بالالاردى قورعاۋ سالاسىندا قىزمەتكەرلەر سانى 3,3 ەسەگە ارتتى

استانا. KAZINFORM - قازاقستاندا قورعانشىلىق ورگاندارى ماماندارىنىڭ سانى 3,3 ەسەگە ءوسىپ، 303 تەن 1006 عا جەتتى، دەپ حابارلايدى وقۋ-اعارتۋ مينيسترلىگى.

بۇل شارا وتباسىلارعا كورسەتىلەتىن كومەكتىڭ اۋقىمىن كەڭەيتۋگە، قولجەتىمدىلىكتى ارتتىرۋعا جانە سۇيەمەلدەۋدىڭ ساپاسىن جاقسارتۋعا مۇمكىندىك بەردى. جىل سوڭىنا دەيىن شتات سانى 1383 قىزمەتكەرگە دەيىن ۇلعايتىلادى.

2024 -جىلعى جەلتوقساندا قابىلدانعان «مەملەكەتتىك ناگرادالار، ءبىلىم بەرۋ جانە بالا قۇقىقتارىن قورعاۋ تۋرالى» زاڭعا سايكەس، العاش رەت ناقتى نورما بەكىتىلدى، ەندى ءاربىر 5 مىڭ بالاعا ءبىر ماماننان بولىنەدى.

سونىمەن قاتار وڭىرلەردە قورعانشىلىق ورگاندارىنىڭ جۇمىسىن ۇيلەستىرەتىن جاڭا قۇرىلىمدار قۇرىلىپ جاتىر. اقتوبە وبلىسىندا بالالاردىڭ قۇقىقتارىن قورعاۋ باسقارماسى اشىلدى.

جاقىن ۋاقىتتا مۇنداي بولىمشەلەر استانا قالاسىندا جانە قوستاناي وبلىسىندا ىسكە قوسىلادى.

- جاڭا شتاتتىق نورما قازاقستان ءۇشىن العاش رەت ەنگىزىلىپ وتىر جانە حالىقارالىق ستاندارتتارعا تولىق سايكەس كەلەدى. بۇل جەرگىلىكتى دەڭگەيدە تۋىندايتىن ماسەلەلەردى جەدەل شەشۋگە، سونداي-اق بالالار مەن ولاردىڭ وتباسىلارىنا ۋاقتىلى كومەك كورسەتۋگە مۇمكىندىك بەرەدى، - دەدى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.

بۇعان دەيىن وقۋ-اعارتۋ مينيسترلىگى بالا قۇقىقتارى جونىندەگى ۋاكىلەتتى ورگانمەن بىرلەسىپ قورعانشىلىق ورگاندارى قىزمەتكەرلەرىنە ارنالعان سەمينار- ترەنينگ وتكىزگەن بولاتىن. ونىڭ قورىتىندىسىندا ماماندارعا ادىستەمەلىك ۇسىنىمدار بەرىلىپ، بۇگىندە ولار ءىس جۇزىندە قولدانىلىپ كەلەدى.

ايتا كەتەيىك، بالامەن ارالاسۋعا قاتىستى تۋىستار اراسىنداعى داۋدى قورعانشىلىق ورگانى شەشەدى.