ايتەكە ءبيدىڭ 380 جىلدىعىنا ارنالعان رەسپۋبليكالىق كوماندالىق ايتىس ءوتتى
قىزىلوردا. KAZINFORM - قىزىلوردا وبلىسىندا ايتەكە ءبيدىڭ 380 جىلدىعىنا ارنالعان «ءادىل ءسوزدىڭ الداسپانى» اتتى رەسپۋبليكالىق كوماندالىق ايتىس ءوتتى. ءسوز سايىسىندا قىزىلوردا وبلىسى مەن شىمكەنت قالاسى اقىندارى باسەكەگە ءتۇستى.
بيىل وبلىس باسشىلىعىنىڭ قولداۋىمەن وڭىردە رۋحانيات جىلى جاريالانعان. رەسپۋبليكالىق ايتىس سول يگىلىكتى ءىستىڭ ءبىر كورىنىسى رەتىندە ۇيىمداستىرىلىپ وتىر.
ءدۇبىرلى دودادا قوس ءوڭىردىڭ اقىندارى ايتىستىڭ تۇرە، سۇرە، قايىم، قىز بەن جىگىت ايتىسى جانرىندا سىنعا ءتۇستى. سونداي-اق، جىرشىلار مەن تەرمەشىلەر، ءداستۇرلى انشىلەر مەن كۇيشىلەر ءىس-شارانىڭ كورىگىن قىزدىردى.
شىمكەنت قالاسى اتىنان ءبىرجان بايتۋوۆ، نۇرلان ەسەنقۇلوۆ، مەيىرجان جارىلقاپ، ءاناپيا نۇرعالي مەن جىرشى ابىلاي ءبورىحانوۆ، تەرمەشى ەربول قالمىرزايەۆ، كۇيشى قايىربەك قاليەۆ، ءداستۇرلى ءانشى تۇرار المەنوۆ ونەر كورسەتتى.
ال قىزىلوردا وبلىسى نامىسىن مۇحتار نيازوۆ، ەرجان ءامىروۆ، ءمولدىر ايتباي، بەكسۇلتان ورىنباساروۆ سىندى اقىندار قورعادى. وعان قوسا جىرشى بيسەنبەك تولەۋباي، تەرمەشى ءادىلحان قۋاڭبايەۆ، كۇيشى الديار شاعداتوۆ، ءداستۇرلى ءانشى اقمارال نوعايبايەۆا كورەرمەندەرگە رۋحاني دەمالىس سىيلادى.
سىر وڭىرىندە كوماندالىق ايتىس العاش رەت وتكىزىلىپ وتىر.
كوماندالىق ايتىسقا قازاقستاننىڭ ەڭبەك سىڭىرگەن قايراتكەرى ءجۇرسىن ەرمان باستاعان توپ قازىلىق ەتتى.
ونەر بايگەسىنىڭ قورىتىندىسىمەن قىزىلوردا وبلىسىنىڭ كومانداسى كەلەسى ايتىسقا جولداما الدى. ەكى كومانداعا بىردەي قۇرمەت كورسەتىلىپ، ءار اقىنعا 500 مىڭ تەڭگەدەن سىياقى بەرىلدى. ال، جىرشى، تەرمەشى، ءداستۇرلى ءانشى، كۇيشىلەرگە 250 مىڭ تەڭگەدەن تابىستالدى.
جەڭىمپاز اتانعان قىزىلوردا وبلىسىنىڭ كومانداسىنا قازالى اۋدانى اكىمدىگىنىڭ ايتەكە ءبيدىڭ 380 جىلدىعىنا تاعايىنداعان «بابالار اماناتى» اتتى ارنايى سىيلىعى تاپسىرىلدى.
