ب ۇ ۇ: نيگەريادا 600 مىڭنان استام بالا اشتىقتان ءولىپ كەتۋى مۇمكىن
استانا. KAZINFORM - نيگەريانىڭ سولتۇستىك-شىعىسىنداعى تەرروريستەر بەلسەندى ارەكەت ەتىپ جۇرگەن بورنو، اداماۆا جانە يوبە شتاتتارىندا گۋمانيتارلىق داعدارىس ۇدەي ءتۇستى، دەپ حابارلايدى انادولى.
بىرىككەن ۇلتتار ۇيىمى نيگەريانىڭ سولتۇستىك-شىعىسىنداعى تەرروريستەر بەلسەندى ارەكەت ەتەتىن شتاتتاردا 600 مىڭنان استام بالانىڭ اشتىق قاۋپىنە ۇشىراعانىن جانە الداعى 6 ايدا ازىق- تۇلىككە شۇعىل قول جەتكىزە الماسا، ولاردىڭ ءولىپ كەتۋى مۇمكىن ەكەنىن حابارلادى.
نيگەريا ۇكىمەتى مەن ب ۇ ۇ وكىلدەرىنىڭ بىرلەسكەن مالىمدەمەسىندە سولتۇستىك- شىعىستاعى بورنو، اداماۆا جانە يوبە (BAY) شتاتتارىندا تەرروريستەردىڭ ارەكەتتەرىنە بايلانىستى گۋمانيتارلىق داعدارىستىڭ ۋشىعىپ كەتكەنى ايتىلعان.
وسى اقپاراتقا سايكەس، ماۋسىم ايىندا باستالاتىن قۇرعاق ماۋسىمدا بورنو، اداماۆا جانە يوبە شتاتتارىندا 4,6 ميلليون ادام ازىق-تۇلىكتىڭ جەدەل تاپشىلىعىن باستان كەشەدى، ءوز كەزەگىندە بۇل التىنشى جىل قاتارىنان ايماقتاعى اۋىر گۋمانيتارلىق جاعدايدى تۋىنداتادى.
سونىمەن قاتار، نيگەريانىڭ گۋمانيتارلىق ماسەلەلەر جانە كەدەيلىكپەن كۇرەس ءمينيسترى نەنتاۆە گوشۆە ييلۆاتدا مەن ب ۇ ۇ- نىڭ نيگەرياداعى گۋمانيتارلىق ماسەلەلەر جانە رەزيدەنتتەر ىستەرى جونىندەگى ۇيلەستىرۋشىسى موحامەد فولل ابۋدجا استاناسىندا وتكەن شارادا «نيگەرياعا ارنالعان 2025 -جىلعى قۇرعاق ماۋسىمعا قارسى ارەكەت جوسپارىن» تانىستىردى.
شارادا سويلەگەن سوزىندە مينيستر ييلۆاتدا الداعى ۋاقىتتا بورنو، اداماۆا نەمەسە يوبە شتاتتارىندا ەشبىر بالانىڭ اش جاتپايتىنىنا ۋادە ەتتى.
- بۇل جوسپار تەك قۇرىلىمدار مەن ستراتەگيالار تۋرالى ەمەس. بۇل بورنو، اداماۆا نەمەسە يوبە شتاتتارىندا ەشبىر بالانىڭ اش جاتپاۋى، ەشبىر انانىڭ ەمدەلەتىن اۋرۋدان بالاسىن جوعالتپاۋى جانە قاقتىعىس پەن كەدەيلىكتىڭ سالدارىنان ادامدىق قادىر-قاسيەت زارداپ شەكپەۋى تۋرالى ۋادە، - دەدى ول.
ب ۇ ۇ ۇيلەستىرۋشىسى فولل بۇل ماسەلەگە بايلانىستى پىكىر ءبىلدىرىپ، حالىقارالىق ۇيىمداردى قولداۋ كورسەتۋگە شاقىردى.
- گۋمانيتارلىق كومەككە قاۋىپ ءتونىپ تۇر. ىنتىماقتاستىق السىرەپ بارادى، ال رەسۋرستاردىڭ جەتىسپەۋشىلىگى ميلليونداعان ادامداردى، اسىرەسە بالالاردى، قاۋىپكە ۇشىراتىپ جاتىر، - دەپ اتاپ ءوتتى فولل.
وسىعان دەيىن نيگەريا ازىق- تۇلىك قاۋىپسىزدىگىنە تونگەن قاتەرگە بايلانىستى توتەنشە جاعداي جاريالانعانى بەلگىلى بولدى.
