ازيا ويىندارىندا العاشقى التىندى العان قازاق قىزى سۇحبات بەردى
بۇگىن «قۇرالايدى كوزگە اتقان مەرگەندەرىمىز» ازيا ويىندارىندا توپ جاردى. ناقتىراق ايتساق، قىتايدىڭ حاڭجوۋ قالاسىندا ءوتىپ جاتقان ⅩⅨ جازعى ازيا ويىندارىندا ستەند اتۋدىڭ سكيت باعدارلاماسى بويىنشا سىنعا تۇسكەن ايەلدەر قۇراماسى رەكورد جاڭارتىپ، چەمپيون اتاندى. سونىمەن قاتار، قۇراما مۇشەسى اسەم ورىنباي جەكەلەي سىندا دا قولا مەدال الدى.

الامان دودادا جۇرگەن El.kz اقپاراتتىق اگەنتتىگىنىڭ ءتىلشىسى سپورتشىدان ەكسكليۋزيۆتى سۇحبات الىپ ۇلگەردى.
- وتە قۋانىشتىمىن. ەڭ ءبىرىنشى ماقساتىمىز فينالعا شىعۋ جانە مەدال الۋ بولاتىن. ابىروي بولعاندا ەكى جۇلدەگە يە بولدىم. بىرەۋى التىن، ەكىنشىسى قولا. فينال تارتىستى ءوتتى. قولدان كەلگەندى جاسادىق.
- كوماندالىق باسەكەدە قىتايدان ەكى ۇپايعا قالىپ كەلە جاتىپ، ءبىر ۇپايعا ۇزىپ شىقتىڭىزدار…
- ءيا، سوڭعى سەرياعا دەيىن بار كۇشىن سالدىق. بەرىلمەدىك. سونىڭ ارقاسىندا چەمپيون بولدىق. قىتاي قۇراماسى - ازيادا عانا ەمەس، الەم بويىنشا ۇزدىكتەردىڭ ءبىرى. سونداي كوماندانىڭ جەرىنە كەلىپ، مىنانداي جانىپ تۇرعان اۋا-رايىندا توپ جارۋ ۇلكەن جەتىستىك.
- شىنىمەن اۋا-رايى قاتتى اسەر ەتتى مە؟
- كۇن ىستىق. شولدەتە بەرەدى. سوسىن مىنا ورنالاسقان جەردىڭ تابيعاتى دا ەرەكشە. وعان دەيىن كوزىڭدى ۇيرەتۋ كەرەك. ەلدىڭ نامىسى سىنعا ءتۇسىپ جاتقاندا بارىمدى سالدىم.
- جەكەلەي سىنداعى باسەكە تۋرالى ايتساق…
- كوماندالىقتا التىن العان سوڭ، جەڭىلدەپ قالدىم. فينالدىڭ وڭاي بولمايتىنىن ءبىلدىم. بۇل ازيا ويىندارى. قىتاي قۇراماسىنىڭ جانكۇيەرلەرى كوپ. جەرگىلىكتى سپورتشىلارىن قاتتى قولدايدى.
- جەكەلەي سىندا دا التىن الۋعا مۇمكىندىك بولدى عوي؟
- وزدەرىڭىز كوردىڭىزدەر، سوڭعى جاعىندا ءبىر اتقانىم دۇرىس ۇشپادى. قايتالاپ كورگەن كەزدە مۇنىڭ ءبارى سپورتشىعا اسەر ەتەدى…
- وقۋ-جاتتىعۋ جيىندارى قايدا ءوتتى؟
- ازيا ويىندارىنا شىمكەنتتە دايىندالدىق. 20 كۇندەي سوندا بولدىق.
- كەلەسى جىلى پاريج وليمپياداسى. جولداما جاعى قالاي بولىپ جاتىر؟
- ليتسەنزيا ويناتىلاتىن جارىستار الدا. ءبىرىنشى باسەكە باكۋدا ءوتتى. ەندى الدا تاعى باسقا ليتسەنزيالىق بار. 2024-جىلدىڭ مامىر ايىنا دەيىن جولدامالار ويناتىلادى. بۇيىرسا قول جەتكىزەمىز.
- كوماندالاستارىڭ تۋرالى ايتساڭ…
- ارىپتەستەرىم مىقتى. بۇل العاشقى جۇلدەمىز ەمەس. بۇعان دەيىن الەم كۋبوگى سەكىلدى جارىستاردا بىرگە وزا شاپقانبىز.
- جانكۇيەرلەرگە ايتار قانداي تىلەگىڭ بار؟
- قازاقستاننىڭ وسى ازيا ويىندارىنداعى العاشقى التىنىن الدىق. بارلىق سپورتشىلارعا جۇعىستى بولسىن.
اۆتور الماس ابىلاي