ازيادا-2023: قازاقستان قورجىنىنا تاعى ەكى مەدال ءتۇستى

قىتايدىڭ حاڭجوۋ قالاسىندا ءوتىپ جاتقان ازيا ويىندارىندا قازاقستاندىق كاراتەشى لاۋرا ءالىقۇل مەن بالۋان ءالىمحان سىزدىقوۆ جۇلدەگەر اتاندى، دەپ حابارلايدى قازاقپارات ءتىلشىسى.

азиада
Фото: Фото: Спортты дамыту дирекциясы

لاۋرا ءالىقۇل 68 كەلىگە دەيىنگى سالماقتا ازيا چەمپيوناتىنىڭ ەكى دۇركىن جۇلدەگەرى، قىتايلىق لي تسياوتسياومەن فينالدىق كەزدەسۋىن وتكىزدى.

مۇندا قىتايلىق 4:0 ەسەبىمەن جەڭىسكە جەتىپ، چەمپيون اتانسا، لاۋراعا كۇمىس بۇيىردى.

ءالىمحان سىزدىقوۆ گرەك-ريم كۇرەسىنەن 130 كەلى سالماقتا قولا جۇلدە ءۇشىن باسەكەدە تۇركمەنستاندىق ايبەگشازادا كۋررايەۆتى 5:1 ەسەبىمەن ۇتتى.

تاعى ءبىر بالۋان يسلام ۋمايەۆ 97 كەلىگە دەيىنگى سالماقتا وزبەكستاندىق رۋستام اسساقالوۆتان تازا جەڭىلىپ، قولا جۇلدەگە قول جەتكىزە المادى.

سونداي-اق بۇگىن ايەلدەر كۇرەسىنەن كىلەمگە شىققان قازاقستاندىقتار جۇلدەسىز قالدى.

ەسكە سالا كەتەيىك، بۇدان بۇرىن دجيۋ-دجيتسۋدەن نۇرجان باتىربەكوۆتىڭ ازيا ويىندارىنىڭ چەمپيونى اتانعانىن جازعان ەدىك.

كاراتەشى نۇرقانات ءاجىقانوۆ قازاقستان قورجىنىنا سەگىزىنشى التىن مەدالدى سالدى.

سوڭعى جاڭالىقتار