ازياداعى ەڭ ۇزدىك ۋنيۆەرسيتەتتەردىڭ ءبىرى الماتىدا ءوز فيليالىن اشتى

استانا. KAZINFORM - بۇگىن ساتبايەۆ ۋنيۆەرسيتەتى بازاسىندا CityU زەرتتەۋ جانە يننوۆاتسيالار ينستيتۋتىنىڭ رەسمي اشىلۋ سالتاناتى ءوتتى. بۇل تۋرالى عىلىم جانە جوعارى ءبىلىم مينيسترلىگى مالىمدەدى.

بۇل - قازاقستاندا اشىلعان العاشقى عىلىمي-ءبىلىم بەرۋ ينستيتۋتى. ول مەملەكەت باسشىسى قاسىم-جومارت توقايەۆتىڭ تاپسىرماسىن جۇزەگە اسىرۋ اياسىندا گونكونگتىڭ CityU (City University of Hong Kong) ۋنيۆەرسيتەتىمەن بىرلەسىپ قۇرىلىپ وتىر.

جاڭا ينستيتۋت الەمدىك دەڭگەيدەگى كادرلاردى دايارلاۋ مەن ترانسشەكارالىق عىلىمي ارىپتەستىك ءۇشىن تاماشا الاڭعا اينالادى. بۇل - CityU- دىڭ قىتايدان تىس جەردە اشىلعان العاشقى فيليالى ءارى قىتاي ءۇشىن دە، قازاقستان ءۇشىن دە ماڭىزدى تاريحي كەزەڭنىڭ باستاماسى. قازاقستاندىق 100 ستۋدەنت الەمنىڭ ەڭ ۇزدىك ۋنيۆەرسيتەتتەرىنىڭ بىرىندە وقۋىن باستادى.

- شەتەلدىك ۋنيۆەرسيتەت فيليالىنىڭ ساتبايەۆ ۋنيۆەرسيتەتىندە اشىلۋى - ق ر عىلىم جانە جوعارى ءبىلىم مينيسترلىگىنىڭ قازاقستاندا ءبىلىم مەن عىلىم ساپاسىن ارتتىرۋعا باعىتتالعان اۋقىمدى باعدارلاماسىنىڭ ءبىر بولىگى. مەملەكەتتىك قولداۋدىڭ ارقاسىندا قازاقستاندىق ستۋدەنتتەر CityU سىندى الەمدىك دەڭگەيدەگى عىلىمي ورتالىقتاردا جوعارى ساپالى ءبىلىم الۋعا مۇمكىندىك الىپ وتىر، - دەدى ءوز سوزىندە ساتبايەۆ ۋنيۆەرسيتەتىنىڭ رەكتورى مەيرام بەگەنتايەۆ.

Фото: Ғылым және жоғары білім министрлігі

فيليالدىڭ اشىلۋ سالتاناتىنا ق ر ع ج ب م ۆيتسە-ءمينيسترى دينارا شەگلوۆا، الماتى قالاسى اكىمىنىڭ ورىنباسارى ازامات قالدىبەكوۆ، ق ح ر- نىڭ باس كونسۋلى جيان ۆەي جانە باسقا دا رەسمي تۇلعالار قاتىستى.

- بۇگىن ءبىز تەك فيليال اشىپ قانا قويماي، جاھاندىق دەڭگەيدە ويلايتىن كوشباسشىلار مەن جاڭاشىل عالىمداردى دايارلاۋعا نەگىز قالادىق. ولار ادامزاتتىڭ وزەكتى ماسەلەلەرىن شەشۋگە ۇلەس قوسىپ، قازاقستان مەن گونكونگتىڭ، سونداي-اق بۇكىل الەم قاۋىمداستىعىنىڭ وركەندەۋىنە قىزمەت ەتەدى، - دەدى CityU ديرەكتورلار كەڭەسىنىڭ ءتوراعاسى مايكل نگاي.

سونداي-اق CityU مەن ساتبايەۆ ۋنيۆەرسيتەتى اراسىندا PhD دەڭگەيىندەگى قوس ديپلومدى ءبىلىم بەرۋ باعدارلاماسىن ىسكە قوسۋ تۋرالى مەموراندۋمعا قول قويىلدى. بۇل - قازاقستاندىق ۋنيۆەرسيتەت پەن الەمنىڭ توپ-100 ۋنيۆەرسيتەتتەرى قاتارىنا كىرەتىن بەدەلدى جوعارى وقۋ ورنى اراسىندا جاسالعان العاشقى كەلىسىم.

