باشار اساد ەلدەن قاشقان سوڭ العاش رەت مالىمدەمە جاسادى
استانا. KAZINFORM - سيريانىڭ بۇرىنعى پرەزيدەنتى ەلدەن ارميا «سوڭعى پوزيتسيالارىن بەرىپ» جانە «بارلىق مەملەكەتتىك ينستيتۋت سال بولىپ قالعاندا» عانا كەتكەنىن ايتتى، دەپ حابارلايدى Euronews.
باشار اساد ەلدەن قاشقاننان كەيىن العاشقى مالىمدەمەسىن جاسادى. ول داماسكىدە كوتەرىلىسشىلەر استاناعا كىرگەن 8 - جەلتوقسان كۇنى تاڭەرتەڭگە دەيىن بولعانىن جانە سول كۇنى كەشكە ارميا «سوڭعى پوزيتسيالارىن جوعالتقاندا» جانە «بارلىق مەملەكەتتىك مەكەمەلەر سال بولىپ قالعان كەزدە» ەلدەن كەتكەنىن ايتتى.
بۇل مالىمدەمە بۇرىنعى پرەزيدەنتتىڭ Telegram كانالىندا جاريالاندى. وندا ونىڭ داماسكىدەن رەسەيلىك حمەيميم اۆيابازاسى ورنالاسقان سيريانىڭ لاتاكيا پروۆينتسياسىنا بارعانى ايتىلادى. سونىمەن بىرگە ونىڭ استانادان كەتۋى «رەسەيلىك وداقتاستارمەن كەلىسە وتىرىپ جانە اسكەري ارەكەتتەردى ودان ءارى باقىلاۋ ماقساتىندا» جۇزەگە اسىرىلدى.
بۇرىنعى پرەزيدەنت «سيرياداعى وقيعالار كەزىندە وتستاۆكاعا كەتۋ جانە ەلدەن قاشۋ مۇمكىندىگىن ءبىر رەت تە ويلاماعانىن» ايتادى. ال ونىڭ حمەيميم بازاسىنان ەۆاكۋاتسيالانۋىنا ارميانىڭ قۇلاعانى جانە بازانىڭ وزىنە ۇشقىشسىز ۇشاقتارمەن شابۋىل جاساي باستاعانى سەبەپ بولعان كورىنەدى.
اساد مالىمدەمەنى جاريالاۋدى قاۋىپسىزدىك ماقساتىندا كەيىنگە قالدىرعانىن جازدى جانە وقيعا تۋرالى ەگجەي- تەگجەيلى بايانداۋعا ۋادە بەردى.
بۇعان دەيىن سيريانىڭ بۇرىنعى پرەزيدەنتى باشار اسادتىڭ ماسكەۋدە ەكەنى جانە رەسەيدەن باسپانا العانى بەلگىلى بولعان.
بۇعان دەيىن ەۋروپالىق وداقتىڭ سىرتقى ىستەر قىزمەتى سيرياداعى جاعداي بويىنشا مالىمدەمە تاراتقان ەدى.
قىتاي دا سيرياداعى جاعدايدى مۇقيات باقىلاپ وتىرعانىن جانە ەلدە تۇراقتىلىقتىڭ مۇمكىندىگىنشە تەزىرەك قالپىنا كەلۋىنە ۇمىتتەنەتىنىن جەتكىزدى.
رەسەي سىرتقى ىستەر مينيسترلىگى باشار اسادتىڭ بيلىكتى بەيبىت جولمەن تاپسىراتىنىن ايتىپ، ەلدەن كەتكەنىن اتاپ ءوتتى.
ءوز كەزەگىندە قازاقستاننىڭ قورعانىس مينيسترلىگى گولان جوتالارىنداعى بىتىمگەرلەردىڭ قاۋىپسىزدىگى ءۇشىن قاجەتتى شارا قابىلداپ جاتىر. قازاقستاندىق بىتىمگەرلەر قىزمەت ەتەتىن ب ۇ ۇ- نىڭ گولان جوتالارىنداعى (سون ن ر) جاۋاپكەرشىلىك ايماعىنداعى جاعداي شيەلەنىستى، ءبىراق تۇراقتى دەپ باعالانىپ وتىر.
بۇعان دەيىن Kazinform باشار اسادتىڭ ءومىربايانىن، تاياۋ شىعىستىڭ ەڭ كۇردەلى جانە قاقتىعىسقا تولى ەلدەرىنىڭ ءبىرىن قالاي باسقارعانىن شولىپ كوردى.
