باعداتتا اراب مەملەكەتتەرى ليگاسىنىڭ سامميتى ءوتىپ جاتىر
استانا. KAZINFORM - سەنبى كۇنى يراك استاناسىندا اراب مەملەكەتتەرى ليگاسىنىڭ (ا م ل) 34- سامميتى باستالدى. جيىننىڭ باستى تاقىرىبى گازا سەكتورىنداعى ۇزاققا سوزىلعان قارۋلى قاقتىعىس، تاراپتاردى تاتۋلاستارىپ، پالەستينالىق انكلاۆتىڭ قيراعان ينفراقۇرىلىمىن قالپىنا كەلتىرۋ، دەپ حابارلايدى Kazinform منشىكتى ءتىلشىسى.
باعداتقا جينالعان اراب كوشباسشىلارى يزرايلدىڭ گازاداعى ارەكەتتەرىن قاتتى سىناپ، شۇعىل تۇردە اسكەري ارەكەتتەردى توقتاتۋدى تالاپ ەتتى.
جيىننىڭ رەسمي اشىلۋى باحرەين سىرتقى ىستەر ءمينسترىنىڭ ورىنباسارى ابدۋللاتيف از- زايانيدىڭ سوزىنەن باستالدى، سەبەبى ماناما بۇعان دەيىن ا م ل- عا ءتوراعا بولعان. ول باحرەيننىڭ گازانى قالپىنا كەلتىرىپ، اتىستى توقتاتۋ تۋرالى كەلىسىمدى قولداۋعا دايىن ەكەنىن جەتكىزدى.
يراك پرەزيدەنتى ابدەل لاتيف راشيد يزرايلدىڭ اگرەسسياسىن سىناپ، پالەستينالىقتاردى كۇشتەپ كوشىرۋگە دەگەن كەز كەلگەن ارەكەتكە جول بەرمەۋ كەرەكتىگىن ايتتى.
- ءبىزدىڭ قاۋىپسىزدىگىمىز بارىمىزگە ورتاق، ول بولىنبەيدى، - دەپ مالىمدەدى ول وڭىردە ۇجىمدىق قاۋىپسىزدىكتى نىعايتۋعا شاقىرا وتىرىپ.
سامميت باعداتتا 2012 -جىلدان بەرى العاش رەت ءوتىپ جاتىر.
جيىنعا ا م ل- نىڭ كوپشىلىگىنىڭ كوشباسشىلارى مەن وكىلدەرى قاتىسىپ جاتىر. ولاردىڭ اراسىندا قاتار ءامىرى شەيح تاميم بين حاماد ءال تاني، مىسىر پرەزيدەنتى ابدەل-فاتتاح اس-سيسي، پالەستينا باسشىسى ماحمۋد ابباس، سومالي باسشىسى حاسان شەيح ماحمۋد بار. يوردانيانىڭ اتىنان پرەمەر-مينيستر دجافار حاسسان كەلسە، ليۆاننان ۇكىمەت باسشىسى ناۆاف سالام وكىلدىك ەتىپ وتىر.
سامميتكە قۇرمەتى قوناق رەتىندە ب ۇ ۇ باس حاتشىسى انتونيۋ گۋتەرريش پەن يسپانيا پرەمەر-ءمينيسترى پەدرو سانچەس شاقىرىلعان.
يراك پرەمەر-ءمينيسترى مۋحاممەد شيا اس-سۋداني ءوزىنىڭ سوزىندە يزرايلدىڭ گازاداعى ارەكەتىن گەنوتسيد دەپ باعالاپ، قيراعان ەلدى قالپىنا كەلتىرۋ بويىنشا اراب قورىن قۇرۋعا شاقىردى.
يراك قورعا گازا مەن ليۆانعا كومەك رەتىندە 20 ميلليون دوللار قۇيۋعا دايىن ەكەنىن جەتكىزدى.
ب ۇ ۇ باس حاتشىسى انتونيۋ گۋتەرريش «پالەستينا حالقىن ۇجىمداسىپ جازالاۋدى ەشكىم دە اقتامايدى» دەي كەلە حالىقتى كۇشتەپ قونىستاندىرۋدىڭ كەز كەلگەن تۇرىنە قارسى ەكەنىن ءبىلدىردى.
مىسىر پرەزيدەنتى اس-سيسي يزرايلدى پالەستينالىقتاردى جويۋ ماقساتىمەن جۇيەلى تۇردە قىلمىس جاسادى دەپ ايىپتادى.
ول كايردىڭ قاتار مەن ا ق ش- تىڭ ارااعايىندىعىمەن تاراپتاردى تاتۋلاستىرۋعا كۇش سالىپ جاتقاندىعىن جانە گازانى قالپىنا كەلتىرۋ بويىنشا حالىقارالىق كونفەرەنسيا وتكىزۋدى جوسپارلاپ وتىرعانىن اتاپ ءوتتى.
پالەستينا پرەزيدەنتى ماحمۋد ابباس حاماس پەن وزگە توپتاردى قارۋ-جاراق پەن گازا سەكتورىنا باقىلاۋدا پالەستينا اكىمشىلىگىنە بەرۋگە شاقىردى.
سامميت قورىتىندىسى بويىنشا بەس شەشۋشى ارەكەت بويىنشا كۇن ءتارتىبى بەكىتىلدى. ولار: پالەستينا ماسەلەسى، يەمەن، سۋدان، سيريا مەن ليۆياداعى قاقتىعىستار جانە يران مەن ا ق ش اراسىنداعى يادرولىق كەلىسىم بويىنشا كەلىسسوزدەر.
قاتىسۋشىلار تاتۋلاستىرۋ مەن سوعىستان كەيىنگى قالپىنا كەلتىرۋگە كۇش سالۋعا دايىن ەكەندىكتەرىن راستادى.
ايتا كەتەيىك، وسىعان دەيىن يزرايل اسكەرلەرى حاماس- تى تالقانداپ، گازادا كەپىلدە قالعان ادامداردى بوساتۋ ءۇشىن اۋقىمدى شابۋىلدى باستاعانىن مالىمدەگەن بولاتىن.
