بالالارمەن ۇشۋعا قانداي تالاپتار مەن جەڭىلدىكتەر ۇسىنىلادى
استانا. KAZINFORM - اۋە كومپانيالارى كامەلەتكە تولماعان جولاۋشىلاردى تاسىمالداۋ ءۇشىن ناقتى قانداي شارتتار بەلگىلەگەن؟ قاي جاستا قانداي قۇجات قاجەت، بالالارعا قانداي تالاپتار قويىلعان، بيلەت باعاسى قالاي ەسەپتەلەتىنى جونىندە كولىك مينيسترلىگى ءمالىم ەتتى.
بالالاردى سۇيەمەلدەۋ ءتارتىبى:
* 0- 6 جاس: تەك ەرەسەك جولاۋشىمەن بىرگە ۇشا الادى.
* 6- 16 جاس: تەك اۋە كومپانياسى «كامەلەتكە تولماعان بالانى الىپ ءجۇرۋ» قىزمەتىن راسىمدەگەن جاعدايدا ءوز بەتىنشە ۇشا الادى.
* بالانىڭ اتا-اناسى (نەمەسە زاڭدى وكىلى) جازباشا ءوتىنىش بەرگەننەن كەيىن عانا بالا جالعىز ۇشا الادى.
* كامەلەتكە تولماعان بالامەن ۇشاتىن ەرەسەك ادامنىڭ قولىندا بالانىڭ تۋۋ تۋرالى كۋالىگى جانە تۋىستىقتى/زاڭدى وكىلەتتىلىكتى راستايتىن قۇجات بولۋى ءتيىس.
* ساعات 23:00- 06:00 ارالىعىندا كامەلەتكە تولماعاندار اتا-اناسىنسىز، زاڭدى وكىلسىز ۇشاققا وتىرعىزىلمايدى (ق ر «بالانىڭ قۇقىقتارى تۋرالى» زاڭىنا سايكەس).
* جالعىز ۇشاتىن بالاعا بيلەت كەمىندە 5 كۇن بۇرىن بروندالۋى ءتيىس.
* بالا تىركەلىپ، ۇشاقتا ارنايى قاۋىپسىز ورىنعا جايعاسادى.
* ۇشۋ الدىندا اتا-انالار رەيس كەشىگۋى مۇمكىن ەكەنىن ەسكەرىپ، بالامەن بىرگە اۋەجايدا قالۋى ءتيىس.
* ۇشاق قونعاننان كەيىن بالانى اۋەجاي قىزمەتكەرى قارسى الادى، قۇجاتتار تەكسەرىلگەن سوڭ ول تەك جەكە كۋالىگى بار ەرەسەك ادامعا تاپسىرىلادى.
بالالار ءۇشىن بيلەتتىڭ قۇنى:
* ەرەسەك جولاۋشىنىڭ سۇيەمەلدەۋىمەن حالىقارالىق جانە ىشكى رەيستەردە 2 جاسقا دەيىنگى بالالار تەگىن تاسىمالدانادى (بولەك ورىنسىز جانە تەگىن باگاجسىز).
* 2 جاسقا دەيىنگى بالالار حالىقارالىق نەمەسە ىشكى رەيستەردە بولەك ورىندىقپەن تاسىمالداناتىن بولسا، ءتيىستى قالىپتى تاريفتىڭ %50 تولەنەدى.
* حالىقارالىق رەيستەردە 2 جاسقا دەيىنگى ەكىنشى جانە ودان كەيىنگى كامەلەتكە تولماعاندار ءۇشىن دە ءتيىستى قالىپتى تاريفتىڭ %50 تولەنەدى.
* 2 جاستان 12 جاسقا دەيىنگى بالالار حالىقارالىق رەيستەردە، 2 جاستان 15 جاسقا دەيىنگى ىشكى رەيستەردە ەرەسەك جولاۋشىنىڭ سۇيەمەلدەۋىمەن ءتيىستى قالىپتى تاريفتىڭ %50 مولشەرىندە تاسىمالدانادى.
* جاسىنا قاراماستان، اۋەبيلەت قۇنىنىڭ ءتيىستى قالىپتى تاريفتىڭ %50 تولەنگەن ءاربىر كامەلەتكە تولماعان جولاۋشىعا بولەك ورىن بەرىلەدى جانە باگاجدى تەگىن الىپ جۇرۋگە رۇقسات بەرىلەدى. تەگىن جولجۇك نورماسىنان اساتىن جولجۇك تاريف بويىنشا تولەنەدى.
* بالا اتا-اناسىنىڭ تىزەسىندە ۇشاتىن بولسا دا، ونى برونداۋ كەزىندە قوسۋ جانە تىركەۋ كەزىندە وعان وتىرعىزۋ تالونىن الۋ كەرەك ەكەنىن ەستە ۇستاعان ءجون.
ەسكە سالا كەتەيىك، بۇعان دەيىن FlyArystan اۋەكومپانياسىنىڭ سالعىرتتىعىنان ەگىزدىڭ سىڭارى ۇشاقتان قالىپ قويعانىن جازعان بولاتىنبىز.
