بالانىڭ اقىلدى بولۋى تەگىنە بايلانىستى ما؟

استانا. قازاقپارات - بالانىڭ تالانتتى بولۋى ونىڭ قانىنان داريدى، اتا-بابادان كوشەدى دەگەن تانىم-تۇسىنىك بولسا دا، الەمدى اۋزىنا قاراتقان تالانتتاردىڭ ءبارى دە اقسۇيەك وتباسىلاردان شىققاندار ەمەس. بۇگىنگى كۇندە بالانىڭ تالانتتى بولىپ وسۋىنە كەدەرگى بولاتىن دۇنيەلەر كوپ.

ءبىرىنشى - تەلەديدار

قازىر ەكى جاستان اسقان 30 پايىز بالانىڭ جاتىن بولمەسىندە تەلەديدار بار، ەكى جاستان تومەن 59 پايىز بالا كۇنىنە ەكى ساعات تەلەديدار قارايدى. ا ق ش بالالار اۋرۋى قوعامى: «سابيلەر جانە وقۋ جاسىنداعى بالالاردى تەلەديداردان اۋلاق ۇستاۋ كەرەك» دەگەن ەسكەرتۋ ايتادى.

بالالار ءتىلىن زەرتتەۋشى عالىم روبەرت بىلاي دەيدى: «تەلەديداردىڭ بالالىق داۋرەنگە ەشقانداي پايداسى جوق، كەرىسىنشە ولاردىڭ ءبىلىم قابىلەتىنە زيانىن تيگىزەدى، ۇلكەن ميدىڭ جەتىلەتىن ۋاقىتىندا مي جەتىلمەي قالادى، ءدال سول ۋاقىتتى ولار باسقالارمەن اڭگىمە-دۇكەن قۇرۋعا ارناۋى كەرەك» دەگەن پىكىردە. ال قازىرگى بالالاردىڭ ۇيالى تەلەفونعا تاۋەلدىلىگى تىپتەن دە زياندى ەكەنى ايتپاساقتا بەلگىلى.

ەكىنشى - ءسابيدى انا سۇتىنەن ايىرۋ

ءسابي كەزىنەن تارتىپ انا ءسۇتىن ەمگەن بالالار التى جاسقا كەلگەندە اقىل-قابىلەتى انا ءسۇتىن ەمبەگەن بالالارعا قاراعاندا جوعارى بولادى. ماماندار: «بالالارىنىڭ اقىلدى بولۋىن ويلايتىن انالار ءوز سابيلەرىن مىندەتتى تۇردە ءسابي كۇنىنەن باستاپ انا سۇتىمەن ءوسىرۋى كەرەك. انا ءسۇتى ءارقانداي ازىقتىققا قاراعاندا بالانىڭ ۇلكەن ميى مەن وزگە دە اعزالارىنىڭ دامۋىن جەدەلدەتەدى» دەيدى.

ءۇشىنشى - مۋزىكا

پيانينو نەمەسە وزگە دە مۋزىكالىق قۇرالداردا ويناي الاتىن بالالاردىڭ سويلەۋ جانە باسقا دا قابىلەتتەرى مۋزىكا اسپاپتارىندا ويناي المايتىن بالالارعا قاراعاندا 15 پايىز جوعارى بولادى ەكەن. زەرتتەۋ ناتيجەسى بويىنشا سويلەۋ قۋاتى مىقتى بالالاردىڭ اقىلى دا وزگەلەردەن كوپ بولاتىنى دالەلدەنگەن.

ءبىراق، اقىلدى بالالاردىڭ مۋزىكالىق دارىنى جوعارى بولا ما، جوق الدە مۋزىكا بالالاردى اقىلدى ەتە مە؟ بۇل سۇراقتىڭ جاۋابى ءالى تابىلعان جوق.

