ب ق و- دا كيىك باتىپ ولگەن وزەن سۋى ىشۋگە جارامدى ما
ورال. KAZINFORM - باتىس قازاقستان وبلىسى كازتالوۆ اۋدانى اۋماعىندا سارىوزەننەن كيىك ولەكسەلەرى شىعارىلعان ەدى.
وسىعان وراي Kazinform ءتىلشىسى ب ق و سانيتاريالىق-ەپيدەميولوگيالىق باقىلاۋ دەپارتامەنتىنە ساۋال جولدادى.
دەپارتامەنتتەن تۇسكەن مالىمەتكە قاراعاندا، اتالمىش وقيعا ورىن العاننان كەيىن جەرگىلىكتى سانيتاريالىق- ەپيدەميولوگيالىق باقىلاۋ باسقارماسى ماماندارى اسا قاۋىپتى اۋرۋلار، ۆيرۋسولوگيالىق جانە راديولوگيالىق كورسەتكىشتەرگە قاتىستى سارىوزەننەن زەرتتەۋگە سۋ سىناماسىن دەرەۋ العان.
- زەرتحانالىق زەرتتەۋ ناتيجەسى بويىنشا سايكەسسىزدىك اڭىقتالمادى. قازىرگى كەزدە تۇرعىندار اراسىندا ىشەك اۋرۋلارى، اسا قاۋىپتى ينفەكتسيالاردىڭ الدىن الۋ بويىنشا سانيتارلىق- اعارتۋ جۇمىستارى ءجۇرىپ جاتىر، - دەپ حابارلادى ۆەدومستۆودان.
كازتالوۆ اۋدانى اكىمدىگىنەن ءمالىم ەتكەندەي، بۇگىنگى تاڭدا بوستاندىق (ادام سانى — 1369)، قاراكول (142)، كوكتەرەك (921)، جۇلدىز (587) جانە قونىس (313) ەلدى مەكەندەرىنىڭ حالقى سارىوزەننەن سۋ الىپ وتىر.
- بيىلعى 30-مامىردا كيىكتەردىڭ سۋعا كەتكەنى جونىندە مالىمەت تىركەلدى. وسىعان وراي تۇرعىندار پايدالانىپ وتىرعان وزەننىڭ لاستانۋىنا جول بەرمەۋ، سۋدىڭ ساپاسىن قالپىنا كەلتىرۋ ماقساتىندا ارنايى سانيتارلىق نورمالارعا ساي تازارتۋ دەزينفەكتسيا جۇمىستارى جۇرگىزىلدى، - دەلىنگەن اۋدان اكىمدىگىنەن كەلگەن جاۋاپتا.
ەسكە سالا كەتەيىك، بۇدان بۇرىن باتىس قازاقستاندا سۋعا باتقان 560 تان استام كيىك ولەكسەسى جويىلعانىن جازعان بولاتىنبىز.
كەيىن وزەننەن 300 دەن استام كيىك ولەكسەسى شىعارىلدى.
