بالايەۆا: تەاتر ونەرى - تالانت پەن تالعام، شىنايىلىق پەن ادالدىقتان تۋعان تەكتى ونەر
استانا. قازاقپارات - 27-ناۋرىزدا بۇكىل الەمدە بارشا تەاتر قىزمەتكەرلەرىنىڭ كاسىبي مەرەكەسى - دۇنيەجۇزىلىك تەاتر كۇنىن اتالىپ وتەدى.
تەاتر - ادام جانىنىڭ ايناسى، وي مەن سەزىمنىڭ ۇيلەسىمى، ءومىردىڭ ءتۇرلى قىرلارىن ساحنادا شەبەر جەتكىزەتىن ۇلى ونەر. تەاتر - قوعامنىڭ مادەني دامۋىنا ىقپال ەتەتىن قۇرال.
«قازاقستاندا تەاتر ونەرىنە قىزىعۋشىلىق ارتىپ كەلەدى. زال كورەرمەنگە تولى، قويىلىمداردىڭ پرەمەراسىنا بيلەتتەر ەكى-ءۇش اپتا بۇرىن ساتىلىپ كەتەدى. ساحنا ونەرىنە قۇشتار جانداردىڭ اراسىندا جاستاردىڭ كوپ بولۋى كوڭىلگە ەرەكشە قۋانىش ۇيالاتادى» دەپ اتاپ ءوتتى پرەزيدەنت قاسىم-جومارت توقايەۆ IV ۇلتتىق قۇرىلتاي وتىرىسىندا.
بۇگىندە قازاقستاندا 70 تەاتر جۇمىس ىستەيدى، ولاردىڭ 57 سى - مەملەكەتتىك تەاتر. اتاپ ايتساق، 11 رەسپۋبليكالىق، 46 وڭىرلىك تەاتر بار. كەيىنگى ءتورت جىلدا ەلىمىزدە بەس جاڭا مەملەكەتتىك تەاتر اشىلدى. بۇل تەاتر ونەرىنىڭ دامىپ كەلە جاتقانىن، سۇرانىسقا يە ەكەنىن كورسەتەدى.
- قازاقستاندىق تەاترلار وتاندىق كورەرمەندى جاڭا قويىلىمدارمەن قۋانتىپ قانا قويماي، ەلىمىزدى حالىقارالىق ارەنادا دا تانىتىپ كەلەدى. 2024 -جىلى 396 گاسترولدىك ساپار ۇيىمداستىرىلسا، ونىڭ 350 ى ەل ىشىندە، 46 سى شەتەلدە ءوتتى، - دەدى ايدا بالايەۆا.
وتاندىق تەاترلاردا 9 مىڭعا جۋىق مامان جۇمىس ىستەيدى، ونىڭ 4200 ى شىعارماشىلىق ۇجىم وكىلدەرى. ءبىر جىل ىشىندە قازاقستاننىڭ مەملەكەتتىك تەاترلارى 200 دەن استام جاڭا قويىلىم قويدى، ولاردىڭ 107 سى وتاندىق اۆتورلاردىڭ شىعارمالارى نەگىزىندە ساحنالانعان.
- تەاتر ونەرى - تالانت پەن تالعام، شىنايىلىق پەن ادالدىقتان تۋعان تەكتى ونەر. وسىناۋ ەرەكشە كۇنى ساحنادا جانە ساحنا سىرتىندا ەڭبەك ەتىپ جۇرگەن بارشا جاندى قۇتتىقتايمىن! ولار - اكتەرلەر، رەجيسسەرلەر، دراماتۋرگتەر، ستسەنوگرافتار، جارىق جانە دىبىس قويۋشى ماماندار، كوستيۋمەرلەر، گريمەرلەر، اكىمشىلەر مەن تەحنيكالىق ماماندار. ەڭ باستىسى، بۇل قاستەرلى ونەردى جان-تانىمەن جاقسى كورەتىن بارشا كورەرمەنگە العىسىم شەكسىز. كورەرمەننىڭ ىستىق ىقىلاسى مەن قولداۋى تەاتردىڭ ماڭگىلىك ءومىر ءسۇرۋىنىڭ كەپىلى. سول سەبەپتى تەاترعا كەلۋشى ءاربىر جانعا، ونەردى باعالايتىن ءار كورەرمەنگە دە ەرەكشە العىس ايتامىن. ونەردىڭ كيەلى ورداسى - تەاتر ماڭگى جاساي بەرسىن! دۇنيەجۇزىلىك تەاتر كۇنى قۇتتى بولسىن، - دەدى مادەنيەت جانە اقپارات ءمينيسترى ايدا بالايەۆا.
ايتا كەتەلىك پرەزيدەنت بيزنەس وكىلدەرىن ايماقتىق تەاترلاردى قولداۋعا شاقىرعان ەدى.
