بالا ءوز قۇقىعى بۇزىلعان جاعدايدا قايدا جۇگىنە الادى

جىل سايىن 20- قاراشادا الەم قاۋىمداستىعى ب ۇ ۇ باس اسسامبلەياسىنىڭ ۇسىنىسىمەن دۇنيەجۇزىلىك بالالاردى قورعاۋ كۇنىن اتاپ وتەدى، دەپ حابارلايدى Kazinform.

وقۋ-اعارتۋ ۆيتسە-ءمينيسترى ەدىل وسپاننىڭ ايتۋىنشا، حالقىمىزدىڭ ۇشتەن بىرىنەن استامى - بالالار. ەلىمىزدە 6 ميلليون 800 مىڭ جاس ازامات بار. سونداي-اق مەملەكەتتىك ساياساتتىڭ باستى باسىمدىقتارىنىڭ ءبىرى - بالالاردى قورعاۋ مەن قولداۋ.

«قۇرمەتتى بالالار، ەگەر سىزدەردىڭ قۇقىعىڭىز بۇزىلسا، قۇرداستارىڭىزدىڭ نەمەسە ەرەسەكتەردىڭ ادىلەتسىزدىگى مەن زورلىق-زومبىلىعىنا تاپ بولساڭىز، ءار ۋاقىتتا ۇلكەندەرگە جۇگىنە الاسىزدار.

ەڭ الدىمەن، ءوز اتا-انالارىڭدى تىڭداڭىز - ولار ءسىزدىڭ باستى قورعاۋشىلارىڭىز. سىنىپ جەتەكشىسى، مەكتەپ پسيحولوگى سىزدەرگە قاجەتتى قولداۋدى كورسەتۋگە ءاردايىم دايىن. ءسىز «111» نومىرىنە قوڭىراۋ شالۋ ارقىلى تاۋلىك بويى شۇعىل كومەك الا الاسىز، سونداي-اق «بالا قورعاۋ» چاتىنا جازساڭىز ءبىز سىزدەرگە مىندەتتى تۇردە كومەكتەسەمىز»، - دەدى وقۋ-اعارتۋ ۆيتسە-ءمينيسترى.

ۆەدومستۆو وكىلى سونداي-اق، ورتا ءبىلىم ماسەلەسىنە توقتالدى.

«ەل كونستيتۋتسياسىنا جانە ءبىلىم بەرۋ سالاسىنداعى كەمسىتۋشىلىككە قارسى كۇرەس تۋرالى كونۆەنتسياعا سايكەس، ءار بالانىڭ ساپالى ورتا ءبىلىم الۋىنا تولىققاندى قۇقىعى بار. قازىرگى ۋاقىتتا ەلىمىزدە 3 ميلليون 800 مىڭ وقۋشىعا ءبىلىم بەرەتىن 7800 مەكتەپ وقىتۋ ءتىلىن تاڭداۋعا ەركىندىك بەرەدى»، - دەدى ەدىل وسپان ورتالىق كوممۋنيكاتسيالار قىزمەتىندە وتكەن بريفينگتە.

ۆيتسە-ءمينيستردىڭ ايتۋىنشا، ۆەدومستۆو بالالارعا قاۋىپسىز جانە قولايلى جاعداي جاساۋ بويىنشا جۇيەلى تۇردە جۇمىس جۇرگىزىپ وتىر. ءۇش جىل ىشىندە بالالار ءۇشىن 340 مىڭ ورىنعا ارنالعان 626 مەكتەپ پايدالانۋعا بەرىلدى. «جايلى مەكتەپ» ۇلتتىق جوباسى اياسىندا 740 مىڭ قوسىمشا ورنى بار تاعى 369 زاماناۋي مەكتەپ بوي كوتەرەدى. وقۋشى ءۇشىن ورىن تاپشىلىعى ماسەلەسى وسىلاي شەشىلمەك.

«بالالار مەكەمەلەرىن تەرروريزمگە قارسى قورعاۋ شەڭبەرىندە بۇرىن-سوڭدى بولماعان كەشەندى قاۋىپسىزدىك شارالارى جۇزەگە اسىرىلۋدا. بۇل مەكتەپتەردى بەينەباقىلاۋ جۇيەلەرىمەن %100 قامتۋعا مۇمكىندىك بەردى. مينيسترلىك پەن اكىمدىكتەردىڭ ارقاسىندا مەكتەپتەردىڭ كوپشىلىگى جەدەل باسقارۋ ورتالىعىنا قوسىلعان جانە ليتسەنزيالىق قاۋىپسىزدىك پەن دابىل تۇيمەلەرى ورناتىلعان»، - دەدى ەدىل وسپان.

سونداي-اق مەكتەبى جوق اۋىلدارداعى وقۋشىلاردى قاۋىپسىز تاسىمالداۋ ماقساتىندا 500 دەن استام زاماناۋي اۆتوبۋس ساتىپ الىنعانى ايتىلىپ ءوتتى. بۇل شارالار تۇرعىلىقتى جەرىنە قاراماستان بالالاردىڭ قاۋىپسىزدىگىن قامتاماسىز ەتۋگە باعىتتالعان.