ازاماتتىق الۋ: مەملەكەتتىك ءتىلدى قاراپايىم دەڭگەيدە ءبىلۋ تالابى
استانا. KAZINFORM - قازاقستان ازاماتتىعىن الۋعا نيەتتى ادامدار ءۇشىن وتكەن جىلدىڭ سوڭىندا ارنايى تەست ازىرلەندى. وندا قانداي سۇراقتار بولادى؟ تەستىلەۋ قاي كەزدەرى ۇيىمداستىرىلادى؟ شەكتى بال قانداي؟
Kazinform اگەنتتىگى وسى جانە وزگە دە ساۋالدارعا جاۋاپ ۇسىنادى.
مەملەكەت باسشىسى 2024 -جىلعى 16- مامىردا «ق ر كەيبىر زاڭنامالىق اكتىلەرىنە حالىقتىڭ كوشى-قونى جانە قىلمىستىق-اتقارۋ جۇيەسى سالالارىنداعى زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنا قول قويدى.
زاڭعا سايكەس عىلىم جانە جوعارى ءبىلىم مينيسترلىگى «قازاقستان رەسپۋبليكاسىنىڭ ازاماتتىعىنا قابىلداۋ نەمەسە ازاماتتىعىن قالپىنا كەلتىرۋ كەزىندە مەملەكەتتىك ءتىلدى قاراپايىم دەڭگەيدە، قازاقستان رەسپۋبليكاسى كونستيتۋتسياسىنىڭ نەگىزدەرىن، سونداي-اق قازاقستان تاريحىن ءبىلۋ كولەمىن بەكىتۋ تۋرالى» بۇيرىق جوباسىن ازىرلەپ، 2024 -جىلعى 8 -قازاندا (№479) بەكىتتى.
مەملەكەتتىك ءتىلدى ءبىلۋ دەڭگەيى قالاي انىقتالادى؟
بۇيرىقتا «مەملەكەتتىك ءتىلدى قاراپايىم دەڭگەيدە ءبىلۋ» دەگەن تىركەس بار. ءبىز عىلىم جانە جوعارى ءبىلىم مينيسترلىگىنىڭ ءتىل ساياساتى كوميتەتىنە سۇراۋ سالىپ، ونىڭ ناقتى قانداي مەجە ەكەنىن انىقتادىق.
- تەستىلەۋ بويىنشا ەڭ جوعارى بال سانى - 100، ونىڭ ىشىندە قازاق ءتىلى بويىنشا - 60 بال، ق ر كونستيتۋتسياسىنىڭ نەگىزدەرى بويىنشا - 15 بال، قازاقستان تاريحى بويىنشا - 25 بال. «مەملەكەتتىك ءتىلدى قاراپايىم دەڭگەيدە ءبىلۋ» تالابى تەست تاپسىرۋشى بەرىلگەن 60 بالدان كەمى 36 بال الۋ كەرەك دەگەندى بىلدىرەدى. ونىڭ ىشىندە تىڭدالىم بولىگى بويىنشا كەمىندە 12 بال، وقىلىم بولىگى بويىنشا كەمىندە 24 بال جيناۋى ءتيىس، - دەلىنگەن حابارلامادا.
سونداي-اق، ازاماتتىق الۋشىلار عالامتوردان ءجيى ىزدەيتىن ساۋالدارعا اتالعان ۆەدومستۆو مالىمەتتەرى نەگىزىندە جاۋاپتار دايىندادىق:
شەكتى بال قانشا؟
تەستىلەۋ بويىنشا شەكتى بال مولشەرى - 100-دەن 60 بال.
