اۋىزدان شىعاتىن جاعىمسىز ءيىس قانداي اۋرۋلار تۋرالى دەرەك بەرۋى مۇمكىن؟
استانا. KAZINFORM - اۋىز قۋىسىنىڭ گيگيەناسىن ساقتاساڭىز دا، جاعىمسىز ءيىس شىعىپ تۇرا ما؟ 90 پايىز جاعدايدا بۇل ءتىس تاستارى، جەگىسى، ستوماتيت، پەريودونتيت سەكىلدى اۋرۋلارمەن بايلانىستى. بۇل تۋرالى ستوماتولوگ-تەراپەۆت پاۆەل پيساريەۆ ايتتى، - دەپ حابارلايدى «گازەتا. ru».
دارىگەردىڭ سوزىنشە، جاعىمسىز ءيىس تىسجەگى، اۋىز قۋىسىنىڭ شىرىشتى قابىعىنىڭ اۋرۋلارى جانە ساپاسى تومەن پروتەزدىڭ بەلگىسى. مۇنداي كەزدە اششى ءيىس ۇنەمى شىعىپ تۇرادى، ال گيگيەنالىق قۇرالدار تەك ۋاقىتشا كومەكتەسەدى.
سونىمەن قاتار، ول جاعىمسىز ءيىس باسقا پاتولوگيالاردىڭ دا دامىپ جاتقانىن بىلدىرەتىنىن ەسكەرتتى. مىسالى، اممياكقا ۇقساس ءيىس بۇيرەك جەتكىلىكسىزدىگىنىڭ بەلگىسى.
«بۇيرەكتىڭ مىندەتى - قانداعى ۋلى زاتتاردى جويىپ، ءزار شىعارۋ، ءبىراق بۇيرەك زاقىمدالىپ، قالدىق پەن قاۋىپتى توكسيندەردى سۇزە الماسا، ول باسقا ورگاندارعا دا اسەر ەتەدى»، - دەدى مامان.
ال قانت ديابەتىمەن اۋىراتىن ادامدار اتسەتون نەمەسە جەمىس يىسىنە ۇقساس جاعىمسىز ءيىستى سەزەتىن بولسا، بۇل كەتواتسيدوزدىڭ دامۋىن كورسەتۋى مۇمكىن. بۇل اعزادا ينسۋلين جەتىسپەيتىندىكتەن، ەنەرگيانى ماي قىشقىلدارىنان الاتىن وتكىر جاعداي. مۇنداي كەزدە قىشقىل كەتوندار پايدا بولادى، ولار قاندا كوپ جينالسا، سالدارى ءتىپتى ولىمگە اكەپ سوقتىرۋى مۇمكىن.
بۇدان بولەك، پاۆەل پيساريەۆ جاعىمسىز ءيىستىڭ سەبەبى اسقازان-ىشەك جولدارىنىڭ ءارتۇرلى اۋرۋلارى بولۋى ىقتيمال ەكەنىن جەتكىزدى. مىسالى، گاستروەزوفاگەالدى رەفليۋكس اۋرۋىمەن اۋىراتىن ادامداردىڭ اۋزىنان قىشقىل ءيىس شىعادى، ال ون ەكى ەلى ىشەكتىڭ جاراسى مەن قابىنۋى كەزىندە شىرىگەن جۇمىرتقانىڭ ءيىسى بولادى.
ايتا كەتەيىك، بۇعان دەيىن اۋىز قۋىسىنان شىعاتىن جاعىمسىز ءيىستى قالاي كەتىرۋگە بولاتىنى حابارلانعان بولاتىن.
ءتىس گيگيەناسى - كۇنىنە كەمىندە ەكى رەت ءتىسىڭىزدى جۋىڭىز. مۇمكىن بولسا، ولاردى ءار تاماقتان كەيىن تازالاڭىز.
ءتىس شەتكاسىن ۇنەمى اۋىستىرىپ وتىرىڭىز نەمەسە ۋلترادىبىستى ءتىس شەتكاسىن ساتىپ الىڭىز. ول ءتىستى جاقسى تازارتادى.
تەمەكى شەكپەڭىز.
ەگەر اۋزىڭىز قۇرعاپ كەتە بەرەتىن بولسا، ءبىر كۇن ىشىندە جەتكىلىكتى مولشەردە سۇيىقتىق ءىشىڭىز، قۇرعاق اۋىز قۋىسىنا ارنايى سپرەي نەمەسە ىلعالداندىراتىن گەلدى دە قولدانۋعا بولادى. ەگەر جاقسارۋ بايقالماسا، دارىگەرمەن كەڭەسۋدى ۇمىتپاڭىز.
ءتىس دارىگەرىنە ۇنەمى بارىپ تۇرىڭىز. ەسىڭىزدە بولسىن، گاليتوزدىڭ ەڭ كوپ تارالعان سەبەبى گيگيەنامەن بايلانىستى.
