«ايقايلاپ» تۇراتىن اتاۋىنان باسقا تۇگى جوق: پرەزيدەنت جالعان قوعامدىق ۇيىمدار جايىندا

— ماعان ءبىرقاتار رەسپۋبليكالىق قوعامدىق بىرلەستىكتىڭ تەك قاعاز جۇزىندە تىركەلگەنى، شىن مانىندە، «ايقايلاپ» تۇراتىن اتاۋلارىنان باسقا تۇگى جوق، جالعان قۇرىلىمدار ەكەنى باياندالدى. مۇنداي ۇيىمدار ازاماتتار مۇددەسىن قورعاۋ ءۇشىن ەمەس، باسقا پيعىلدا، بەرىسىن ايتساق، مانساپقورلىق ماقساتتا قۇرىلعانى انىق. بۇل كەيبىر جاعدايدا الاياقتىققا دەيىن جەتتى. وعان جول بەرۋگە بولمايدى، — دەدى مەملەكەت باسشىسى.

وسى رەتتە پرەزيدەنت مۇنداي فاكتىلەر قۇقىق قورعاۋ ورگاندارىنىڭ نازارىنا جولداناتىنىن باسا ايتتى.

— تەك مەملەكەتتىك تاپسىرىستى يگەرۋ ماقساتىندا قۇرىلعان «قىزمەت كورسەتۋ» ۇيىمدارىنىڭ جۇمىسىنا توسقاۋىل قويۋ قاجەت. جالپى، حالىق كەڭەسى قوعامعا ۇيىتقى بولۋعا ءتيىس. ەلىمىزدە كوپتەگەن كونسۋلتاتيۆتىك- كەڭەسشى ورگان بار، الايدا باسىم بولىگىنىڭ قىزمەتى شاشىراڭقى، ءبىر-ءبىرىن قايتالايدى. ولاردىڭ جۇمىسىن ۇيلەستىرىپ، ساراپتامالىق الەۋەتىن بىرىكتىرۋ جانە كەلىپ تۇسكەن ۇسىنىستاردى جۇيەلەۋ حالىق كەڭەسىنە جۇكتەلەدى، — دەدى قاسىم-جومارت توقايەۆ.

«تازا قازاقستان» تۇجىرىمداماسى مەن «زاڭ جانە ءتارتىپ» قاعيداتى ەگىز ۇعىم. 

— جالپى، تازالىق پەن ءتارتىپتى ساقتاۋ ماسەلەسى ءاردايىم باستى نازاردا بولۋى كەرەك. ونسىز ەشقانداي دامۋ دا، وركەندەۋ دە بولمايتىنى ايدان انىق. ءبىز «تازا قازاقستان» جالپىۇلتتىق قوزعالىسى ارقىلى تۇتاس ۇلتىمىزدىڭ بولمىسىن وزگەرتىپ جاتىرمىز. تابيعاتقا نەمقۇرايلى قاراۋعا، بەيقام بولۋعا، بۇل ماسەلەدە ەشقانداي قاتىگەزدىككە جول بەرۋگە بولمايدى. ادام مەن تابيعات — ەگىز. ءبىز قورشاعان ورتاعا قامقور بولۋىمىز كەرەك. تاعى دا اتاپ وتكىم كەلەدى: قالالاردىڭ ساۋلەتى مەن كوركىنەن حالقىمىزدىڭ مادەنيەتى، بويىنداعى ءقادىر- قاسيەتى جانە قۇندىلىقتارى كورىنىس تابادى، — دەدى پرەزيدەنت.

مەملەكەت باسشىسى ەلىمىزدىڭ تازا، تارتىمدى بولعانى ەڭ الدىمەن ازاماتتارىمىزدىڭ كوڭىل-كۇيىنە، الەۋمەتتىك جاعدايىنا اسەر ەتەتىنىن باسا ايتتى.

