ب ا ق-تا سالتانات نۇكەنوۆانىڭ ءمايىتىنىڭ سۋرەتىن جاريالاۋعا تىيىم سالىندى

Қуандық Бишимбаев
Фото: Астана қаласы Қылмыстық істер жөніндегі мамандандырылған ауданаралық соты

استانا. KAZINFORM - بيشىمبايەۆتىڭ سوتى تىكەلەي ەفيردەن بەرىلىپ جاتقانى بەلگىلى. بۇل رەتتە، قازاقستاندىقتار اتى شۋلى سوت پروتسەسىندەگى اقپاراتتارمەن تانىسۋعا مۇمكىندىك الادى.

دەسە دە، مارقۇم سالتاناتتىڭ اعاسى ايتبەك امانگەلدى ءمايىت سۋرەتتەرىن ەفيرگە شىعارۋعا جانە جاريالاۋعا تىيىم سالۋدى سۇرادى. سۋديا ايجان قۇلبايەۆا بۇل ءوتىنىشتى قاناعاتتاندىردى.

«مەن بەلگىلى ءبىر ساتتەردى ەفيرگە شىعارماۋدى جانە ب ا ق وكىلدەرىنەن بۇل بەينەلەردى كورسەتپەۋدى سۇرايمىن. ولاردى كورۋ وتە اۋىر. تىكەلەي ەفيردى ەرەسەكتەر عانا ەمەس، بالالار دا كورىپ وتىرۋى مۇمكىن. بۇل بالالارعا اۋىر زيان كەلتىرەدى دەپ ويلايمىن»، - دەدى ايتبەك امانگەلدى.

بيشىمبايەۆ بۇعان قارسىلىق ءبىلدىردى.

«ال مەن كورسەتىلۋىن قالايمىن. ويتكەنى ونىڭ دەنە جاراقاتتارى تۋرالى عالامتوردا كوپتەگەن بولجامدار ايتىلدى. مەن القا بيلەردىڭ، جۇرتشىلىقتىڭ ايتىلعانداردىڭ شىندىققا جاناسپايتىنىنا كوز جەتكىزگەنىن قالايمىن»، - دەدى بيشىمبايەۆ.

سۋديا ايجان قۇلبايەۆا جابىرلەنۋشىنىڭ ءوتىنىشىن قاناعاتتاندىرۋ تۋرالى شەشىم قابىلدادى.

«ماتەريالدار القا بيلەر القاسىنا كورسەتىلەدى، ب ا ق وكىلدەرىنە تۇسىرۋگە رۇقسات جوق»، - دەدى سۋديا.

ەسكە سالساق، 2023 -جىلى 9-قاراشادا استاناداعى «Bau» مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ءوزىنىڭ جۇبايىن سوققىعا جىقتى. ايەل جەدەل جاردەم جەتكەنشە كوز جۇمدى. مۇنان سوڭ ىشكى ىستەر مينيسترلىگى قۋاندىق بيشىمبايەۆتىڭ ۇستالعانىن راستادى.

وتكەن جىلى 15-قاراشادا وتكەن كەڭەستە مەملەكەت باسشىسى قاسىم-جومارت توقايەۆ ىشكى ىستەر مينيسترىنە ق. بيشىمبايەۆتىڭ ءىسىن ەرەكشە باقىلاۋعا الۋدى تاپسىردى. بيىل 11-قاڭتاردا ەلوردا سوتى قۋاندىق بيشىمبايەۆتى كۇزەتپەن ۇستاۋ مەرزىمىن 2 ايعا ۇزارتقان ەدى، 26-اقپاندا قۋاندىق بيشىمبايەۆتىڭ ءىسى سوتقا ءتۇستى.

1-ناۋرىزدا قۋاندىق بيشىمبايەۆتىڭ ءىسى بويىنشا الدىن الا تىڭداۋ كۇنى بەلگىلەندى. 11-ناۋرىز كۇنى استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ءىس بويىنشا الدىن الا تىڭداۋ ءوتتى. الدىن الا تىڭداۋ 12-ناۋرىزدا جالعاستى.

27-ناۋرىزدا ەلوردانىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ق. بيشىمبايەۆتىڭ ءىسى بويىنشا القابيلەردى ىرىكتەۋ ءوتتى. 29-ناۋرىزداعى سوت وتىرىسىندا مارقۇم سالتانات نۇكەنوۆانىڭ اعاسى ايتبەك امانگەلدى كۋاگەر رەتىندە جاۋاپ بەرىپ، قۋاندىق بيشىمبايەۆ پەن سالتانات نۇكەنوۆانىڭ اراسىنداعى العاشقى ۇرىس- كەرىستەر قالاي باستالعانى تۋرالى مالىمەتتەر ايتتى جانە مارقۇمنىڭ بەت- الپەتى كوگەرگەن سۋرەت كورسەتتى.

1-ساۋىردەگى سوت وتىرىسىندا ايىپتالۋشى قۋاندىق بيشىمبايەۆ مارقۇم س. نۇكەنوۆانىڭ تۋىستارىنان كەشىرىم سۇرادى.

سونداي-اق سوت ەكس-مينيستر قۋاندىق بيشىمبايەۆتىڭ ىسىندەگى تاراپتارعا الەۋمەتتىك جەلىدە پىكىر بىلدىرۋگە تىيىم سالدى.

سوڭعى جاڭالىقتار