«ازاماتتارعا ارنالعان ۇكىمەت» كورپوراتسياسىنىڭ ينفراقۇرىلىمى جەكەشەلەندىرىلە مە
استانا. KAZINFORM - «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ بارلىق ينفراقۇرىلىمى مەملەكەتتىك قىزمەت كورسەتۋگە جۇمىلدىرىلعان.
بۇل جايىندا ءماجىلىس دەپۋتاتتارىنىڭ ساۋالىنا پرەمەر-ءمينيستردىڭ ءبىرىنشى ورىنباسارى رومان سكلياردىڭ جاۋابىندا ايتىلعان.
«قولدانىستاعى زاڭناما جانە ىشكى رەگلامەنت اياسىندا مەملەكەتتىك كورپوراتسيانىڭ («ازاماتتارعا ارنالعان ۇكىمەت» كورپوراتسياسى) بەك-وفيس فۋنكسيالارىن بەرۋ، سونىمەن قاتار ينفراقۇرىلىمدارىن جەكەشەلەندىرۋ جۇرگىزىلىپ جاتقان جوق جانە جەكەشەلەندىرىلمەيدى. مەملەكەتتىك كورپوراتسيا مەملەكەتتىك ستاندارتتارعا جانە بەكىتىلگەن تالاپتارعا سايكەس قىزمەتىن جالعاستىرادى. مەملەكەتتىك قىزمەت كورسەتۋگە جۇمىلدىرىلعان بارلىق ينفراقۇرىلىم مەملەكەتتىك ورگانداردىڭ قاتاڭ باقىلاۋىندا تۇر»، - دەدى ول جاۋابىندا.
ونىڭ اتاپ وتۋىنشە، كورپوراتسيانىڭ قۇرىلىمىن، قىزمەتتىك مىندەتتەرىن كەز كەلگەن وزگەرتۋ نەمەسە مىندەتتەرىن ءبولۋ زاڭناما مەن نورماتيۆتىك قۇجاتتار اياسىندا عانا جۇرگىزىلەدى. مۇنىڭ ۇستىنە بارلىق ءىس-قيمىل اشىقتىقتى، ەسەپتىلىكتى جانە كورسەتىلەتىن قىزمەتتەر ساپاسىنىڭ جوعارى دەڭگەيىن ساقتاۋعا باعىتتالادى.
«مەملەكەتتىك كورپوراتسيانىڭ ينفراقۇرىلىمى مەملەكەتتىك قىزمەتتەردى جۇزەگە اسىرۋ ءۇشىن عانا ارنالعان جانە ازاماتتاردى قولجەتىمدى ءارى ساپالى مەملەكەتتىك قىزمەتتەرمەن قامتاماسىز ەتۋ ءرولىن ورىنداۋىن جالعاستىرىپ كەلەدى»، - دەدى رومان سكليار.
بۇعان دەيىن حابارلاعانىمىزداي، اۋىلدىق جەرلەردەگى «قازپوشتا» بولىمشەلەرى مەملەكەتتىك قىزمەتتەر كورسەتۋى مۇمكىن.
مۇنان بولەك، ۇكىمەت ح ق ك و- لارداعى «جاردەمشى-سىماقتاردان» قۇتىلۋ ءۇشىن ورتالىقتاردا مەملەكەت رەتتەيتىن جانە باقىلايتىن سەرىكتەس ۇيىم ەنگىزەدى.