- بەدەلدى شەتەلدىك ۋنيۆەرسيتەت فيليالىنىڭ الماتى قالاسىندا رەسمي اشىلۋ سالتاناتىمەن شىن جۇرەكتەن قۇتتىقتايمىن! بۇل قادام قازاقستاندىق ستۋدەنتتەردىڭ CityU جانە ساتبايەۆ ۋنيۆەرسيتەتى سىندى الدىڭعى قاتارلى ج و و- لاردا الەمدىك دەڭگەيدە ءبىلىم الۋىنا جول اشادى. CIRI تەك زەرتتەۋ جانە يننوۆاتسيالىق ورتالىق قانا ەمەس، سونىمەن قاتار جاڭا رەسۋرستى ۇنەمدەيتىن تەحنولوگيالار مەن جاڭالىقتاردى قالا ەكونوميكاسىنا ەنگىزۋگە سەپ بولادى ءارى الماتىنى ورتالىق ازيا ايماعىنداعى جەتەكشى ءبىلىم بەرۋشى ورتالىق رەتىندە نىعايتاتىنىنا سەنىمدىمىن، - دەدى الماتى قالاسى اكىمىنىڭ ورىنباسارى ازامات قالدىبەكوۆ.

CityU - الەمدەگى ەڭ جىلدام دامىپ كەلە جاتقان جاس عىلىمي- زەرتتەۋ ۋنيۆەرسيتەتتەرىنىڭ ءبىرى. ول از عانا ۋاقىت ىشىندە QS رەيتينگى بويىنشا 62-ورىنعا، ال Times Higher Education ءتىزىمى بويىنشا 78-ورىنعا شىقتى. ستەنفورد ۋنيۆەرسيتەتىنىڭ مالىمەتىنشە، CityU- دىڭ 170-تەن استام وقىتۋشىسى الەمدەگى ەڭ كوپ دايەكسوز كەلتىرىلگەن عالىمداردىڭ توپ-%2 قاتارىنا كىرەدى.

ەكى ۋنيۆەرسيتەت اراسىندا وسىعان دەيىن قول قويىلعان ستراتەگيالىق سەرىكتەستىك كەلىسىمگە سايكەس ماتەريال تانۋ (Material Science)، جاساندى ينتەللەكت، كومپيۋتەرلىك عىلىمدار (Computer Science) جانە ازاماتتىق قۇرىلىس (Civil Engineering) ماماندىقتارىنا باعىتتالعان قوس ديپلومدى ءبىلىم بەرۋ باعدارلامالارى ىسكە قوسىلدى. باكالاۆرياتتا وقۋ «2+2» جانە ماگيستراتۋرادا وقۋ «1+1» فورماتى بويىنشا وتەدى.

فيليالداعى وقۋ ستۋدەنتتەرگە ق ر عىلىم جانە جوعارى ءبىلىم مينيسترلىگىنىڭ مەملەكەتتىك گرانتى نەگىزىندە تولىقتاي اعىلشىن تىلىندە ءبىلىم الۋعا مۇمكىندىك بەرەدى. باكالاۆرلار العاشقى 2 وقۋ جىلىن الماتىدا وتكىزسە، سوڭعى 2 جىلدى گونكونگتا وتكىزەدى. ال PhD باعدارلاماسىنىڭ قاتىسۋشىلارى گونكونگتاعى وقۋ بارىسىندا الەمدىك عىلىمي زەرتحانالاردا جەتەكشى عىلىمي توپتارمەن بىرگە تاعىلىمدامادان وتەدى.

ساتبايەۆ ۋنيۆەرسيتەتى بازاسىندا CityU زەرتتەۋ جانە يننوۆاتسيالار ينستيتۋتىنىڭ اشىلۋى - مەملەكەت باسشىسىنىڭ تاپسىرماسىن جانە جوعارى ءبىلىم مەن عىلىمدى دامىتۋ تۇجىرىمداماسىن جۇزەگە اسىرۋ جولىنداعى ماڭىزدى قادام.

الەمنىڭ جەتەكشى ۋنيۆەرسيتەتتەرىنىڭ ءبىرىنىڭ فيليالىن اشۋ - قازاقستاننىڭ جوعارى ءبىلىم جۇيەسىن دامىتۋعا، جاھاندىق تاجىريبەلەردى ەنگىزۋگە، ءبىلىم بەرۋ ساپاسىن ارتتىرۋعا جانە شەتەلدىك ستۋدەنتتەردى تارتۋعا باعىتتالعان ماڭىزدى باستاماسى.

اۆتور

ەلميرا ورالبايەۆا