ءتورتىنشى - سابىرلىلىق

تاعاتسىز بالالار مەن سابىرلى بالالاردى سالىستىرعاندا، سابىرلى بالانىڭ SAT (ا ق ش بالالارىنىڭ ۇيرەنۋ ناتيجەسىن انىقتايتىن ەمتيحان) جۇيەسىندەگى ناتيجەسى تاعاتسىز بالاعا قاراعاندا جوعارى بولعان.

بەسىنشى - وقۋ

ۇيىندە كىتاپ جوق بالالار مەن ۇيىندە كىتابى كوپ بالالاردى سالىستىرعاندا، وتباسىندا كىتاپ كوپ بالالاردىڭ مەكتەپ ءبىتىرۋ ناتيجەسى 36 پايىز، ج و و (جوعارى وقۋ ورنىن) ءتامامداۋ ناتيجەسى 19 پايىز جوعارى بولادى ەكەن. ەگەر كىتاپسىز بالالاردىڭ اتا-اناسى ساۋاتسىز بولسا، بۇل ايىرماشىلىق ءتىپتى دە كوپ بولادى.

التىنشى - تەمەكى تارتۋ

انا جۇكتى كەزىندە شىلىم شەكسە، بالاسىنىڭ كەمتار بولىپ تۋىلۋ سالىستىرمالى تۇردە بەس ەسەگە جوعارى بولادى ەكەن. «ا ق ش مەديسينا جۋرنالى» جاريالاعان مالىمەتتە: «ايەلدەر جۇكتىلىك مەزگىلىندە تەمەكى تارتسا، ودان تۋعان بالانىڭ 14 پايىزنىڭ اقىلى 70 پايىز تومەن بولادى ەكەن، 38 پايىزىنىڭ ءوسىپ-جەتىلۋدىڭ ورنىنا قايتا ارتقا شەگىنەدى ەكەن» دەپ جازىلعان. بالام بىلىمگە قۇمارتىپ، تالانتتى بولسىن دەسەڭىز، تەمەكىدەن اۋلاق بولىڭىز.

جەتىنشى - سەمىزدىك

دەنە اۋىرلىعى اسقان بالالاردىڭ بۇكىل الەم بويىنشا ءبىلىم قابىلەتىن سىناۋ ەمتيحانىنداعى ناتيجەسى دەنە سالماعى قالىپتى بالالارعا قاراعاندا 11 پايىز تومەن بولعان. ءبىلىم الۋ مەن ۇلگەرىم، سپورت جاعىنداعى ولاردىڭ بەلسەندىلىگى قالىپتى بالالارعا قاراعاندا وتە تومەن، سوندىقتان ولاردىڭ قالىپتى وسۋىنە جاي قاراماعان دۇرىس.

سەگىزىنشى - وتتەگىن ءسىمىرىپ جاتتىعۋ

ۇنەمى تازا وتتەگىن قابىلداپ تۇرعان بالالاردىڭ قابىلەتى 100 پايىز ارتادى. بيولوگ يوحان ميدانا «بالالاردىڭ ۇلكەن مي ءتارتىبى» اتتى كىتابىندا: «بالالاردىڭ ءوسىپ جەتىلۋىن جىگەرلەندىرەتىن تۇرمىس ءتاسىلى - بالالارعا جاسالعان سىيلىقتاردىڭ ىشىندەگى ەڭ جاقسىسى» دەگەن پىكىر ايتادى.

