ايگەرىم التىنبەك حالىقارالىق وپەرا بايقاۋىنىڭ جەڭىمپازى اتاندى
استانا. KAZINFORM - قازاقستاندىق وپەرا ءانشىسى ايگەرىم التىنبەك XI حالىقارالىق CLIP 2025 وپەرا بايقاۋىندا جەڭىسكە جەتتى. ونەرپاز ءبىرىنشى ورىننان بولەك، بايقاۋدىڭ نەگىزگى نوميناتسيالارىندا ۇزدىك اتانىپ، ابسوليۋتتى جەڭىمپاز بولدى.
بۇل تۋرالى ق ر مادەنيەت جانە اقپارات مينيسترلىگىنىڭ باسپا ءسوز قىزمەتى ءمالىم ەتتى.
سونىمەن قاتار كورەرمەن كوزايىمى جۇلدەسىن، «ۇزدىك ايەل داۋىسى» ماراپاتىن جانە مۋزىكا سىنشىسى، ارت-ديرەكتور ءارى پەداگوگ كارلو مايەردىڭ ارنايى جۇلدەسىن يەلەندى.
بۇل - ەل مادەنيەتىندەگى تاريحي جەڭىس. بايقاۋدا العاش رەت ورتالىق ازيا وكىلى وسىنداي جەتىستىككە جەتىپ، كوشباسشىلار قاتارىنان كورىندى.
- بايقاۋ تاريحىندا ءبىرىنشى رەت ايگەرىم التىنبەك سايىستىڭ باسىنان بارلىق قازىلار القاسىنىڭ رەيتينگىندە ءبىرىنشى تۇردى. بۇل - وتە سيرەك كەزدەسەتىن جاعداي. بۇل كورەرمەننىڭ دە تاڭداۋى دۇرىس بولعانىن دالەلدەيدى، - دەدى قازىلار القاسىنىڭ ءتوراعاسى دومينيك مەيەر.
بيىلعى بايقاۋعا الەمنىڭ تۇكپىر-تۇكپىرىنەن 200-گە جۋىق ءوتىنىم تۇسكەن. ءبىراق فينالعا نەبارى 10 ورىنداۋشى ءوتتى. ولار پورتوفينو قالاسىنىڭ ورتالىق الاڭىندا Teatro Carlo Felice وركەسترىنىڭ سۇيەمەلدەۋىمەن وتكەن گالا- كونسەرتتە ونەر كورسەتتى.
«ۇزدىك ايەل داۋىسى» جۇلدەسىن ايگەرىمگە چيليدەگى يبانەس-اتكينسون قورى تابىستادى. بۇل قور - الەم بويىنشا جاس، دارىندى ۆوكاليستەردى ىزدەپ، قولداۋمەن اينالىساتىن حالىقارالىق ۇيىم. قور جەتەكشى تەاترلارمەن ارىپتەستىك ورناتقان جانە سانتياگوداعى وپەرا تەاترىمەن بىرلەسكەن جاستار باعدارلاماسىن جۇزەگە اسىرادى.
ايگەرىم - بۇل قوردىڭ وڭتۇستىك امەريكا كونتينەنتىندەگى قولداۋىنا يە بولعان العاشقى ەۋروپالىق ەمەس ءانشى. وعان كاسىبي جانە بولاشاق ىنتىماقتاستىق بويىنشا ۇسىنىس جاسالدى. بۇل ۇسىنىس وتاندىق ونەرپازعا ەۋروپادان تىس جەرلەردە دە حالىقارالىق مانسابىن كەڭەيتۋگە مۇمكىندىك بەرەدى.
ايگەرىم التىنبەكتىڭ بۇل جەتىستىگى بۇكىل ەل ءۇشىن سەرپىلىس بولدى. وتە جوعارى باسەكەلەستىككە قاراماستان، ول قازاقستاندىق ۆوكال مەكتەبىنىڭ الەمدىك دەڭگەيدەگى تالاپتارعا ساي كەلىپ، بيىك مەجە قويا الاتىنىن دالەلدەدى.
ەسكە سالا كەتەيىك، Concorso Lirico Internazionale dى Portofino (CLIP) - جىل سايىن يتاليانىڭ پورتوفينو قالاسىندا وتەتىن، الەمدەگى ەڭ بەدەلدى ۆوكالدىق بايقاۋلاردىڭ ءبىرى. كونكۋرستىڭ قازىلار القاسى قۇرامىندا ەۋروپانىڭ جەتەكشى وپەرا تەاترلارى ۆەنا وپەراسى، لا سكالا، گلايندبورن، مەتروپوليتەن جانە ەليسەي الاڭىنداعى تەاتردىڭ رەجيسسەرلەرى مەن ديرەكتورلارى بار.
قازاقستان رەسپۋبليكاسىنىڭ مادەنيەت جانە اقپارات مينيسترلىگى ايگەرىمدى جارقىن جەڭىسىمەن قۇتتىقتايدى. بۇل جەڭىس - ەل مادەنيەتىنىڭ جاھاندىق دەڭگەيدە تانىلىپ كەلە جاتقانىنىڭ ايقىن دالەلى.
ايتا كەتەيىك، ايگەرىم التىنبەك الەمنىڭ 50-گە جۋىق ەلىنەن كەلگەن 92 قاتىسۋشىنى باسىپ وزىپ، كلاسسيكالىق ۆوكال ونەرىندە فينالعا شىققان بولاتىن.
بايقاۋعا قاتىسۋشىلار بىرنەشە كەزەڭنەن وتكەن. ەڭ اۋەلى قاتىسۋشىلار الدىن الا تىڭداۋدان وتەدى. كەيىن وركەستردىڭ سۇيەمەلدەۋىمەن Piazzetta di Portofino دەپ اتالاتىن پورتوفينونىڭ ورتالىق الاڭىندا وتەتىن فينالعا قاتىسقان بولاتىن.
