بالا اسىراپ الۋ پروتسەسى تىم ۇزاق - گەننادي شيپوۆسكيح
استانا. KAZINFORM - سەناتور گەننادي شيپوۆسكيح ءوزىنىڭ دەپۋتاتتىق ساۋالىندا بالا اسىراپ الۋداعى اكىمشىلىك كەدەرگىلەر مەن اتا-انانىڭ قامقورلىعىنسىز قالعان بالالاردى قورعاۋ جۇيەسىنىڭ تيىمسىزدىگىنە بايلانىستى پروبلەمالاردى اتاپ ءوتتى.
- وقۋ-اعارتۋ مينيسترلىگىنىڭ مالىمەتىنشە، قازىر ەلىمىزدە 21387 جەتىم جانە اتا-اناسىنىڭ قامقورلىعىنسىز قالعان بالا بار. مەملەكەتىمىز بالالار ۇيىندە تاربيەلەنىپ جاتقان جەتىم بالالاردى وتباسىلىق ورتاعا ورنالاستىرۋ ءۇشىن ءتۇرلى شارالار قابىلداپ وتىر. الايدا، ستاتيستيكالىق دەرەكتەرگە قاراعاندا، بالا اسىراپ الۋ ءۇردىسى باياۋ ءجۇرىپ جاتىر. ماسەلەن، 5 مىڭنان استام ازامات بالا اسىراپ الۋ كەزەگىندە تۇرعانىمەن، 2023 -جىلى – 194، 2024 -جىلى - 153 بالا جاڭا وتباسىن تاپقان. بۇل كورسەتكىشتەر بالا اسىراپ الۋ جۇيەسىندەگى اكىمشىلىك كەدەرگىلەردىڭ بار ەكەنىن جانە پروتسەستىڭ ۇزاققا سوزىلاتىنىن اڭعارتادى، - دەدى گ. شيپوۆسكيح سەناتتىڭ جالپى وتىرىسىندا.
ونىڭ ايتۋىنشا، مەملەكەت تاراپىنان قابىلدانىپ جاتقان باعدارلامالار مەن زاڭنامالىق ءىس-شارالار جەتىم بالالاردىڭ شىنايى قاجەتتىلىكتەرىنە ساي بولۋى كەرەك.
- وكىنىشكە قاراي، كوپتەگەن جەتىمدەرىمىز بالالار ۇيىندە تاربيەلەنىپ، وتباسىنىڭ جىلۋىن سەزىنبەي وسەدى. بۇل ولاردىڭ بولاشاقتا قوعامعا بەيىمدەلۋىن قيىنداتادى. بالا اسىراپ الۋ ءراسىمىن جەڭىلدەتۋ جانە ونى سيفرلاندىرۋ، قۇجاتتاردى راسىمدەۋ مەن قاجەتتى تەكسەرىستەردى ونلاين فورماتتا وتكىزۋ ارقىلى ۇمىتكەرلەر ءۇشىن پروتسەستى وڭايلاتۋ قاجەت. جەتىم بالالاردى وتباسىلىق ورتادا تاربيەلەۋ ساياساتىن كۇشەيتۋ، قامقورشىلىق پەن پاتروناتتىق تاربيە جۇيەسىن جەتىلدىرۋ، پاتروناتتىق تاربيەشىلەرگە تولەنەتىن قارجىلىق قولداۋدى ارتتىرۋ ماڭىزدى. قوعامدىق باقىلاۋدى كۇشەيتۋ جانە اسىراپ الۋ پروتسەسىنىڭ اشىقتىعىن قامتاماسىز ەتۋ ءۇشىن ۇكىمەتتىك ەمەس ۇيىمدار مەن قوعام بەلسەندىلەرىن تارتۋ كەرەك. بالا اسىراپ الۋ سالاسىنداعى زاڭسىزدىقتارعا كۇرەستى كۇشەيتۋ قاجەت، سىبايلاس جەمقورلىق تاۋەكەلدەرىن ازايتۋ ءۇشىن قاتاڭ باقىلاۋ شارالارىن ەنگىزۋ ماڭىزدى»، - دەدى گەننادي شيپوۆسكيح.
بۇدان بۇرىن حابارلانعانداي، جەتىم جانە اتا-اناسىنىڭ قامقورلىعىنسىز قالعان بالالارعا مەملەكەتتىك تۇرعىن ءۇي قورىنان بەرىلگەن تۇرعىن ءۇي-جايلاردى جەكەشەلەندىرۋ قۇقىعى بەرىلدى.
اۆتور
رۋسلان عابباسوۆ
