ب ۇ ۇ باس حاتشىسى: تاياۋ شىعىستاعى جاعداي توزگىسىز جانە ساعات ساناپ ناشارلاپ بارادى

نيۋ-يورك. KAZINFORM - ب ۇ ۇ باس حاتشىسى انتونيۋ گۋتەرريش تاياۋ شىعىستاعى جاعدايعا قاتىستى ءوز باعاسىن بەردى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

ەكى مەملەكەت قاعيداسىن ىسكە اسىرۋعا ارنالعان كونفەرەنتسيادا سويلەگەن سوزىندە انتونيۋ گۋتەرريش پالەستينا- يزرايل قاقتىعىسىنىڭ ونداعان جىلدار بويى جالعاسىپ كەلە جاتقانىن اتاپ ءوتتى. ونىڭ ايتۋىنشا، ديالوگ قايتا- قايتا ءۇزىلىپ، بۇۇ قارارلارى ورىندالماي، حالىقارالىق قۇقىق بۇزىلىپ، ديپلوماتيالىق كۇش-جىگەر ناتيجەسىز قالعان.

- قاقتىعىس جالعاسىپ كەلەدى، شەشىمدەر ۇسىنىلعانىمەن، حالىقارالىق قۇقىق بۇزىلدى، ونداعان جىل بويى جاسالعان ديپلوماتيا ناتيجە بەرمەدى، - دەپ اتاپ ءوتتى باس حاتشى.

گۋتەرريش ەكى مەملەكەت فورمۋلاسى - بەيبىتشىلىككە قول جەتكىزۋدىڭ جالعىز ومىرشەڭ جولى ەكەنىن تاعى دا راستادى. ول وككۋپاتسيالانعان باتىس جاعالاۋداعى جاعداي مەن قونىستار سالۋدىڭ جالعاسۋىن ەشنارسە اقتاي المايتىنىن ەرەكشە اتاپ ءوتتى.

- جاعداي توزگىسىز، ءارى ساعات سايىن ناشارلاپ بارادى، - دەپ اتاپ وتكەن ب ۇ ۇ باسشىسى تاعى دا اتىستى دەرەۋ توقتاتۋعا شاقىردى.

سونداي-اق، ول پالەستينالىق دەلەگاتسيانىڭ سامميتكە تولىق قۇرامدا قاتىسا الماعانىنا وكىنىش ءبىلدىردى. باق مالىمەتىنشە، ا ق ش پالەستينالىق دەلەگاتسيا مۇشەلەرىنە ۆيزا بەرۋدەن باس تارتقان. سونىڭ سالدارىنان پالەستينا پرەزيدەنتى ماحمۋد ابباس سامميتكە ونلاين رەجيمدە قاتىسۋعا ءماجبۇر بولدى.

گۋتەرريشتىڭ بۇل مالىمدەمەسى فرانسيا مەن ساۋد ارابياسى ۇيىمداستىرعان نيۋ-يوركتەگى سامميتتە ايتىلدى. سامميتتىڭ ماقساتى - ەكى مەملەكەت يدەياسىن ىلگەرىلەتۋ جانە پالەستينانى رەسمي تۇردە مويىنداۋ.

وسىعان دەيىن ۇلى بريتانيا، كانادا، اۋستراليا جانە پورتۋگاليا پالەستينا مەملەكەتىن مويىندايتىنىن جاريالاعان. سامميتتىڭ اشىلۋىندا فرانسيا پرەزيدەنتى دە وسىنداي شەشىم قابىلداعانىن حابارلادى. بەلگيا مەن ليۋكسەمبۋرگتى قوسا العاندا تاعى بىرنەشە ەل وسىنداي قادامعا دايىندالىپ جاتىر.

«ەكى مەملەكەت شەشىمى»، ياعني «ەكى حالىققا - ەكى مەملەكەت» قاعيداسى - تاۋەلسىز پالەستينا مەملەكەتىنىڭ يزرايلمەن قاتار ءومىر ءسۇرۋىن جانە شەكارالاردىڭ ءقاۋىپسىز ءارى ءوزارا مويىندالۋىن كوزدەيدى. بۇل قاعيدا حالىقارالىق قاۋىمداستىق تاراپىنان ونداعان جىلدار بويى بەيبىت رەتتەۋدىڭ نەگىزى رەتىندە قاراستىرىلىپ كەلەدى. الايدا ونى جۇزەگە اسىرۋ پروتسەسى ساياسي جانە اسكەري كەدەرگىلەرگە تاپ بولىپ كەلەدى.