باعاناشىلداعى بالالار ۇيىندە قازىر جاعداي قالاي
الماتى. KAZINFORM - الماتىدا ورنالاسقان وبلىستىق بالالار ءۇيىنىڭ تاربيەلەنۋشىلەرى قونايەۆ قالاسىنا كوشۋگە نارازىلىق ءبىلدىردى.
پرەزيدەنت كەڭەسشىسى - باسپا ءسوز حاتشىسى رۋسلان جەلدىباي پرەزيدەنت تاپسىرماسىمەن «باعاناشىل» بالالار ءۇيى الماتىدان قونايەۆقا كوشىرىلمەيتىنىن مالىمدەدى.
بالالار ءۇيىنىڭ تاربيەلەنۋشىسى كيريل كاپرانوۆ الەۋمەتتىك جەلىدە بەينەجازباسى كەڭىنەن تاراعان جانجالدىڭ قالاي باستالعانىن ءتۇسىندىردى.- تاڭەرتەڭ بالالاردى الىپ كەتۋگە 3 اۆتوبۋس كەلدى. ءبىز ولاردىڭ كىرگەنىنە قارسى بولدىق. ءبىراق كامەلەتكە تولماعانداردى بەيىمدەۋ ورتالىعىندا ۋاقىتشا تۇرىپ جاتقان 3-18 جاسقا دەيىنگى بالالاردى الىپ كەتەتىن بولىپ ەكى اۆتوبۋس كىردى. بىرىنە ۇلدار، بىرىنە قىزدار كىردى. سول كەزدە وسىندا پوليتسيا دا كەلدى. ءبىز قالعىسى كەلەتىن بالالار بولسا، ويلانسىن دەپ اۆتوبۋستى جارتى ساعات جىبەرمەدىك. سول كەزدە پوليتسيا قىزمەتكەرلەرى ءبىزدى يتەرە باستادى، - دەدى ول.
ونىڭ ايتۋىنشا، قونايەۆ قالاسىنا بارۋعا باس تارتىپ، 4 قىز اۆتوبۋستان شىققان. سودان كەيىن اۆتوبۋستار بالالار ءۇيىنىڭ اۋماعىنان شىعىپ، ەكىارا كيكىلجىڭ توقتاعان.
كيريل كاپرانوۆ بالالار ءۇيىنىڭ تاربيەلەنۋشىلەرى پرەزيدەنت تاپسىرماسىن قۋانا قابىلداعانىن اتاپ ءوتتى.
- مەن وسىندا قالعان بالالاردىڭ ءبارىن جيناپ، پرەزيدەنتتىڭ تاپسىرماسىن وقىپ بەردىم. بالالار ونى ەستىگەندە قۋاندى، ءتىپتى كوزىنە جاس العاندار دا بار. مەنىڭ مۇندا تۇرىپ جاتقانىما 2 جىل بولدى. سول ۋاقىتتىڭ ىشىندە بۇل جەر مەنىڭ ۇيىمە اينالىپ كەتتى. ءبىزدىڭ تىلەگىمىز مەملەكەت باسشىسىنا جەتكەنىنە قۋانىشتىمىز. قازىر ءبارى ءوز بولمەسىندە، كۇندەلىكتى شارۋالارىمەن اينالىسىپ جاتىر، - دەدى 15 جاستاعى تاربيەلەنۋشى.
مەكەمە تاربيەشىسى اسەل جۋاسپايەۆانىڭ ايتۋىنشا، پەداگوگتارعا 11-تامىزعا دەيىن جاڭا جۇمىس ورنىنا كوشۋگە قانشالىقتى دايىن ەكەندەرىن شەشۋگە ۋاقىت بەرىلگەن.
- جاڭا عيماراتتا بولعان جوقپىز، تەك الەۋمەتتىك جەلىدەن كوردىك. بالالاردى قالاي تاسىمالدايدى، مۇعالىمدەر قالاي كوشەتىنى تۋرالى رەسمي اقپارات بولعان جوق. بىزگە تەك 11- تامىزعا دەيىن ول جەرگە جۇمىسقا بارامىز با، جوق پا دەگەن سۇراققا جاۋاپ بەرۋ كەرەك ەكەنىن حابارلادى، - دەيدى ول.
سونىمەن قاتار اسەل جۋاسپايەۆا قازىرگى بالالار ءۇيى جاڭا بولماسا دا، اپاتتىق جاعدايدا دەپ ويلامايدى.
- كوشىرۋدىڭ سەبەبى عيماراتتىڭ اپاتتىق جاعدايى دەپ اتالدى. ءيا، مەن مۇندا جۇمىس ىستەگەن بارلىق 13 جىل ىشىندە كۇردەلى جوندەۋ جاسالعان جوق. دەگەنمەن، ءبىز جىل سايىن قولىمىزدان كەلگەنشە جوندەۋ جۇمىستارىن جۇرگىزەمىز. عيمارات كۇردەلى جوندەۋدى قاجەت ەتەدى، ءبىراق عيمارات بەرىك، بارلىق ستاندارت بويىنشا سالىنعان. مۇندا ءتىپتى جەر سىلكىنىسى ونشا سەزىلمەدى. قانداي دا ءبىر قورىتىندى بەرۋ ءۇشىن ساراپشى ەمەسپىن، بۇل - مەنىڭ جەكە پىكىرىم، - دەدى ول.
قازىر تاربيەلەۋشىلەر جانە ەرەسەك تاربيەلەنۋشىلەردىڭ ءبىر توبى قونايەۆ قالاسىنا كەتكەن بالالاردىڭ قايتىپ كەلگەنىن كۇتىپ ءجۇر.
ەسكە سالايىق، بيىل ناۋرىز ايىندا الماتى وبلىسىنىڭ № 1 بالالار ءۇيىنىڭ تاربيەلەنۋشىلەرى عيماراتتىڭ الماتىدان قونايەۆقا كوشىرىلەتىنىنە نارازى بولدى.
كەيىن № 1 بالالار ءۇيىنىڭ تاربيەلەنۋشىلەرى الماتىدا قالاتىن بولدى.
الايدا الماتى وبلىسى اكىمىنىڭ 2025 -جىلعى 9 -شىلدەدەگى قاۋلىسى جانە ءبىلىم باسقارماسىنىڭ 10- شىلدەدەگى بۇيرىعى نەگىزىندە تاربيەلەنۋشىلەردى كەزەڭ- كەزەڭىمەن قونايەۆ قالاسىنداعى جاڭا زاماناۋي بالالار ۇيىنە كوشىرۋ جۇمىستارى باستالدى.
ايتا كەتەلىك دينارا زاكيەۆا الماتىلىق بالالاردى كوشىرۋگە قاتىستى پىكىر بىلدىرگەن ەدى.
اۆتور
دوسبول اتاجان
