اينالما جولعا كىرگەندە كولىك جۇرگىزۋشىلەرى قاي جاق بۇرىلىس شامىن جاعۋى ءتيىس

وسكەمەن. KAZINFORM - پوليتسيا كولىك جۇرگىزۋشىلەرى اينالما جولعا كىرگەندە زاڭ بويىنشا قاي جاق بۇرىلىس شامىن جاققانى دۇرىس بولاتىندىعىن ءتۇسىندىرىپ بەردى.

وسكەمەندە ءبىر ەمەس، بىرنەشە اينالما جول بار. سونىڭ ىشىندەگى ەرتىس كوپىرىنە تۇسىرەتىن اينالما جولدا جول-كولىك وقيعاسى ءجيى بولادى.

جۇرگىزۋشىلەردىڭ كوبى وسىنداي جولعا تۇسكەندە قاي جاق بۇرىلىس شامىن جاعۋ قاجەتتىگىن بىلمەي، شاتاسىپ جاتادى. ءبىرى وڭ جاق، باسقالارى سول جاق بۇرىلىس شامىن جاعادى. ياعني، بىرىزدىلىك جوق. ال بۇل جولداعى اپاتتى جاعدايلار سانىن ارتتىراتىندىعى بەلگىلى.

وسى رەتتە، Kazinform ءتىلشىسى ش ق و پوليتسيا دەپارتامەنتىنە ساۋالحات جىبەرىپ، بۇل ساۋالدىڭ جاۋابىن ءبىلىپ كوردى.

- جول قوزعالىسى ەرەجەلەرىنە سايكەس، اينالمالى قوزعالىسپەن قيىلىسقا كىرگەن كەزدە جانە شىققاندا جۇرگىزۋشى وڭ جاق بۇرىلىس شامىن جاعۋى كەرەك، - دەپ جاۋاپ بەردى دەپارتامەنتتىڭ باسپا ءسوز قىزمەتىنەن.

دەمەك، جۇرگىزۋشىلەر اينالما جولعا كىرگەندە وڭ جاق بۇرىلىس شامىن جاعۋى ءتيىس. ودان سوڭ اينالما جول ىشىندە جۇرگەندە سول جاق شامدى، اينالما جولدان شىققاندا قايتادان وڭ جاق شامدى جاعۋى كەرەك.

ەسكە سالساق، وسىعان دەيىن پوليتسەيلەردىڭ بىرەۋدىڭ جەكەمەنشىك كولىگىن پايدالانۋعا قاقىسى بار-جوقتىعى تۋرالى جازعانبىز.