— سونداي-اق، بۇل — ەكونوميكالىق وسىمگە ىقپال ەتەتىن ماڭىزدى فاكتور. سوندىقتان، ەلىمىزدى جاپپاي كوگالداندىرۋ، تازالىقتى ساقتاۋ، زاڭ مەن ءتارتىپتى بۇزباۋ — مەملەكەتتىك ماڭىزى بار مىندەتتەر. ءبىز ءبىر كۇننىڭ قامى ءۇشىن ەمەس، بولاشاق ۇرپاقتىڭ جارقىن بولاشاعى ءۇشىن وسى جۇمىسپەن بەلسەندى تۇردە اينالىسۋىمىز كەرەك، — قاسىم-جومارت توقايەۆ.

پرەزيدەنت تازالىققا، تارتىپكە جانە تابيعاتتى ايالاۋعا ايرىقشا ءمان بەرەتىنىن اتاپ ءوتتى.

— قايتكەن كۇندە دە بۇل ىستە كىدىرۋگە، بوساڭسۋعا بولمايدى. جەكەلەگەن تۇلعالار، ءتىپتى، تۇتاس حالىقتار ءوزىن-ءوزى تاربيەلەي الماعانىن تاريح دالەلدەدى. مۇنداي مىندەتتى وتباسى مەن مەكتەپ، قوعام مەن مەملەكەت، ەڭ الدىمەن، مادەني-رۋحاني قۇندىلىقتاردى دارىپتەۋ ارقىلى ورىنداي الادى. ءبىز قالالار مەن تۇتاس ەلىمىزدىڭ كەلبەتىن عانا ەمەس، ودان دا ماڭىزدىسى، ۇلتىمىزدىڭ مەنتاليتەتىن وزگەرتىپ جاتىرمىز. نەمقۇرايلىق پەن سالعىرتتىقتان، ءتىپتى وشپەندىلىكتەن بىرتىندەپ ارىلىپ، تازالىققا، جاۋاپكەرشىلىككە، تابيعاتتى ايالاۋعا بوي ۇيرەتە باستادىق. بۇل ازاماتتاردىڭ، ونىڭ ىشىندە بىرنەشە بۋىن وكىلدەرىنىڭ كوڭىل-كۇيىنە جاعىمدى اسەرىن تيگىزىپ، قوعامداعى احۋالدىڭ جاقسارۋىنا ىقپال ەتەدى، تۇپتەپ كەلگەندە ەكونوميكالىق ءوسىمدى جەدەلدەتەتىن فاكتورعا اينالادى، — دەدى مەملەكەت باسشىسى.

قاسىم-جومارت توقايەۆ «تازا قازاقستاننىڭ» قۋاتى — قوعامدى جىلدار بويى جالعاساتىن جاعىمدى ءارى جاسامپاز كۇن ءتارتىبىنىڭ توڭىرەگىنە توپتاستىرىپ جاتقانىن ايتتى.

— ماڭايى تاپ-تازا بولىپ، جارقىراپ تۇرسا، ادام دا سوعان ساي ادەپ ساقتاۋعا تىرىسادى. لاس ءارى قاراۋسىز جەردە ەنجارلىق باسىپ، قۇقىقتىق نيگيليزم بەلەڭ الادى. بۇل قۇبىلىس الەمدىك ۋربانيستيكادا «سىنعان تەرەزە سالدارى» دەگەن اتاۋمەن بەلگىلى. سوندىقتان «تازا قازاقستان» تۇجىرىمداماسى مەن «زاڭ جانە ءتارتىپ» قاعيداتى ەگىز ۇعىم دەسەك بولادى. بەرەكەسىزدىك پەن تارتىپسىزدىك بەلەڭ العان جاعدايدا زاڭنىڭ ساقتالۋىن تالاپ ەتۋ مۇمكىن ەمەس، — دەدى پرەزيدەنت.

ايتا كەتەيىك، جيىن بارىسىندا پرەزيدەنت كونستيتۋتسيا ءار ادامنىڭ قولىندا جۇرەتىن، جۇمىس ۇستەلىندە تۇراتىن قۇجات بولۋعا ءتيىس ەكەنىن ايتتى.