ازەربايجاندا تۋىستار اراسىنداعى نەكەگە تىيىم سالىنعاننان كەيىن تويلار سانى كۇرت ازايدى
استانا. KAZINFORM - ازەربايجاندا بيىل شىلدەدە تويلار سانى كۇرت ازايدى. 2025 -جىلدىڭ ماۋسىمىندا 5 مىڭنان استام نەكە تىركەلسە، شىلدەدە بۇل كورسەتكىش 2694-كە دەيىن تومەندەدى، دەپ حابارلايدى Oxu.az.
ماماندار مۇنى تۋىستار اراسىنداعى نەكەگە تىيىم سالىنعانىمەن بايلانىستىرادى.
جاقىن تۋىستار اراسىنداعى نەكەگە تىيىم سالاتىن زاڭ 2025 -جىلدىڭ 1-شىلدەسىنەن باستاپ كۇشىنە ەندى. جاڭا ەرەجەلەر ورتاق اتاسى مەن اجەسى بار اعالى-ءىنى، اپالى-سىڭلىلەردىڭ، سونداي-اق بيولوگيالىق تۋىسقان سانالاتىن نەمەرە اعا مەن ناعاشى اپالاردىڭ بالالارىنا نەكەگە تۇرۋعا تىيىم سالادى. بۇل شەشىم تۇقىم قۋالايتىن اقاۋلارمەن تۋىلعان بالالاردىڭ سانىن ازايتىپ، دەنى ساۋ ۇرپاقتى قامتاماسىز ەتۋ ماقساتىندا قابىلدانعان.
ازەربايجان ادىلەت مينيسترلىگىنىڭ مالىمەتى بويىنشا، 2025 -جىلدىڭ قاڭتار- شىلدە ايلارىندا 12146 اجىراسۋ تىركەلگەن. دەگەنمەن، اجىراسۋلار سانى وتكەن جىلمەن سالىستىرعاندا ءبىرشاما ازايىپ، 1000 ادامعا شاققاندا 2,1 دەن 2,0 گە دەيىن تومەندەگەن.
زاڭعا قاتىستى تاعى ءبىر وزگەرىس نەكە جاسىن تومەندەتۋگە رۇقسات بەرەتىن نورمالار دا جويىلدى. ەندى نەكەگە تۇرۋعا ءوتىنىش بىلدىرگەندەر تۋىستىق دارەجەسىن انىقتاۋ ءۇشىن تۋۋ تۋرالى كۋالىك پەن اتا-اناسى تۋرالى قۇجاتتاردى تاپسىرۋى قاجەت. ەرەجەلەردى بۇزۋ اكىمشىلىك نەمەسە قىلمىستىق جاۋاپكەرشىلىككە سەبەپ بولادى.
ەسكە سالا كەتەيىك، ازەربايجان الەمنىڭ 85 ەلىنەن اكەلىنەتىن ازىق-تۇلىك ونىمدەرىنە شەكتەۋ قويدى.
