ايتىسكەرلەر دە بار - دەپۋتات «ءتۇپسانانى تۇزەتكىشتەرگە» شۇيلىكتى
استانا. KAZINFORM - ءماجىلىس دەپۋتاتى جارقىنبەك امانتاي ۇلى پرەمەر-ءمينيستردىڭ ورىنباسارى تامارا دۇيسەنوۆانىڭ اتىنا الەۋمەتتىك جەلى قولدانۋشىلارىنىڭ جاۋاپكەرشىلىگىن ارتتىرۋ تۋرالى ساۋال جولدادى.
«قوعامدى دۇرلىكتىرگەن تاعى ءبىر ماڭىزدى ماسەلە - الەۋمەتتىك جەلىلەردەگى ارزان اقىل، ساپاسىز ءبىلىم ساتقىش، بىلگىشتەردىڭ كوبەيۋى. بايقاپ قاراساق، الەۋمەتتىك جەلىلەردە «باقىتقا جەتۋ جولىن كورسەتەمىن، جىلدام بايۋدى ۇيرەتەمىن، كۇيزەلىستەن قۇتقارامىن، ءتۇپساناڭدى تۇزەتەمىن، ءبىر ايدا جۇلدىزعا اينالدىرامىن، تەز ارىقتاتامىن، شەت تىلىندە سايراتىپ جىبەرەمىن» دەگەن سەكىلدى سان ءتۇرلى كۋرس، ۆەبينار، ترەنينگ ساتۋشىلار - بلوگەر، بيزنەس-ترەنەر، كوۋچ، پسيحولوگ، موتيۆاتورلاردىڭ جارناماسى جەلدەي ەسىپ، ساۋدانىڭ كورىگىن قىزدىرۋدا»، - دەگەن ءماجىلىس وكىلى مۇنداي ۇنامسىز ارەكەتكە شوۋ-بيزنەس وكىلدەرىمەن بىرگە ايتىسكەرلەردىڭ دە بارىپ جۇرگەنىن اتاپ ءوتتى.
«ولاردىڭ جۇزدەگەن مىڭ تەڭگەگە باعالانعان ساباقتارىن جۇرت ءتىپتى نەسيە راسىمدەپ ساتىپ الىپ، كەيىن قارىزعا بەلشەسىنەن باتىپ قالعانى دا جاسىرىن ەمەس. كەيبىر دەرەكتەردە ەلىمىزدەگى وسىنداي ينفوبيزنەستىڭ جىلدىق اينالىمى 500 ميلليون دوللارعا جەتكەنى ايتىلعان. بولجام بويىنشا الداعى 5 جىلدا 2 ميلليارد دوللارعا جەتۋى مۇمكىن دەيدى. ايتپاقشى، ولار مەملەكەتكە سالىق تولەي مە ءوزى؟! ءتىپتى مەزى بولعان جۇرتشىلىق ولارعا تىيىم سالۋ ماقساتىندا 2023 -جىلدىڭ 23- قاراشاسىندا پەتيتسيا دا جاريالاعان ەكەن. وكىنىشكە وراي قاراۋسىز قالسا كەرەك»، - دەيدى دەپۋتات.
سونداي-اق، ول ۇكىمەت ينفوبيزنەس پلاتفورمالارىنىڭ مازمۇنى مەن يدەولوگياسىن جانە زاڭدىلىعىنا، ونى جۇرگىزۋشىلەردىڭ دەرەكتەرىنە مونيتورينگتى كۇشەيتۋ كەرەك دەپ ەسەپتەيتىنىن ايتتى.
«ونلاين پلاتفورما جانە ونلاين جارناما تۋرالى» زاڭعا سايكەس، جاۋاپكەرشىلىككە تارتۋدا ۋاكىلەتتى ورگاندارعا ءتيىستى ۋاكىلەتتىك تولىق بەرىلۋى ءتيىس. وسى ۋاقىتقا دەيىن اتالعان زاڭ اياسىندا قانشا ادام جاۋاپكەرشىلىك جۇكتەگەنى جايلى ستاتيستيكانى اشىپ كورسەتۋ ماڭىزدى.
بيزنەس-ترەنەرلەر مەن كوۋچتەر ءۇشىن ارنايى، كاسىبي ستاندارتتار بەكىتىلۋى ءتيىس.
حالىق اراسىندا ينتەرنەت الاياقتاردان، ينفوسىعانداردان قورعانۋدىڭ امالدارىن ءتۇسىندىرۋ جۇمىستارىن كەڭىنەن جۇرگىزۋ قاجەت»، - دەدى جارقىنبەك امانتاي ۇلى.
اۆتور
ەسىمجان ناقتىباي
