اۋىر سوققى بولدى: رۋسلان بەردەنوۆكە وق اتقان كۇدىكتىنىڭ اكەسى مالىمدەمە جاسادى

شىمكەنت. KAZINFORM - شىمكەنتتە قالا اكىمىنىڭ ورىنباسارى رۋسلان بەردەنوۆكە وق اتقان كۇدىكتى ەرنار جيەمبايدىڭ اكەسى جيەمباي پراليەۆ رەسمي مالىمدەمە جاسادى.

- قۇرمەتتى قازاقستاندىقتار، شىمكەنت قالاسىنىڭ تۇرعىندارى، بۇقارالىق اقپارات قۇرالدارىنىڭ وكىلدەرى!

ءبىزدىڭ وتباسىمىزدىڭ اتىنان 21-ءساۋىر كۇنى ورىن العان قايعىلى وقيعاعا بايلانىستى سىزدەرگە ۇندەۋ جولداۋدى ءجون كوردىم.

اتا-انا ءۇشىن بۇل جاعداي - ناعىز اۋىر سوققى بولدى. بۇگىنگە دەيىن ۇلىمىز ەرناردىڭ وسىنداي قيىن جاعدايدىڭ ورتاسىندا قالعانىنا سەنە الماي وتىرمىز.

وسى وقيعاعا بايلانىستى شىن جۇرەكتەن وكىنىشىمىزدى بىلدىرەمىز. قانداي جاعداي بولماسىن، ءبىرىنشى كەزەكتە رۋسلان بەردەنوۆتىڭ تەزىرەك ساۋىعىپ كەتۋىن تىلەيمىز.

ءبىز تەرگەۋ مەن سوتتىڭ بارلىق جاعدايدى ءادىل، جان-جاقتى قاراستىراتىنىنا سەنىم ارتامىز. بارشاڭىزدى سابىرعا شاقىرىپ، ناقتى شەشىم شىقپاي تۇرىپ، اسىعىس قورىتىندى جاساماۋدى سۇرايمىز.

ەڭ باستىسى - بۇل جاعدايعا ەش قاتىسى جوق كەلىنىمىزدى ارالاستىرماۋدى وتىنەمىز. ول رۋسلان بەردەنوۆتى بۇرىن-سوڭدى كورمەگەن دە، تانىمايدى دا، - دەلىنگەن مالىمدەمەدە.

ول وسى قيىن كۇندەرى قولداۋ ءبىلدىرىپ جاتقان جاندارعا شەكسىز العىس بىلدىرەدى.

- الدا ءبىزدى اۋىر كەزەڭ كۇتىپ تۇر، دەگەنمەن ادىلدىك پەن ادامگەرشىلىك جەڭەدى دەپ ۇمىتتەنەمىز، - دەگەن جيەمباي پراليەۆ.

بۇعان دەيىن رۋسلان بەردەنوۆتىڭ قىزمەتتىك مىندەتىن ۋاقىتشا كىم اتقاراتىنىن حابارلادىق.

ايتا كەتەيىك، شىمكەنتتە قالا اكىمىنىڭ ورىنباسارى رۋسلان بەردەنوۆكە قاستاندىق جاسالعان بولاتىن. كۇدىكتى شەنەۋنىككە قاراي ءۇش رەت وق اتقان. وقيعا سالدارىنان اكىمدىك قىزمەتكەرى جاراقات الىپ، اۋرۋحاناعا جەتكىزىلدى.

ال، دارىگەرلەر رۋسلان بەردەنوۆتىڭ ومىرىنە قاۋىپ ءتونىپ تۇرماعانىن ايتتى. جاسالعان وتا دا ءساتتى ءوتتى.

ال، سارسەن قۇرانبەك شىمكەنت اكىمى ورىنباسارىنا جاسالعان شابۋىلعا قاتىستى مالىمەتتەردى تەرگەۋ ناقتىلايتىنىن ايتتى.