ايىپپۇلمەن قۇتىلعان شەنەۋنىك پوليتسەي ەندى تۇرمەدە وتىراتىن بولدى

الاياقتىق جولمەن اقشا تاپقىسى كەلگەن اقتوبە وبلىسى مۇعالجار اۋداندىق پوليتسيا ءبولىمى باستىعىنىڭ ورىنباسارى جانە وعان كومەكتەسكەن ادامعا قاتىستى ءىس اپەللياتسيالىق شاعىممەن قايتا قارالدى، دەپ حابارلايدى Kazinform.

اقتوبە وبلىستىق سوتىنىڭ قىلمىستىق ىستەر جونىندەگى سوت القاسى مۇعالجار اۋداندىق سوتىنىڭ ۇكىمىن اپەللياتسيالىق تارتىپتە قايتا قارادى. ءىس ماتەريالىنا سۇيەنسەك، مۇعالجار اۋداندىق پوليتسيا ءبولىمى باستىعىنىڭ ورىنباسارى قىلمىستىق ءىستىڭ وڭ اياقتالۋى ءۇشىن 900 مىڭ تەڭگە اقشا الۋعا وقتالعان. وعان تانىسى كومەكتەسپەك بولدى. الايدا ولاردى ق ر سىبايلاس جەمقورلىققا قارسى اگەنتتىك دەپارتامەنتىنىڭ قىزمەتكەرلەرى ۇستاعان.

ءبىرىنشى ساتىداعى سوت اۋداندىق پوليتسيا ءبولىمى باستىعىنىڭ ورىنباسارىن لاۋازىمدى ادام بولا تۇرا، ءوزىنىڭ قىزمەت بابىن پايدالانۋ ارقىلى الداۋ جانە سەنىمدى تەرىس پايدالانۋ جولىمەن بوتەننىڭ مۇلكىن جىمقىرۋعا وقتالعانى (قىلمىستىق كودەكسىنىڭ 24-بابى 3-بولىگى، 190-بابى 3-بولىگى 2-تارماعى) ءۇشىن كىنالى دەپ تانىپ، وعان 9 ميلليون تەڭگە ايىپپۇل تاعايىندادى.

بوتەننىڭ مۇلكىن جىمقىرۋعا كومەكتەسكەنى ءۇشىن تانىسىنا 3 ميلليون 450 مىڭ ايىپپۇل سالىندى.

«كەيىن پروكۋرور ونى باس بوستاندىعىنان ايىرۋدى، ال قورعاۋشى ەكەۋىن دە اقتاپ، ۇكىمنىڭ كۇشىن جويۋدى سۇراپ، اپەللياتسيالىق شاعىم ءتۇسىردى.

سوت القاسىنىڭ قاۋلىسىمەن ۇكىم وزگەرتىلىپ، مۇعالجار اۋداندىق پوليتسيا ءبولىمى باستىعىنىڭ ورىنباسارى مەملەكەتتىك قىزمەتتە لاۋازىمداردى اتقارۋ قۇقىعىنان ءومىر بويىنا ايىرىلدى. سونىمەن بىرگە 4 جىل مەرزىمگە باس بوستاندىعىنان ايىرۋ جازاسى تاعايىندالدى.

ەكىنشى سوتتالۋشىعا تاعايىندالعان جازا وزگەرىسسىز قالدىرىلدى. اپەللياتسيالىق قاۋلى زاڭدى كۇشىنە ەندى»، - دەپ حابارلادى اقتوبە وبلىستىق سوتىنىڭ باسپا ءسوز قىزمەتىنەن.