлодар облысы ПД

پاۆلودار. KAZINFORM - قارت وتباسىمەن كيكىلجىڭگە كەلىپ، اشۋ ۇستىندە بالكوننىڭ سىرتىنا شىعىپ، اسىلىپ تۇرعان. پوليتسەيلەر مەن توتەنشە جاعداي قىزمەتكەرلەرى تۇرعىندى قۇتقارىپ الدى.

وڭىرلىك پوليتسيا دەپارتامەنتىنەن حابارلاعانداي، 29-ماۋسىم كۇنى ساعات 03.40 تا نازاربايەۆ داڭعىلى بويىنداعى كوپقاباتتى ءۇيدىڭ بالكونىندا ەر ادامنىڭ اسىلىپ تۇرعانى تۋرالى حابار تۇسكەن. ول بالكوننىڭ ەرنەۋىنەن ۇستاپ، تومەنگە سەكىرۋگە وقتالعان.

وقيعا ورنىنا پاترۋلدىك پوليتسيا باتالونىنىڭ قىزمەتكەرلەرى جانات دانيار، نۇرجان قاليەۆ، دامير دۇيسەمبايەۆ جانە باۋىرجان نۇرعازىنوۆ دەرەۋ جەتتى.

«ءبىز بارعان كەزدە ەر ادام 8-قاباتتىڭ بالكونىندا اسىلىپ تۇردى. بىردەن جوعارىعا كوتەرىلدىك. الگى بالكونعا ازاماتتىڭ پاتەرى ارقىلى عانا كىرۋگە مۇمكىندىك بولدى. وقيعا ورنىندا توتەنشە جاعداي قىزمەتكەرلەرىمەن بىرگە پاتەردىڭ ەسىگىن اشىپ، بالكونعا ءوتىپ، ارىپتەسىم تومەن ءتۇسىپ، ەر ادامدى دەنەسىنەن بايلاپ، بىرگە جوعارى شىعاردىق. ەر ادام بولعان وقيعانى ءتۇسىندىرىپ ايتىپ بەرەتىندەي جاعدايدا بولمادى. بولمەدە ءبىز ونىمەن تىلدەسىپ، ونىڭ جاقىندارىنا كەرەك ەكەنىن ايتتىق. سول ساتتە ءبىز ءۇشىن ەڭ باستىسى ادامدى قۇتقارۋ بولدى. ءار سەكۋند ماڭىزدى بولدى»، - دەيدى قىزمەت ينسپەكتورى نۇرجان قاليەۆ.

بەلگىلى بولعانداي، قاريا مۇنداي ارەكەتكە تۋىستارىمەن جانجالداسىپ قالعاننان بارعان. پوليتسەيلەر ونى جەدەل جاردەم قىزمەتكەرلەرىنە تاپسىردى.

ەسكە سالا كەتەيىك، استانادا 7-سىنىپ وقۋشىسى بالكونعا ءىلىنىپ تۇرعان بەس جاسار بالانى قۇتقاردى.

سوڭعى جاڭالىقتار