باعدات مۋسيننىڭ وتستاۆكاسى تۋرالى ۆيتسە-مينيستر پىكىر ءبىلدىردى

استانا. KAZINFORM - سيفرلىق دامۋ، يننوۆاتسيالار جانە ايەروعارىش ونەركاسىبى ۆيتسە-ءمينيسترى اسحات ورازبەك بۇرىنعى باسشىسى باعدات مۋسيننىڭ وتستاۆكاسى تۋرالى پىكىر ءبىلدىردى.

«كەشەگى باسشىڭىز باعدات مۋسيننىڭ قىزمەتتەن كەتۋ ءوز ەركىمەن بولدى ما، الدە ماجبۇرلەپ كەتىردى مە؟ مينيستر الەۋمەتتىك جەلىدە ءوز ەركىمەن كەتكەنىن ايتقانىمەن، وعان دەيىن ونى كەتىرگەنى تۋرالى جازبالار بولعان. وتستاۆكانىڭ سەبەبى نەدە دەپ ويلايسىز؟» - دەپ سۇرادى جۋرناليست سەنات وتىرىسىنان كەيىنگى بريفينگىدە.

ۆيتسە-مينيستر بۇل تۋرالى ناقتى اقپاراتتى بىلمەيتىنىن ايتتى.

«مەندە ول تۋرالى اقپارات جوق. ءوزى شەشىم قابىلدادى. بىزگە ەشتەڭە ايتقان جوق»، - دەدى اسحات ورازبەك.

ب ا ق وكىلدەرى باعدات مۋسيننىڭ قانداي باسشى بولعانىن سۇرادى.

«بۇل ايتارلىقتاي سۋبەكتيۆتى پىكىر بولادى عوي. بىرەۋگە قاتال بولعان شىعار جانە وندايدى جاقسى باسشى دەپ قابىلداۋى مۇمكىن. جەكە ماعان داۋىس كوتەرىپ ايعايلاپ كورگەن جوق. ارامىزدا جۇمىس بابى بويىنشا وتە جاقسى بايلانىس بولدى»، - دەدى اسحات ورازبەك.

سونداي- اق جۋرناليستەر باعدات مۋسيننىڭ اياق استىنان جۇمىستان كەتۋىنە قازاقستاندىقتاردىڭ جەكە دەرەكتەرىنىڭ قىتايعا بەرىلىپ كەتكەنى تۋرالى مالىمەتتەرمەن بايلانىسىن سۇرادى. ءبىراق ۆيتسە- مينيستر ول جايىندا ەشتەڭە بىلمەيتىنىن ايتتى.

اۆتور

ەسىمجان ناقتىباي