ايتبەك امانگەلدى بيشىمبايەۆقا قاتىستى كۇتپەگەن جاڭا دەرەك ايتتى
استانادا. قازاقپارات - ەكس مينيستر قۋاندىق بيشىمبايەۆتىڭ بالانى قاعىپ ولتىرگەنى راس پا؟ بۇل سۇراققا مارقۇم سالتانات نۇكەنوۆانىڭ اعاسى ايتبەك امانگەلدى تيمۋر بالىمبەتوۆكە بەرگەن سۇحباتىندا جاۋاپ بەردى، - دەپ حابارلايدى Massaget.kz ءتىلشىسى.
ايتبەك امانگەلدىنىڭ سوزىنشە، بيشىمبايەۆتىڭ بالانى قاعىپ ولتىرگەنى تۋرالى اقپاراتتى وعان جەكە باسىن قۇپيا ساقتاۋدى ءجون كورگەن ايەل ەگجەي-تەگجەيلى ايتىپ بەرگەن.
«ءبىز 8-9-قاراشادا بولعان وقيعادان كەيىن بىرەۋ بىرنارسە كورسە نەمەسە بىلسە، بىزگە ايتسا دەپ قوعامنان كومەك سۇراعان بولاتىنبىز. حابارلاسقان ادامداردى كۋالىك بەرۋى ءۇشىن پوليتسياعا جىبەردىك. بىزگە بۇرىنعى وقيعالاردى ايتقان ادامدار دا وتە كوپ بولدى. ولاردىڭ اراسىندا ءبىر ايەل بولدى. ول فەيك پاراقشادان كەزدەسۋ ورنىن بەلگىلەدى. قاراشا ەدى. ءبىز كەزدەستىك. مەن ونىڭ سيپاتتاماسىن تولىق بەردىم. كەزدەسۋگە ول كوزىلدىرىك كيىپ، شارف تاعىپ كەلدى، ءبىز كوشەدە، جارىعى جوق، قاراڭعى جەردە كەزدەستىك. مەنىڭ ويىمشا، ول جەكە باسىن قۇپيا ساقتاعىسى كەلدى. ول ماعان وتە كوپ اقپارات بەردى، العاشىندا مەن ونىڭ ايتقاندارىنا ءمان بەرمەدىم، راس-وتىرىگىنە كۇدىكتەندىم. ءبىراق كەيىنىرەك ول ايتقاندارىن جىلجىمايتىن مۇلىكتى ساتۋ جانە تاعى باسقا قاتىستى كەيبىر اشىق دەرەككوزدەردىڭ مالىمەتتەرى ارقىلى راستادى.
ول بۇكىل وقيعانى ەگجەي-تەگجەيلى ايتىپ بەردى. ايتقاندارىن مالىمەتتەرمەن، سىلتەمەلەرمەن، اتى-جونمەن، تۋعان كۇنى بويىنشا مۇراعاتتىق ىستەر بويىنشا تەكسەرۋگە بولاتىنداي دالەلدەپ وتىردى. ول ماعان سول كەزدە جاۋاپكەرشىلىكتى ءوز موينىنا العان ەكىنشى ادامنىڭ اتىن، ونىڭ تۋعان كۇنىن جانە ونىڭ 3 اي بويى ۋاقىتشا ۇستاۋ يزولياتورىندا وتىرعانىن ايتتى. ءارى قاراي، تاراپتاردىڭ تاتۋلاسۋى بويىنشا ءىس جابىلعان. قۇجات بويىنشا بۇل جازاتايىم وقيعا رەتىندە تىركەلگەن.
بيشىمبايەۆ ماس كۇيىندە كولىك جۇرگىزىپ، جاس بالانى جاياۋ جۇرگىنشىلەر وتكەلىندە قاعىپ كەتكەن. ال كىنانى ءوز موينىنا باسقا ادام العان. سودان باستاپ كىنانى موينىنا العان ادامنىڭ اكەسىنىڭ مانسابى كوتەرىلگەن. وقيعا ءبىراز ۋاقىت بۇرىن بولعان. مەن بۇل تۋرالى ەشقاشان كوپشىلىك الدىندا ايتقان ەمەسپىن. ارينە، ءبىز بۇل تاقىرىپتى ۇيدە تالقىلادىق جانە ەموتسياعا بەرىلگەن كەزدە اقپارات تاراپ كەتتى. سودان كەيىن مەنى وسى ماسەلە بويىنشا كۋالىك بەرۋگە شاقىردى، مەن بارلىق اقپاراتتى بەردىم. شىنىمدى ايتسام، مەن بۇدان كەيىن نە بولعانىن بىلمەيمىن. مەن مامان ەمەسپىن، ءبىراق بيشىمبايەۆ «بايتەرەك» ۇ ب ح- نىڭ ديرەكتورى بولا تۇرىپ، كىنانى ءوز جاۋاپكەرشىلىگىنە العان ادامنىڭ جانە ونىڭ ءىنىسىنىڭ پايداسىنا پاتەر جازىپ بەرگەنى انىقتالدى»، - دەدى ايتبەك امانگەلدى.
ايتا كەتەيىك، ايەلىن اسا قاتىگەزدىكپەن ۇرىپ ولتىرگەنى ءۇشىن 24 جىلعا سوتتالعان ەكس-مينيستر قۋاندىق بيشىمبايەۆقا قاتىستى سوت وتىرىسى كەزىندە مارقۇم سالتانات نۇكەنوۆانىڭ اناسى قىلمىسكەردىڭ بۇعان دەيىن دە جاس بالانى قاعىپ ولتىرگەنى تۋرالى ايتقان بولاتىن. ىشكى ىستەر مينيسترلىگى بۇل مالىمدەمەگە قاتىستى پىكىر ءبىلدىردى.
