ايگىلى «ليلو جانە ستيچ» قازاقشا سويلەيدى

استانا. KAZINFORM - مامىر ايىندا ايگىلى «ليلو جانە ستيچ» انيماتسيالىق فيلمى قازاق تىلىندە كورسەتىلە باستايدى، دەپ حابارلايدى Jibek Joly تەلەارناسى.

ديسنەي ستۋدياسىنىڭ تۋىندىسىن كورەرمەندەر كينوتەاترلاردان كورە الادى.

ال جەلتوقساندا قازاقستاندىقتاردى تاعى ءبىر اۋقىمدى پرەمەرا كۇتىپ تۇر. «اۆاتاردىڭ» ءۇشىنشى ءبولىمى تۇپنۇسقامەن قاتار كورسەتىلەدى دەپ جوسپارلانعان.

حالىقارالىق «قازاق ءتىلى» قوعامىنىڭ پرەزيدەنتى راۋان كەنجەحان ۇلى Jibek Joly تەلەارناسىنىڭ ستۋدياسىنا كەلدى.

ونىڭ سوزىنشە، قازىر ۇلكەن فيلمدەردىڭ بارلىعى دەرلىك قازاق تىلىندە كورسەتىلە باستادى.

- ءيا، ءبىز ءۇشىن قازاق تىلىندەگى مازمۇندى كوبەيتۋ باعىتىنداعى جۇمىستىڭ اۋقىمدى ءبىر بولىگى - بۇل دۇنيەجۇزىندەگى الەمگە تانىمال ۇلكەن ستۋديالاردىڭ تۋىندىلارىن قازاق تىلىندە ۇلكەن كينوتەاترلاردا شىعارىپ كورسەتۋ ەدى. بۇعان دەيىن بەلگىلى جىلىنا ءبىر-ەكى فيلم شىعىپ جاتتى. بۇل قازاقستانداعى دەمەۋشىلەردىڭ كۇشىمەن جاسالىپ جاتقان جۇمىس. ال وتكەن جىلدان بەرى ءبىز ستۋديالاردى تالاپ قويىپ، ۇسىنىس بەرىپ، جاعداي جاساپ، ستۋديالار ءوز فيلمدەرىن قازاق تىلىنە ءوز قاراجاتتارى ەسەبىنەن اۋدارىپ اكەلە باستادى. سونى ارقاسىندا جىل سايىن كورسەتىلەتىن فيلمدەر 1-2 ەمەس، ۇلكەن فيلمدەردىڭ بارلىعى دەرلىك قازاق تىلىندە كورسەتىلە باستادى. بىلتىر 4 فيلم كورسەتىلدى، ول Pixar ستۋدياسىنىڭ «ويجۇمباق»، «موانا» دەگەن مۋلتفيلمى، سودان كەيىن «ۆەنوم»، جىلدىڭ سوڭىندا «مۋفاسا: ارىستان پاتشاسى» دەگەن فيلم شىقتى، - دەدى راۋان كەنجەحان ۇلى.

بۇعان دەيىن پرەزيدەنت قازاق تىلىندە تۇسىرىلگەن مۋلتفيلمدەر كوپ بولۋى قاجەت ەكەنىن ايتقان ەدى.

اۆتور

اينۇر تۋماكبايەۆا