ب ا ءا 100 ميلليون مانگر اعاشىن وتىرعىزباق
استانا. KAZINFORM - بىرىككەن اراب امىرلىكتەرى 2030 -جىلعا دەيىن 100 ميلليون مانگر اعاشىن وتىرعىزۋ بويىنشا اۋقىمدى ەكولوگيالىق باستاما قولعا الدى. بۇل تۋرالى ەلدىڭ كليماتتىڭ وزگەرۋى جانە قورشاعان ورتا ماسەلەلەرى جونىندەگى مينيسترلىگى حابارلادى، دەپ جازدى ازەرتادج.
شەتەلدىك ب ا ق -تا تاراعان دەرەككوزگە ساي، جوبا حالىقارالىق مانگر ەكوجۇيەلەرىن قورعاۋ كۇنىنە ورايلاستىرىلعان. ونىڭ باستى ماقساتى — جاعالاۋ ايماقتارىنىڭ كليماتتىڭ وزگەرۋىنە توزىمدىلىگىن ارتتىرۋ جانە تەڭىز فلوراسى مەن فاۋناسى ءۇشىن قولايلى ورتا قالىپتاستىرۋ.
ينيتسياتيۆا اياسىندا قازىرگى تاڭدا 30 ميلليوننان استام اعاش وتىرعىزىلعان، ولاردىڭ ءبىر بولىگى درونداردىڭ كومەگىمەن وتىرعىزىلعان. بەلگىلى بولعانداي، مانگر اعاشتارى تەڭىز دەڭگەيىنىڭ كوتەرىلۋى مەن جاھاندىق جىلىنۋدىڭ سالدارىنان تابيعي قورعانىس قابىرعاسى قىزمەتىن اتقارادى.
سونىمەن قاتار، مانگر اعاشتارى كومىرقىشقىل گازىن ءسىڭىرۋ قابىلەتىمەن ەرەكشەلەنەدى، ءتىپتى بۇل كورسەتكىش تروپيكالىق ورماندارعا قاراعاندا ءتورت ەسە جوعارى. ولار كوپتەگەن تەڭىز ورگانيزمدەرىنىڭ تىرشىلىك ەتۋ ورتاسى بولىپ سانالادى جانە ەكولوگيالىق تەپە- تەڭدىكتى ساقتاۋدا ماڭىزدى ءرول اتقارادى.
حالىقارالىق دەڭگەيدە ب ا ءا Mangrove Alliance for Climate (MAC) باستاماسىن ىلگەرىلەتۋدە. بۇل باستاماعا 45 ەل مەن ۇيىم مۇشە. سونىمەن قاتار، امىرلىكتەر يندونەزياداعى مۇحاممەد بەن زاەد پەن دجوكو ۆيدودو اتىنداعى حالىقارالىق مانگر زەرتتەۋ ورتالىعىن قارجىلاندىرادى.
بيىل قازان ايىندا ابۋ- دابيدە تابيعاتتى قورعاۋ جونىندەگى حالىقارالىق وداقتىڭ (IUCN) قولداۋىمەن دۇنيەجۇزىلىك تابيعاتتى قورعاۋ كونگرەسى وتەدى. كونگرەسس جۇمىسىنىڭ نەگىزگى باعىتى — مانگر ەكوجۇيەلەرىن ساقتاۋ بولماق.
ەسكە سالا كەتەيىك، ب ا ءا- دە اۋا تەمپەراتۋراسى مامىر ايىنداعى رەكوردتىق دەڭگەيگە جەتكەنىن جازعان ەدىك.
