باعدارشامدا ءتورتىنشى ءتۇس پايدا بولا ما

استانا. KAZINFORM -بۇل جاڭاشىلدىق ازىرگە ىسكە قوسىلمايدى. جولداردا جۇرگىزۋشىسىز كولىكتەر سانى ارتقان كەزدە عانا جۇزەگە اسۋى مۇمكىن.

«New Atlas» اگەنتتىگىنىڭ حابارلاۋىنشا، سولتۇستىك كارولينا مەملەكەتتىك ۋنيۆەرسيتەتىنىڭ زەرتتەۋشىلەر توبى وزدىگىنەن جۇرەتىن كولىكتەردىڭ سانى ارتسا، باعدارشامعا ءتورتىنشى ءتۇستى قوسۋدى ۇسىنىپ وتىر. ولاردىڭ كومپيۋتەرلىك ۇلگىسى بويىنشا مۇنداي باعدارشام قيىلىستاردان ءوتۋدى جىلدامداتىپ، كولىكتەردىڭ دە، جاياۋ جۇرگىنشىلەردىڭ دە قاۋىپسىزدىگىن ارتتىرماق.

دەسە دە، مۇنداي جۇيەنى ناقتى جۇزەگە اسىرۋ ءالى الىس. بىرىنشىدەن، جولداردا جۇرگىزۋشىسىز كولىكتەر كوپ بولۋى كەرەك. قازىر مۇنداي كولىكتەرگە الەمنىڭ بىرنەشە ەلىندە عانا رۇقسات ەتىلگەن. ەكىنشىدەن، باعدارشامداردى جاياۋ جۇرگىنشىلەرگە تۇسىنىكتى جانە وقۋعا ىڭعايلى ەتىپ وزگەرتۋ قاجەت.

عالىمدار بۇل تۇجىرىمدامانى تەك كومپيۋتەرلىك مودەلدە ەمەس، پراكتيكالىق تۇردە تاجىريبە جاساۋعا مۇمكىندىك بەرەتىن فيزيكالىق سىناق الاڭىن سالۋدا.

اۆتور

ورالحان قوجانوۆ