ازەربايجان مەن ارمەنيا شەكاراداعى دەليميتاتسيالاۋ جۇمىستارىن جۇرگىزۋ ءتارتىبىن كەلىستى
استانا. KAZINFORM - شەكارانى دەليميتاتسيالاۋ كوميسسيالارىنىڭ 11- وتىرىسىنىڭ قورىتىندىسى بويىنشا ارمەنيا مەن ازەربايجان الداعى مەجەلەۋ جۇمىستارىن جۇرگىزۋ ءۇشىن مەملەكەتارالىق شەكارا ۋچاسكەلەرىنىڭ ءتارتىبىن كەلىستى. بۇل تۋرالى ارمەنيا سىرتقى ىستەر مينيسترلىگى حابارلايدى.

16-قاڭتاردا ارمەنيا مەن ازەربايجان شەكاراسىندا شەكارانى دەليميتاتسيالاۋ كوميسسيالارىنىڭ باسشىلارى ارمەنيا پرەمەر- ءمينيسترىنىڭ ورىنباسارى مگەر گريگوريان مەن ازەربايجان پرەمەر-ءمينيسترىنىڭ ورىنباسارى شاحين مۇستافايەۆتىڭ كەزدەسۋى ءوتتى. ارمەنيا س ءى م حابارلاعانداي، تاراپتار مەملەكەتارالىق شەكارانىڭ سولتۇستىك بولىگىندە دەليميتاتسيالاۋدى باستاۋ تۋرالى كەلىسىمگە كەلدى.
- تاراپتار ودان ءارى دەليميتاتسيالاۋ جۇمىستارىن جۇرگىزۋ ءۇشىن شەكارا سىزىعىنىڭ ۋچاسكەلەرىنىڭ/بولىكتەرىنىڭ ءتارتىبى تۋرالى ماسەلە بويىنشا پىكىر الماسۋدى جالعاستىردى جانە مەملەكەتتىك شەكارانى سولتۇستىك ۋچاسكە - ارمەنيا رەسپۋبليكاسى، ازەربايجان رەسپۋبليكاسى جانە گرۋزيا شەكارالارىنىڭ تۇيىسكەن جەرىنەن جانە ودان ءارى وڭتۇستىك باعىتتا - سولتۇستىكتەن وڭتۇستىككە قاراي، ارمەنيا رەسپۋبليكاسى مەن ازەربايجان رەسپۋبليكاسىنىڭ يران يسلام رەسپۋبليكاسىمەن شەكاراسىنا دەيىن دەليميتاتسيالاۋ بويىنشا جۇمىستار كەشەنىن باستاۋ تۋرالى كەلىسىمگە كەلدى، - دەلىنگەن ارمەنيا س ءى م كەزدەسۋ قورىتىندىسى بويىنشا مالىمدەمەسىندە.
تاراپتار سونداي-اق دەليميتاتسيالاۋ جۇمىستارىن جۇرگىزۋ ءتارتىبى بويىنشا ءتيىستى نۇسقاۋلىقتاردىڭ جوبالارىن تالقىلاپ، جۇمىس تارتىبىندە كەلەسى وتىرىستىڭ كۇنى مەن ورنىن بەلگىلەۋگە كەلىستى.
ارمەنيا مەن ازەربايجان اراسىنداعى شەكارا مەجەلەنبەگەن. 2022 -جىلى تاراپتار ەكى ەلدىڭ پرەمەر-مينيسترلەرى ورىنباسارلارىنىڭ توراعالىعىمەن شەكارانى دەماركاتسيالاۋ ماسەلەلەرى بويىنشا كوميسسيالار قۇردى.
2024 -جىلعى 19- ساۋىردە ارمەنيا رەسپۋبليكاسى مەن ازەربايجان رەسپۋبليكاسى اراسىنداعى شەكارانى دەليميتاتسيالاۋ ماسەلەلەرى بويىنشا ەلدەر كوميسسيالارىنىڭ سەگىزىنشى وتىرىسى ءوتتى. 23 -ساۋىردە ارمەنيا مەن ازەربايجان شەكاراسىندا العاشقى شەكارا باعانى ورناتىلدى.
2024 -جىلعى 23 -قازاندا ارمەنيا ازەربايجانمەن شەكارانى دەليميتاتسيالاۋ جونىندەگى كوميسسيالاردىڭ بىرلەسكەن قىزمەتى تۋرالى ەرەجەنى راتيفيكاتسيالادى.
اۆتور
زارينا تۋعانبايەۆا