ازيادا جاڭا بوكس كونفەدەراتسياسى قۇرىلادى
استانا. قازاقپارات – World Boxing ازيا اۋماعىندا بوكستىڭ دامۋى مەن ناسيحاتتالۋىن باقىلاۋ ءۇشىن جاڭا ازيا بوكس كونفەدەراتسياسىنىڭ قۇرىلعانىن رەسمي تۇردە جاريالادى، - دەپ حابارلايدى msports.kz سايتى.
حالىقارالىق بوكس قاۋىمداستىعىنان (IBA) ازيا بوكس كونفەدەراتسياسىنىڭ (ASBC) تاۋەلسىزدىگىن قامتاماسىز ەتۋ ماسەلەسىنە بايلانىستى پرەزيدەنتتىك قىزمەتىنەن كەتكەن پيچاي چۋنحاۆادزيرا، ءوزىنىڭ مالىمدەمەسىندە جاڭا ۇيىمنىڭ قۇرىلۋىنا جانە ونىڭ الداعى جۇمىسىنا تولىق قولداۋ كورسەتەتىنىن ايتتى.
World Boxing باسشىسى بوريس ۆان دەر ۆورست قابىلدانعان شەشىمدى تاريحي ءسات ەكەندىگىن اتاپ ءوتتى.
«ازيادا بوكستىڭ مۇمكىندىكتەرىن كەڭەيتۋ جولىندا وسىنداي قادام جاساعانىمىزعا قۋانىشتىمىز. جاڭا ازيا بوكس كونفەدەراتسياسى ىلگەرى دامىپ، بوكس دەڭگەيىن جاڭا بەلەستەرگە كوتەرەتىنىنە سەنىمدىمىز»، - دەيدى مامان.
كونفەدەراتسيانىڭ قۇرىلۋى World Boxing قاۋىمداستىعىنان ايقىن قولداۋ تاپتى. World Boxing وليمپيادالىق كوميسسياسىنىڭ ءتوراعاسى گەننادي گولوۆكين ازيا بوكسىنىڭ الەمدىك ارەناداعى ماڭىزدىلىعىن ەرەكشە اتاپ ءوتتى.
«مۇنداي جاڭاشىل قۇرىلىمدى قۇرۋعا قاتىسۋ - ۇلكەن مارتەبە. بۇگىندە ازيا بوكسى الەمدىك ارەنادا ەرەكشە ءرول اتقارادى. جاڭا كونفەدەراتسيا ءبىزدىڭ ايماقتىڭ الاتىن ورنىن ودان ءارى بەكىتىپ جانە وسى سپورت ءتۇرىنىڭ دامۋىنا جاڭا سەرپىن بەرەدى»، - دەدى.
جاڭا ازيا كونفەدەراتسياسىنىڭ قۇرىلۋى قۇرلىق بوكسىنىڭ دامۋىنا جول اشادى. ۇيىم تاۋەلسىزدىك، ادىلەتتىلىك جانە سپورتشىلاردى قولداۋ قاعيداتتارىن باسشىلىققا الا وتىرىپ، مۇددەلى تاراپتاردى ورتاق ماقساتقا بىرىكتىرمەك.
ايتا كەتەيىك، قازاقستان بوكس فەدەراتسياسى جۋىردا عانا World Boxing قۇرامىنا قوسىلعان بولاتىن.
