اۋىرلىعى ورتاشا قىلمىس جاساعاندار راقىمشىلىققا ىلىنەدى
استانا. KAZINFORM - مەملەكەت باسشىسى قاسىم-جومارت توقايەۆ قۇقىق قورعاۋ ورگاندارىنىڭ كەڭەيتىلگەن القا ماجىلىسىندە قىلمىستىق- اتقارۋ جۇيەسىن ىزگىلەندىرۋ، جەتىلدىرۋ ءۇشىن ناقتى شارالار قابىلداۋ قاجەت ەكەنىن ايتتى.
- وسىدان ءۇش جىل بۇرىن ەلىمىزدە جالپى ۇلتتىق رەفەرەندۋم ءوتتى. ازاماتتارىمىزدىڭ كوپشىلىگى اتا زاڭعا تۇزەتۋ ەنگىزۋدى قولداپ داۋىس بەردى. رەفورمانىڭ ناتيجەسىندە ەلىمىزدىڭ ساياسي قۇرىلىمى تۇبەگەيلى جاڭعىردى. ادام قۇقىقتارىن قورعاۋ جۇيەسىندە اۋقىمدى وزگەرىستەر جاسالدى. كونستيتۋتسيالىق سوت قۇرىلدى. ادام قۇقىقتارى جونىندەگى ۋاكىلگە كونستيتۋتسيالىق مارتەبە بەرىلدى. ونىڭ قۇزىرەتى كەڭەيدى. ءولىم جازاسى ءبىرجولا الىنىپ تاستالدى. مۇنىڭ ءبارى - كونستيتۋتسيامىزعا ءتان ىزگىلىك رۋحىنىڭ كورىنىسى. سەبەبى اتا زاڭىمىزعا سايكەس ادام جانە ونىڭ ءومىرى، قۇقىقتارى مەن بوستاندىقتارى، بۇل - ەڭ قىمبات قازىنا، - دەدى مەملەكەت باسشىسى.
بيىل كونستيتۋتسيانىڭ قابىلدانعانىنا 30 جىل تولادى. وسىعان وراي، قۇقىق قورعاۋ قۇرىلىمدارى، دەپۋتاتتار مەن قۇقىق قورعاۋشىلار سوتتالعان ازاماتتارعا راقىمشىلىق جاساۋ تۋرالى باستاما كوتەردى.
- پارلامەنت ءتيىستى زاڭدى قارادى، مەن بۇل زاڭعا قول قويدىم. وسى ىزگى شارانىڭ ارقاسىندا جازاسىن وتەپ جاتقان 15 مىڭنان استام ادامعا امنيستيا جاريالاندى. سونىڭ ەكى مىڭنان استامى بوستاندىققا شىعادى. قالعاندارىنىڭ جازا مەرزىمى قىسقارادى. ونشا اۋىر ەمەس جانە اۋىرلىعى ورتاشا قىلمىس جاساعاندار عانا راقىمشىلىققا ىلىنەدى. ەڭ الدىمەن، الەۋمەتتىك جاعىنان وسال توپقا جاتاتىن ادامدارعا، ياعني، بالاسى بار ايەلدەرگە، ەگدە ادامدارعا، كامەلەت جاسىنا تولماعاندارعا جانە وسى ساناتتاعى باسقا دا ازاماتتارعا كەشىرىم بەرىلەدى. مۇنى جازا باسقان جاندارعا جاسالعان ناقتى كومەك، ولاردىڭ قوعامعا قايتا ورالۋىنا جاعداي جاساۋ دەپ ءتۇسىنۋ قاجەت. ءال-فارابيدىڭ سوزىمەن ايتساق، بۇل - شىن مانىندە قايىرىمدى ەلگە ءتان سيپات، - دەدى پرەزيدەنت.
ايتا كەتەيىك، پرەزيدەنت قوعامدىق قاۋىپسىزدىك سالاسىن بارىنشا سيفرلاندىرۋ جەمقورلىقتى ازايتاتىنىن ايتتى.
