بالالار ەلىمىزدىڭ باس ۇستازىنا حات جولداي الادى
قازاقستان بالالارى ەلىمىزدىڭ باس ۇستازىنا تىكەلەي حات جولداي الادى. «مينيسترگە حات» اكسياسى باستالدى. بۇل تۋرالى وقۋ-اعارتۋ مينيسترلىگىنىڭ باسپا ءسوز قىزمەتى حابارلادى.
27 - مامىر مەن 1 - ماۋسىم ارالىعىندا «قازاقستان بالالارى» ونكۇندىگى اياسىندا رەسپۋبليكالىق «مينيسترگە حات» اكسياسى وتەدى.
- اكسيانىڭ ماقساتى - بالالاردىڭ ءوز ويلارىن اشىق ايتىپ، مەكتەپ، قالا نەمەسە ەل تۇرمىسىنا قاتىستى ۇسىنىس بىلدىرۋىنە، سۇراق قويۋىنا مۇمكىندىك بەرەتىن اشىق ديالوگ الاڭىن قۇرۋ. حاتتار كەلەسى ەلەكتروندىق پوشتا ارقىلى قابىلدانادى: balalaRuni2025@gmail.com وتىنىش ءبىلدىرۋ فورماتى ەركىن: بۇل ءماتىن، سۋرەت، فوتوسۋرەت نەمەسە قولمەن جازىلعان حاتتىڭ سكان- نۇسقاسى، بەينەجازبا نەمەسە پرەزەنتاتسيا بولۋى مۇمكىن، - دەلىنگەن حابارلامادا.
حاتتا مىندەتتى تۇردە كورسەتىلۋى ءتيىس:
* بالانىڭ تەگى مەن اتى؛
* وقۋ ورنى؛
* مەكەنجايى مەن بايلانىس تەلەفونى.
- اكسيا قورىتىندىسى بويىنشا مينيستر حاتتارمەن جەكە تانىسىپ، ەڭ مازمۇندى ءارى شىنايى حاتتارعا جەكە جاۋاپ بەرەدى. «مينيسترگە حات» - بۇل ءار بالانىڭ داۋىسى ماڭىزدى سانالاتىن سەنىم مەن قۇرمەت الاڭى، - دەلىنگەن مينيسترلىك حابارلاماسىندا.
