ب ۇ ۇ بىتىمگەرلىك ميسسيالارىنا قاتىسۋ قازاقستاننىڭ الەمدىك ارەناداعى ءرولىن ارتتىرادى - سەناتور

Алишер Сатвалдиев
Фото: senate.parlam.kz

استانا. KAZINFORM - سەنات دەپۋتاتى اليشەر ساتۆالديەۆ مەملەكەت باسشىسىنىڭ ب ۇ ۇ ميسسيالارىنا قاتىسۋ ءۇشىن قارۋلى كۇشتەردىڭ بىتىمگەرلىك كونتينگەنتىن جىبەرۋ تۋرالى ۇسىنىسىنا قولداۋ ءبىلدىردى.

«مەملەكەت باسشىسىنىڭ ب ۇ ۇ ميسسيالارىنا قاتىسۋ ءۇشىن قارۋلى كۇشتەردىڭ بىتىمگەر كونتينگەنتىن جىبەرۋ تۋرالى ۇسىنىسىن قولدايمىن. بۇل قادام ەلىمىزدىڭ حالىقارالىق مىندەتتەمەلەرىن تۇراقتى ورىنداي وتىرىپ، ب ۇ ۇ- نىڭ تولىققاندى مۇشەسى رەتىندە قازاقستاننىڭ الەمدىك ارەناداعى ءرولىن ارتتىرۋعا ىقپال ەتەدى دەپ ويلايمىن»، - دەدى ا. ساتۆالديەۆ.

سەناتور ەلىمىز الەمدىك قاۋىمداستىقتىڭ جاۋاپتى مۇشەسى رەتىندە 2000 -جىلدان بەرى ب ۇ ۇ اياسىنداعى بىتىمگەرلىك وپەراتسيالارعا قاتىسىپ، الەمدەگى قاقتىعىس ايماقتارىندا قاۋىپسىزدىك پەن تۇراقتىلىقتى قامتاماسىز ەتۋگە ۇلەس قوسىپ كەلە جاتقانىن اتاپ ءوتتى.

«سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ مۇشەلەرى بىلتىرعى جەلتوقسان ايىندا بىتىمگەرشىلىك وپەراتسيالار ورتالىعىنىڭ قىزمەتىمەن تانىستى. «بىتىمگەر» وقۋ-جاتتىعۋ ورتالىعىنا بارعان كەزدە، ۇلتتىق كونتينگەنتتى ب ۇ ۇ بىتىمگەرشىلىك ميسسيالارىنا قاتىسۋعا دايىنداۋ ەرەكشەلىكتەرىمەن تانىسىپ، اسكەري قىزمەتكەرلەردىڭ قارۋ-جاراقپەن، اسكەري تەحنيكامەن جانە مۇلىكپەن جابدىقتالۋىن قاراپ شىقتىق. بۇل رەتتە، ءبىزدىڭ بىتىمگەرلەر الداعى ۋاقىتتا دا قازاقستان اتىنان ءوز مىندەتىن ابىرويمەن اتقارۋعا دايىن ەكەنىنە سەنىمدىمىن»، - دەدى اليشەر ساتىۆالديەۆ.

ونىڭ ايتۋىنشا، ءبىزدىڭ كونتينگەنتتىڭ ميسسياعا قاتىسۋى ەلىمىزدىڭ قارۋلى كۇشتەرىنە زور تاجىريبە جيناقتاۋعا مۇمكىندىك بەرەدى.

«ءبىزدىڭ بىتىمگەرلەر قاقتىعىستاردى توقتاتۋدا جانە حالىقارالىق قاتىناستاردا جاڭا تاجىريبەنى مەڭگەرىپ قانا قويمايدى، سونىمەن قاتار باسقا دا ەلدەردىڭ اسكەرلەرىنىڭ جاۋىنگەرلىك ءىس-قيمىلدارىنىڭ ەرەكشەلىكتەرىمەن جانە ولاردىڭ قارۋ- جاراقتارىمەن تانىسادى»، - دەدى دەپۋتات.

اۆتور

رۋسلان عابباسوۆ

سوڭعى جاڭالىقتار