باكۋدە مۇحتار اۋەزوۆتىڭ «اباي» رومانىنىڭ لاتىن قارپىندەگى جاڭا باسىلىمى تانىستىرىلدى
استانا. KAZINFORM - باكۋدەگى اتاتۇرىك ورتالىعىندا مۇحتار اۋەزوۆتىڭ «اباي» رومانىنىڭ («اباي جولى» رومانىنىڭ العاشقى ەكى ءبولىمى) ازەربايجان تىلىندەگى جاڭا باسىلىمى تانىستىرىلدى.
تۇركى اكادەمياسىنىڭ باستاماسىمەن جارىق كورگەن رومان-ەپوپەيا ۇلى ويشىل، اقىن اباي قۇنانباي ۇلىنىڭ 180 جىلدىق مەرەيتويى اياسىندا جارىق كورىپ وتىر.
تۇساۋكەسەر راسىمىندە تۇركى اكادەمياسىنىڭ پرەزيدەنتى، اكادەميك شاھين مۇستافايەۆتىڭ ايتۋىنشا، بۇل باسىلىم كوركەم تۋىندىنىڭ ءتۇپنۇسقالىق رۋحىن قايتارۋ عانا ەمەس، قازاقستان مەن ازەربايجان اراسىنداعى مادەني بايلانىستاردى نىعايتۋدىڭ ايقىن كورىنىسى.
مۇحتار اۋەزوۆتىڭ بۇل رومانى العاش رەت ازەربايجان تىلىندە 1954-جىلى ەيۋپ ابباسوۆتىڭ تارجىمەلەۋىمەن، سول كەزدەگى كيريلل قارپىندە جارىق كورگەن بولاتىن. الايدا بۇل نۇسقا ورىس تىلىنەن اۋدارىلعان ەدى. سودان بەرگى 70 جىلدان استام ۋاقىت بويى ايگىلى شىعارما ازەربايجان وقىرماندارىنا قايتادان ۇسىنىلعان ەمەس.
- بۇل جولى رومان قازىرگى ازەربايجان ادەبي ءتىلى نورمالارىنا ساي، لاتىن قارپىمەن ءارى قازاق تىلىندەگى ءتۇپنۇسقاسى بويىنشا سالىستىرىلا تەكسەرىلىپ، العاشقى باسىلىمداعى قاتەلىكتەر تۇزەتىلىپ، كەڭەستىك تسەنزۋرا سەبەبىمەن قىسقارىپ كەتكەن كەي تۇستارى تولىقتىرىلىپ باسىلدى. «اباي» رومانىنىڭ مۇنداي فورماتتا جارىق كورۋى - ادەبي وقيعا عانا ەمەس. بۇل - مادەني جادتى جاڭعىرتۋ، ورتاق رۋحاني مۇرامىزعا دەگەن قۇرمەت پەن ونى ساقتاۋ جولىنداعى ناقتى قادام. تۇركى اكادەمياسى الداعى ۋاقىتتا دا تۇركى حالىقتارىنىڭ مادەني-رۋحاني مۇراسىن زەردەلەۋ جانە ناسيحاتتاۋ باعىتىنداعى كەشەندى جۇمىستاردى جالعاستىرا بەرەدى، - دەدى اكادەميا باسشىسى.
تۇساۋكەسەرگە ازەربايجان ميللي ءماجىلىسىنىڭ دەپۋتاتتارى، قازاقستان رەسپۋبليكاسىنىڭ ازەربايجانداعى توتەنشە جانە وكىلەتتى ەلشىسى ءالىم بايەل، تۇركپا باس حاتشىسى مەحمەت سۇرەيا ەر، تۇركى مادەنيەتى مەن مۇراسى قورىنىڭ اپپارات جەتەكشىسى فاحري حادجيەۆ، سونداي-اق عىلىمي جانە ءبىلىم بەرۋ مەكەمەلەرىنىڭ وكىلدەرى، ادەبيەت جانە مادەنيەت قايراتكەرلەرى قاتىستى.
بۇعان دەيىن ازەربايجاندا وتەتىن III ت م د ويىندارىنىڭ بويتۇمارى تانىستىرىلعان ەدى.
