ازاماتتاردىڭ ۇيگە دەپ جيناعان اقشاسى قالاي قورعالادى

استانا. KAZINFORM - سەناتتا «تۇرعىن ءۇي قۇرىلىسىنا قاتىسۋ جانە قۇرىلىس سالاسىن جەتىلدىرۋ ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالىپ جاتىر. بۇل قۇجات تۇرعىن ءۇي قۇرىلىس جيناق بانكتەرىندەگى سالىمداردى قورعاۋعا باعىتتالعان ءبىرقاتار ماڭىزدى نورمانى قامتيدى.

بۇل تۋرالى پرەمەر-ءمينيستردىڭ ءماجىلىس دەپۋتاتتارىنىڭ ساۋالىنا بەرگەن رەسمي جاۋابىندا ايتىلعان.

اتاپ ايتقاندا، زاڭ جوباسىندا تۇرعىن ءۇي قۇرىلىس جيناق جۇيەسى ارقىلى پاتەر الۋعا نيەتتى ازاماتتاردىڭ جيناقتارى كەپىل رەتىندە قويىلعان جاعدايدا، بانك شوتتارىنداعى قاراجاتتىڭ ءوندىرىپ الىنۋىن شەكتەۋ كوزدەلگەن، - دەلىنگەن جاۋاپتا.

ياعني بۇل دەگەنىمىز - ەگەر ازامات پاتەر الۋ ءۇشىن بانككە اقشا جيناپ، سول اقشاسىن كەپىلگە قويعان بولسا، وندا بۇل جيناقتى بانك نەمەسە باسقا ورگاندار تارتىپ الا المايدى.

ءماجىلىس دەپۋتاتتارىنىڭ باستاماسىمەن ازىرلەنگەن زاڭ جوباسى كەلەسى ماقساتتاردى كوزدەيدى:

«وتباسى بانك» سالىمشىلارىنىڭ جيناقتارىن تولىقتىرىپ وتىرۋىنا جانە ۋاقىتىلى تۇرعىن ءۇي زايمىنا وتۋىنە مۇمكىندىك بەرۋ؛

نوتاريۋستاردىڭ اتقارۋشىلىق جازبالارىن پايدالانۋ، سونداي-اق جەكە سوت ورىنداۋشىلارىنىڭ ارەست سالۋ جانە قاراجات تاركىلەۋ ارەكەتتەرىن شەكتەۋ؛

بانكتەر مەن تولەم جۇيەلەرىنە قاتىستى زاڭدارعا قاجەتتى وزگەرىستەر ەنگىزۋ.

سونىمەن قاتار «تولەمدەر جانە تولەم جۇيەلەرى تۋرالى» زاڭدا كەپىلگە قويىلعان جيناق شوتتارىنداعى قاراجاتتى بانكتىك قارىز شارتى بويىنشا تولەم تالاپ ەتۋ ارقىلى ءوندىرىپ الۋعا تىيىم سالاتىن تۇزەتۋ كوزدەلىپ وتىر.

ءتيىستى وزگەرىستەر قازاقستاننىڭ ازاماتتىق، قىلمىستىق ءىس جۇرگىزۋ، ازاماتتىق ءىس جۇرگىزۋ كودەكستەرىنە، سونداي-اق «اتقارۋشىلىق ءىس جۇرگىزۋ جانە سوت ورىنداۋشىلارىنىڭ مارتەبەسى تۋرالى»، «بانكتەر جانە بانك قىزمەتى تۋرالى» زاڭدارىنا ەنگىزىلەدى.