باعا ءوسىپ، ساياحات ازايدى: تۇركيادا تۋريستەر لەگى ازايىپ كەلەدى
استانا. KAZINFORM - تۇركيادا قوناق ۇيلەردىڭ جۇكتەمەسى تومەندەپ، تۋريستەر سانى ازايىپ جاتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
Ekonomim گازەتى تۋريزم سالاسىنداعى دەرەكتەر مەن ساراپشىلاردىڭ باعالاۋىنا سۇيەنە وتىرىپ حابارلاعانداي، تۇركياداعى جازعى تۋريستىك ماۋسىم الاڭداتىپ وتىر. نارىقتاعىلاردىڭ ءۇمىتى اقتالماي وتىر، ال نەگىزگى كورسەتكىشتەر تومەندەپ بارادى.
اتاپ ايتقاندا، تۋريستەردىڭ ورتاشا تۇرۋ ۇزاقتىعى بىلتىرعى وسىنداي كەزەڭمەن سالىستىرعاندا 10 پايىزعا قىسقارعان، ال قوناق ۇيلەردىڭ جۇكتەمەسى 5 پايىزعا ازايعان. اۋقىمدى جەڭىلدىكتەر مەن اكسيالار دا نارىقتى جانداندىرا المادى: بيىل مامىردا تۇركياعا كەلگەن شەتەلدىك تۋريستەردىڭ سانى 1,8 پايىزعا تومەندەگەن.
تۋريزمنىڭ باسەڭدەۋىنە سەبەپ - ءبىرقاتار فاكتوردىڭ جيىنتىعى. ولاردىڭ ىشىندە: باعانىڭ ەداۋىر ءوسۋى، جيىلەگەن ورمان ءورتى، باسقا تۋريستىك باعىتتار تاراپىنان كۇشەيگەن باسەكە، سونداي-اق ءبىرقاتار وڭىردەگى گەوساياسي تۇراقسىزدىق بار. سونىمەن قاتار، تۋريستەر شىعىندارىن ۇنەمدەي باستاعان جانە قىسقا مەرزىمدى ساپارعا كوبىرەك باسىمدىق بەرىپ وتىر.
سالا ساراپشىلارى ەگەر تۋريزمدى دامىتۋدا جاڭا ستراتەگيا ازىرلەنبەسە، تۇركيا 2026-جىلعا قاراي باسەكەلەستىك ارتىقشىلىعىنان ايىرىلۋى مۇمكىن دەپ ەسكەرتىپ وتىر. بۇل اسىرەسە تۋريستىك سەكتور ەكونوميكانىڭ ماڭىزدى بولىگى بولىپ سانالاتىن انتاليا، بودرۋم جانە مارماريس سىندى ءداستۇرلى تانىمال باعىتتارعا كەرى اسەر ەتۋى ىقتيمال.
ساراپشىلار تۋريستىك ءونىمدى قايتا قاراستىرىپ، قىزمەت ساپاسىن ارتتىرۋ، ساۋىقتىرۋ، ەكولوگيالىق جانە مادەني تۋريزم سەكىلدى جاڭا باعىتتاردى دامىتۋ، سونداي-اق تۇركيانى حالىقارالىق ارەنادا بەلسەندى تۇردە ىلگەرىلەتۋ قاجەتتىگىن العا تارتادى.
مامانداردىڭ ايتۋىنشا، جەدەل ارەكەت ەتپەگەن جاعدايدا تۇركيا جەرورتا تەڭىزى نارىعىنداعى جەتەكشى ورنىن جوعالتىپ، بۇل ەل ەكونوميكاسى مەن جۇمىسپەن قامتۋ سالاسىنا ۇزاق مەرزىمدى تەرىس سالدارىن تيگىزۋى مۇمكىن.
بۇعان دەيىن ءبىز تۇركيا ەكونوميكاسىنىڭ تۋريزم مەن ترانزيت سالالارىندا وڭ ناتيجە كورسەتىپ وتىرعانىن جازعان ەدىك. سونىمەن قاتار، تۇركيا مەديتسينالىق تۋريزم باعىتى بويىنشا دا ءوز پوزيتسياسىن نىعايتىپ كەلەدى.
