بالاباقشاداعى تاقپاقتان روماندارعا دەيىن ادىلدىكتى ناسيحاتتاۋى كەرەك - رينات زايىتوۆ

استانا. KAZINFORM - بۇگىن پارلامەنت ءماجىلىسىنىڭ وتىرىسىندا دەپۋتات رينات زايىتوۆ ءۇش جىل ىشىندە جۇزەگە اسقان ساياسي رەفورمالاردىڭ ارالىق قورىتىندىلارىنا توقتالدى.

ونىڭ ايتۋىنشا، ەلىمىزدە ۇلكەن جەتىستىكتەرگە قاراي نىق قادام جاسالىپ كەلەدى. بۇل، ەڭ الدىمەن، مەملەكەت باسشىسى قاسىم-جومارت توقايەۆتىڭ ساياسي ينستيتۋتتارعا جانە حالىقتىڭ ءۇنىن جەتكىزەتىن ازاماتتارعا ارتقان سەنىمىنىڭ ناتيجەسى.

- قازاق ءۇشىن قاشاننان بەرى ەلدىڭ اماناتى مەن سەنىمىنەن اۋىر جۇك جوق. «ءدوپ» باسساڭ - ەل ءۇمىتىن اقتاعان ەرسىڭ، «قالت» باسساڭ - جاۋدان بەتەر ەزسىڭ! كەيدە ءتىپتى كوتەرگەن سۇراعىڭا ورىنسىز سىن تاعىپ، «وسى ماسەلە سەندەر قوزعايتىن تاقىرىپ پا؟ نەگە جوعارىداعىلار ۇساق-تۇيەك ماسەلەلەر قوزعايدى» دەپ جاتادى. ءوز باسىم بۇل سىنمەن كەلىسپەيمىن. سەبەبى ءبىز -ءبىر مەملەكەتپىز، - دەدى ر. زايىتوۆ.

دەپۋتات ماجىلىستە اپتا سايىن حالىق قالاۋلىلارىنىڭ ۇكىمەت مۇشەلەرىنە ساۋال جولداپ، وتكىر سۇراقتار قويىپ وتىرعانىن ايتتى.

ونىڭ پىكىرىنشە، ماجىلىستە قوعام بەلسەندىلەرى مەن ساراپشىلاردىڭ قاتىسۋىمەن ەلدى تولعاندىراتىن ماسەلەلەر اشىق ءارى بۇكپەسىز تالقىلانىپ كەلەدى. بۇل ءۇردىس حالىقتىڭ بيلىككە دەگەن سەنىمىن قايتا تىرىلتۋگە ىقپال ەتىپ وتىر.

- وسىلايشا، قوعامدى تولعاندىراتىن كوپتەگەن ماسەلە شەشىمىن تاۋىپ، ەلدىڭ ىرگەسى بەكي ءتۇستى. ءاربىر يگى ءىس جۇزەگە اسقان سايىن حالىقتىڭ بيلىككە دەگەن سەنىمى ارتىپ كەلەدى، - دەدى رينات زايتوۆ.

سونىمەن قاتار دەپۋتات قوعامداعى رۋحاني داعدارىس ماسەلەسىنە دە توقتالدى. ول رۋحاني توزۋدىڭ، قاتىگەزدىكتىڭ ارتقانىن اتاپ ءوتىپ، بۇعان تۇرمىستىق قيىندىقتار، تاربيەنىڭ السىرەۋى جانە الەۋمەتتىك جەلىدەگى تەرىس اقپاراتتار ىقپال ەتىپ وتىرعانىن ايتتى. بۇل رەتتە تاربيە جۇمىسىن كۇشەيتۋدى، جاس ۇرپاقتىڭ بويىنا مەيىرىم، ادىلەتتىلىك پەن مەملەكەتشىلدىكتى ناسيحاتتايتىن كونتەنتتى دامىتۋ قاجەتتىگىنە توقتالدى.

- تاربيە تال بەسىكتەن دەگەندەي، قازاقستانداعى مۋلتفيلمنەن كينوعا، بالاباقشاداعى تاقپاقتان روماندارعا دەيىن ادامداردىڭ بويىنداعى مەيىرىم مەن باۋىرمالدىقتى، مەملەكەتشىلدىك پەن ادىلدىكتى ناسيحاتتاۋى كەرەك. سوندا عانا ءبىز قازاق مەملەكەتىنىڭ بايراعىن قۇلاتپاي، مارتەبەسىن اسقاقتاتاتىن ۇرپاق وسىرە الامىز. قازاق مەملەكەتىنىڭ ماتەريالدىق ەمەس قۇندىلىقتارىن قايتا تۇگەندەپ، ونى جاستاردىڭ ساناسىنا ءسىڭىرۋ - ءبىزدىڭ مىندەتىمىز، - دەپ قورىتىندىلادى ول.

بۇدان بۇرىن حابارلانعانداي، بۇگىن پارلامەنت ءماجىلىسىنىڭ جالپى وتىرىسىندا پالاتا ءتوراعاسى ەرلان قوشانوۆ «پرەزيدەنت قاسىم-جومارت توقايەۆتىڭ ساياسي رەفورمالارىن ىسكە اسىرۋ - مەملەكەتتىك قۇرىلىستىڭ جاڭا تاريحي كەزەڭى» اتتى بايانداما جاسادى.

وتىرىس بارىسىندا ەلىمىزدىڭ بارلىق پروگرەسسيۆتى قوعامدىق-ساياسي كۇشتەرىن مەملەكەت باسشىسىنىڭ توڭىرەگىندە توپتاسۋعا جانە ادىلەتتى قازاقستان قۇرۋ قاعيداتتارىنا نەگىزدەلگەن رەزوليۋتسيا (قارار) قابىلداندى.