ازيادا ويىندارىنان قازاقستان قورجىنىنا قوس قولا مەدال ءتۇستى
قىتايدىڭ حاڭجوۋ قالاسىندا ءوتىپ جاتقان ازيا ويىندارىندا قازاقستاندىق بالۋان ازات سادىقوۆ پەن بوكسشى ناتاليا بوگدانوۆا قولا جۇلدەگەر اتاندى، دەپ حابارلايدى قازاقپارات ءتىلشىسى.

ا. سادىقوۆ 77 كەلىگە دەيىنگى سالماقتا كۇرەسپەي-اق جۇلدەگەرلەر قاتارىنا ىلىكتى.
ونىڭ قارسىلاسى، كامبودجالىق كەو سوپحاك جاراقاتىنا بايلانىستى كىلەمگە شىققان جوق.
تاعى ءبىر قازاقستاندىق ماقسات سايلاۋ 87 كەلىگە دەيىنگى سالماقتا قولا جۇلدە ءۇشىن باسەكەدە جاپونيالىق ماساتو سۋميمەن كۇرەسىپ، قارسىلاسىنا ەش امال قىلا المادى - 1:9.
وسىلايشا، بايراقتى باسەكەنى باستاعان قازاقستاندىق بالۋاندار العاشقى كۇنى ءبىر كۇمىس، ءبىر قولا جۇلدەگە قول جەتكىزدى. ەرتەڭ گرەك-ريم كۇرەسىنەن ەكى سالماقتا جەڭىمپاز-جۇلدەگەرلەر انىقتالادى. سودان كەيىن ايەلدەر كۇرەسىنە كەزەك تيەدى.
6- قازان كۇنى جارىستى ەركىن كۇرەس شەبەرلەرى قورىتىندىلايدى.
بوكس باسەكەسىندە قازاقستاندىق ناتاليا بوگدانوۆا جارتىلاي فينالدا 66 كەلىگە دەيىنگى سالماقتا تايلاندتىق سۋۆاننافەنگ دجاندجايمەن قولعاپ ءتۇيىستىرىپ، ءۇش رەت نوكداۋن الىپ، نوكاۋتپەن جەڭىلىپ قالدى.
ءسويتىپ ول فينالدان تىس قالىپ، قولا جۇلدەنى قاناعات تۇتتى.
قازاقستاننان بوكس فينالىندا قامشىبەك قوڭقابايەۆ پەن كارينا يبراگيموۆا عانا ونەر كورسەتەدى.
ەسكە سالا كەتەيىك، بۇدان بۇرىن بوكسشى كارينا يبراگيموۆانىڭ فينالعا شىققانىن جازعان ەدىك.
سونداي-اق مەيىرجان شەرماحانبەت ازيادا فينالىندا جەڭىلىپ، كۇمىس جۇلدەنى قاناعات تۇتتى.