توعىزىنشى - دايىندىق سىنىبىنا بەرۋ

دايىندىق سىنىبىنان وتكەن بالالاردىڭ مەكتەپ كەزىندەگى ناتيجەسى جاي بالالارعا قاراعاندا 52 پايىز جوعارى بولادى ەكەن. بۇل زەرتتەۋ ناتيجەسى بالالاردى ەكى توپقا ءبولىپ، ءبىر توپتى 3-4 جاسقا كەلگەندە دايىندىق سىنىبىنا بەرىپ، كەلەسى ءبىر توبىن دايىندىق سىنىبىنا وقىتپاي، سول كۇيىندە ولاردى 27 جاسقا كەلگەندەگى كۇيلەرىن ساناققا تۇسىرگەن. سوندا، دايىندىق وقىعان بالالاردىڭ باسىنداعى ءۇي-مۇلىك سانى وقىماعاندارعا قاراعاندا بەس ەسەگە كوپ بولعان. قىلمىس وتكىزۋ سالىستىرماسى وقىماعان بالالاردا ەكى ەسەگە، ەسىرتكى شەگۋ سالىستىرماسى سەگىز ەسەگە كوپ بولعان.

ونىنشى - ەرتە ۇيلەنۋ

20 جاسىندا ۇيلەنىپ بالالى بولعان وتباسىنداعى بالانىڭ اقىل-ويى 40 جاسىندا ۇيلەنىپ ۇرپاق سۇيگەن اتا-انانىڭ بالاسىنا قاراعاندا 3-6 پايىزعا جوعارى بولعان. اتا-اناسى ۇلكەن بالالاردا پيسحولوگيالىق اۋىتقۋلار مەن جالعىزسىراۋ جانە جۇيكە اۋرۋلارى كوپ پايدا بولادى ەكەن.

ون ءبىرىنشى - ارەكەت

سيرك ويىنى ارقىلى بالالاردىڭ ۇلكەن ميىنداعى سۇر زاتتى 3 پايىزعا ارتتىرۋعا بولادى. كوپ ارەكەت جاساۋ مەن سپورت بالانىڭ ميىن جەتىلدىرۋگە پايدالى.

ون ەكىنشىسى - سوزدىك قورى

ەڭ تومەنگى تۇرمىس قاراجاتىن الاتىن وتباسىنداعى بالانىڭ سوزدىك قورى جاي وتباسىعا قاراعاندا ¼ بولادى. بۇل ۇيدەگى بالا جىلىنا 3 ميلليون ءسوز ەستىسە، قالىپتى وتباسىنداعى بالا جىلىنا 6-11 ميلليون ءسوز ەستيدى ەكەن. وسى ناتيجە بويىنشا قاراعاندا الدىڭعى جانۇيادا ءۇش جاسقا كەلگەن بالا 500 ءسوز بىلسە، ءدال وسى جاستا قالىپتى وتباسىنداعى بالا 750-1110 ءسوز بىلەدى ەكەن.

ون ءۇشىنشى - شەتەل ءتىلىن ۇيرەتۋ

ەكى شەت ءتىلىن بىلەتىن بالانىڭ SAT ەمتيحان جۇيەسىندەگى ناتيجەسى شەت ءتىلىن ۇيرەنبەگەن بالاعا قاراعاندا 14 پايىزعا جوعارى ەكەن. شەت ءتىلىن ۇيرەنۋدىڭ ۋاقىتى ەڭ كەمىندە ءبىر جىلدان اسسا عانا ونىڭ ناتيجەسى كورىنە باستايدى.

ون ءتورتىنشى - كومپيۋتەر ويىندارى

كومپيۋتەر ويىنىن كوپ وينايتىن بالانىڭ وقۋ ناتيجەسى بۇعان قاتىسى جوق بالاعا قاراعاندا 9،4 پايىزعا تومەن بولادى ەكەن.

ون بەسىنشى - ءدارى-دارمەكتى كوپ پايدالانۋ

عالىمدار جەتى جاستاعى بالالار مەن ولاردىڭ انالارىنا زەرتتەۋ جۇرگىزۋ ارقىلى ءدارى-دارمەكتى كوپ پايدالانعان جانە ەگىستىككە قولدانىلاتىن دارىلەردى اۋا ارقىلى جۇتقان انالاردىڭ بالالارى قالىپتى بالالارعا قاراعاندا تومەن بولاتىنىن انىقتادى، دەپ جازادى massaget.kz.