ايماقتىڭ الەۋمەتتىك-ەكونوميكالىق دامۋىن ەگجەي-تەگجەيلى تالقىلاۋىمىز قاجەت - پرەزيدەنت
استانا. KAZINFORM - مەملەكەت باسشىسى قاسىم-جومارت توقايەۆتىڭ توراعالىعىمەن ماڭعىستاۋ وبلىسىنىڭ الەۋمەتتىك-ەكونوميكالىق دامۋى جونىندەگى كەڭەس باستالدى. بۇل تۋرالى اقوردانىڭ باسپا ءسوز قىزمەتى حابارلادى.
باسقوسۋدا پرەزيدەنت ماڭعىستاۋ وبلىسىنىڭ تىنىس-تىرشىلىگىن ەرەكشە نازاردا ۇستايتىنىن ەرەكشە اتاپ ءوتتى.
- مەن بۇگىن اقتاۋعا جۇمىس ساپارىمەن ارنايى كەلىپ وتىرمىن. باستى ماقسات - وبلىستىڭ احۋالىمەن تانىسۋ، ايماقتاعى وزەكتى ماسەلەلەردى تالقىلاۋ. ەلىمىز ءۇشىن ماڭعىستاۋدىڭ ورنى بولەك. بۇل - ستراتەگيالىق ماڭىزى بار ايماق. ماڭعىستاۋدى باتىس قاقپاسى دەۋگە بولادى. مەن وبلىستىڭ تىنىس-تىرشىلىگىن ەرەكشە نازاردا ۇستايمىن. سوندىقتان بۇگىن ايماقتىڭ الەۋمەتتىك-ەكونوميكالىق دامۋ بارىسىن ەگجەي-تەگجەيلى تالقىلاۋىمىز قاجەت، - دەدى قاسىم- جومارت توقايەۆ.
مەملەكە باسشىسى ءوز كەزەگىندە وبلىستاعى حالىق سانى ءبىر ميلليونعا جەتۋى ىقتيمال ەكەنىن ايتتى.
- ايماقتىڭ جالپى ءونىمى ەكى جىلدا 1,3 ەسەگە ءوستى. وتكەن جىلدىڭ باستاپقى 9 ايىندا وڭىرلىك جالپى ءونىم 3,7 تريلليون تەڭگەگە جەتتى. بۇل كورسەتكىش، ءبىر قاراعاندا، جامان ەمەس. بيىل ءبىرىنشى توقسانداعى ەكونوميكالىق ينديكاتور 104,8 پايىز بولدى. وبلىسقا كەيىنگى ەكى جىلدا 2 تريلليون تەڭگەدەن استام ينۆەستيتسيا تارتىلدى.
ايماق تۇرعىندارىنىڭ سانى ۇزدىكسىز ءوسىپ كەلەدى. قازىر مۇندا 800 مىڭنان استام ادام تۇرادى. جاقىندا مەن شىمكەنتكە بارعاندا كوشى-قوندى، ياعني، ميگراتسيانى باقىلاۋسىز قالدىرۋعا بولمايدى دەپ ايتتىم. بولجام بويىنشا كوپ ۇزاماي وبلىستاعى حالىق سانى ءبىر ميلليونعا جەتۋى ىقتيمال، ءتىپتى، ودان اسۋى دا مۇمكىن. بۇل جاعداي ەكونوميكاعا جانە الەۋمەتتىك ينفراقۇرىلىمعا قوسىمشا سالماق تۇسىرەدى. بۇل فاكتوردى ۇمىتپاۋىمىز كەرەك، پوپۋليزمگە ۇرىنباعان ءجون، - دەدى پرەزيدەنت.
كەڭەس وتىرىسىندا قاسىم-جومارت توقايەۆ ايماقتى دامىتۋ بويىنشا ءبىرقاتار تاپسىرما جۇكتەگەنىن، تاياۋ ارادا ناتيجە كۇتەتىنىن جەتكىزدى.
- مەن بۇعان دەيىن تازا اۋىز سۋ ماسەلەسىن شەشۋدى، ءبىلىم بەرۋ جانە دەنساۋلىق ساقتاۋ جۇيەسىن جاقسارتۋدى تاپسىردىم. ازىق-تۇلىك قاۋىپسىزدىگىن قامتاماسىز ەتۋ، كولىك-لوگيستيكا الەۋەتىن ارتتىرۋ جانە تۋريزم سالاسىن دامىتۋ جونىندە ناقتى مىندەتتەر قويىلدى. ءبىراز شارۋا جاسالعان. جەتىستىكتەر از ەمەس، ءبىراق كەمشىلىكتەر دە بار. ونى مويىنداۋ كەرەك جانە اشىق ايتۋ قاجەت.
ناقتى جوسپار بار، مىندەتتەر - بەلگىلى. وزەكتى ماسەلەلەردى شەشۋ ءۇشىن ۇكىمەت پەن اكىمدىك كۇش جۇمىلدىرىپ، بەلسەندى جۇمىس ىستەۋگە ءتيىس. اكىم نۇرداۋلەت قيلىباي جۇمىسىنا بەلسەندى تۇردە كىرىستى، الدىندا تۇرعان مىندەتتەردى، ماسەلەلەردى تۇسىنەدى، ولاردى شەشۋ جولدارىن بىلەدى. تاياۋ ارادا ناتيجەلەردى كۇتەمىن. ونىڭ كوتەرگەن ماسەلەلەرى - وتە وزەكتى، بۇل ماسەلەلەردى ۇكىمەت مۇقيات قاراۋى كەرەك. باستى ماقسات - وبلىس تۇرعىندارىنىڭ تۇرمىس ساپاسىن جاقسارتۋ. بۇل - انىق نارسە، - دەدى مەملەكەت باسشىسى.
