گازا سەكتورىندا قالىپ قويعان قازاقستاندىقتار انىقتالدى

يزرايلدەگى قازاقستاننىڭ ەلشىلىگىنە 100 دەن استام ەلىمىزدىڭ ازاماتى جاردەم كورسەتۋ تۋرالى ءوتىنىش جاسادى. سونىمەن قاتار، گازا سەكتورىنان تاعى 100 دەن استام ادامدى قازاقستانعا جەتكىزۋ ماسەلەسى پىسىقتالىپ جاتىر.

Израиль
Фото: Фото:

بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى Kazinform.

«يزرايل مەن پالەستيناداعى اسكەري-ساياسي جاعدايدىڭ كۇرت وزگەرۋىنە بايلانىستى قازاقستان سىرتقى ىستەر مينيسترلىگى ەلىمىزدىڭ ازاماتتارىن قاقتىعىس ايماعىنان شىعارۋ بويىنشا شارا قابىلداپ جاتىر. بۇل ماسەلەنى شەشۋ ءۇشىن قازاقستاننىڭ يزرايلدەگى، مىسىرداعى جانە يوردانياداعى ەلشىلىكتەرى جۇمىلدىرىلعان. بيىلعى 16- قازانداعى جاعداي بويىنشا يزرايلدەگى قازاقستاننىڭ ەلشىلىگىنە 100 دەن استام ەلىمىزدىڭ ازاماتى جاردەم كورسەتۋ تۋرالى ءوتىنىش جاسادى. ولاردىڭ ءبىر بولىگى قازاقستاندىق ديپلوماتتاردىڭ كومەگىمەن اتالعان ەلدەن كەتىپ قالدى»، - دەدى ا. سمادياروۆ اپتالىق بريفينگىدە.

ونىڭ ايتۋىنشا، 15- قازاندا ەلشىلىك كومەگىمەن قازاقستاننىڭ 19 ازاماتى، سونىڭ اراسىندا ارنايى باعدارلامالار بويىنشا وقىپ جۇرگەن 15 بالا ەلىمىزگە جەتكىزىلدى.

«ازاماتتارىمىزدىڭ قاۋىپسىز كەلۋىن قامتاماسىز ەتۋ ماقساتىندا ديپلوماتتار بالالاردى يزرايلدىڭ ءتۇرلى ايماقتارىنان اۋەجايعا دەيىن تىكەلەي جەتكىزۋىن جۇزەگە اسىردى. يزرايلدەگى قازاقستاننىڭ ەلشىلىگى وتانداستىرىمىزدىڭ ەلگە جەتۋى جانە اۋە بيلەتتەرىن ساتىپ الۋ ماسەلەسى بويىنشا ۇيلەستىرۋ جۇمىستارىن جالعاستىرىپ جاتىر. ايتا كەتەيىك، تەل-اۆيۆ قالاسىنىڭ حالىقارالىق اۋەجايى شتاتتى رەجيمدە قىزمەت كورسەتىپ وتىر»، - دەدى رەسمي وكىل.

سونىمەن قاتار ول گازا سەكتورىنداعى جاعداي وتە كۇردەلى ەكەنىن ايتتى.

«قازاقستاننىڭ مىسىر مەن يوردانياداعى ەلشىلىكتەرى وسى اۋدانداعى ازاماتتارىمىزبەن بايلانىستا وتىر. كۇندەلىكتى نەگىزدە جەرگىلىكتى بيلىكپەن وتانداستىرىمىزدى جانە ولاردىڭ وتباسى مۇشەلەرىن گازا سەكتورىنان مىسىرعا رافاح وتكىزۋ بەكەتى ارقىلى شىعۋى بويىنشا كەلىسسوزدەر جاسالىپ جاتىر. قولدا بار اقپاراتقا سايكەس، قازاقستاننىڭ 67 ازاماتى جانە ولاردىڭ وتباسى مۇشەلەرىن قوسا ەسەپتەگەندە، 100 دەن استام ادام انىقتالدى. قازاقستاننان باسقا تاعى 45 ەل ەلشىلىگى وسىنداي كەلىسسوز جۇرگىزىپ جاتىر. قازاقستان رەسپۋبليكاسى ازاماتتارى اراسىندا قازا تاپقاندار مەن جارالانعاندار تۋرالى مالىمەتتەر تىركەلمەدى»، - دەدى ا. سمادياروۆ.

سوڭعى جاڭالىقتار