تەستىلەۋ قاشان وتەدى؟
ۇلتتىق تەستىلەۋ ورتالىعى تەستىلەۋدى توقسانىنا ءبىر رەت وتكىزەدى. سىن الۋ مەرەكە جانە دەمالىس كۇندەرىندە ۇيىمداستىرىلمايدى. ۇلتتىق تەستىلەۋ ورتالىعى تەستىلەۋ وتكىزۋ مەرزىمدەرى (تەستىلەۋدى وتكىزۋ ورنى، كۇنى جانە ۋاقىتى) تۋرالى اقپاراتتى ءبىر اپتا بۇرىن تەستىلەنۋشىنىڭ جەكە كابينەتىندە (www.app.testcenter.kz) ورنالاستىرادى.
قاي تىلدەردە تاپسىرۋعا بولادى؟
قازاق تىلىنەن تەست قازاق تىلىندە عانا، ال كونستيتۋتسيا نەگىزدەرى مەن قازاقستان تاريحى بويىنشا تەستىلەۋ قازاق نەمەسە ورىس تىلدەرىندە وتەدى.
قانشا ۋاقىت بەرىلەدى؟
تەستىلەۋگە 2 ساعات 10 مينۋت ۋاقىت بەرىلەدى. مۇمكىندىگى شەكتەۋلى ادامدارعا تەستىلەۋ ءۇشىن قوسىمشا 30 مينۋت بەرىلەدى.
مۇگەدەكتىگى بار جاندارعا قوسىمشا قۇجات تاپسىرۋ كەرەك پە؟
مۇگەدەكتىگى بار ادامدار ءوتىنىش بەرگەن كەزدە مۇگەدەكتىكتى بەلگىلەۋ تۋرالى قۇجاتتىڭ قازاق نەمەسە ورىس تىلىندەگى نوتاريالدى كۋالاندىرىلعان اۋدارماسىن تاپسىرۋى كەرەك.
تەستىلەۋ كىمدەرگە اقىلى؟
شەتەلدىك ازاماتتار تەستىنى اقىلى تۇردە تاپسىرادى، تەستىلەۋ قورىتىندىسى بويىنشا شەكتى بالدى ەڭسەرگەندە ەلەكتروندى سەرتيفيكات بەرىلەدى.
تەستىلەۋدەن كىمدەر بوساتىلادى؟
«قازاقستان رەسپۋبليكاسىنىڭ ازاماتتىعىنا قابىلداۋدىڭ وڭايلاتىلعان ءتارتىبى بەلگىلەنەتىن ادامدار ءۇشىن كاسىپتەردىڭ تىزبەسىن جانە ولارعا قويىلاتىن تالاپتاردى بەكىتۋ تۋرالى» قازاقستان رەسپۋبليكاسى پرەزيدەنتىنىڭ 2005 -جىلعى 6-ماۋسىمداعى №1587 جارلىعىمەن بەكىتىلگەن تىزبە بويىنشا ءتيىستى كاسىپتەرگە يە جانە تالاپتارعا ساي كەلەتىن ادامدار سونداي-اق كامەلەتكە تولماعاندار، ارەكەتكە قابىلەتسىز ادامدار، قازاقستان رەسپۋبليكاسىنا سىڭىرگەن ايرىقشا ەڭبەگى بار ادامدار، ەتنوستىق قازاقتار، قازاقستان رەسپۋبليكاسى راتيفيكاتسيالاعان حالىقارالىق شارتتار نەگىزىندە جەڭىلدەتىلگەن تارتىپپەن قازاقستان رەسپۋبليكاسىنىڭ ازاماتتىعىن العىسى كەلەتىن ادامدار تەستىلەۋدەن بوساتىلادى.
تەستىلەۋدى وتكىزۋگە رەسپۋبليكالىق بيۋدجەتتەن قارجى قاراستىرىلماعان.
ايتا كەتەيىك، 2024 -جىلى 20 مىڭداي ادام ەل ازاماتتىعىنان باس تارتتى.
وتكەن جىلى قازاقستان ازاماتتىعىن الۋشىلار سانى 25 پايىز ازايدى.
سونداي-اق بىلتىر ەلىمىزدە قوس ازاماتتىعى بار 700-گە جۋىق ادام انىقتالدى.
